ਮਾਹਿਲਪੁਰ- ਪੰਜਾਬ ਵਿੱਚ ਫੈਲੇ ਨਸ਼ਿਆਂ ਦੇ ਧੁੰਧੂਕਾਰੇ ਨੂੰ ਪ੍ਰਚਾਰਨ ਅਤੇ ਪ੍ਰਸਾਰਨ ਵਿੱਚ ਮੀਡੀਏ ਦਾ ਖਾਸ ਯੋਗਦਾਨ ਰਿਹਾ ਹੈ। ਖਾਸ ਕਰ ਉਹਨਾਂ ਕਲਾਕਾਰਾਂ ਦਾ ਜਿਊਨਾਂ ਆਪਣੇ ਗੀਤਾਂ ਰਾਹੀਂ ਰੰਨ ,ਗੰਨ ਤੇ ਨਸ਼ਿਆਂ ਦਾ ਕਲਚਰ ਪ੍ਰਮੋਟ ਕੀਤਾ। 
ਇਸੇ ਤਰ੍ਹਾਂ ਉਹ ਬੇਈਮਾਨ ਸਰਕਾਰ ਦੇ ਨੇਤਾ ਜਿਨ੍ਹਾਂ ਨੇ ਮਾਵਾਂ ਦੇ ਪੁੱਤਾਂ ਨੂੰ ਖਤਮ ਕਰਨ ਲਈ ਸਿਰਫ ਪੈਸੇ ਨੂੰ ਹੀ ਜ਼ਿੰਦਗੀ ਦਾ ਮਕਸਦ ਬਣਾਈ ਰੱਖਿਆ। ਅੱਜ ਸਾਡੀ ਇਹ ਹਾਲਤ ਬਣ ਗਈ ਹੈ ਕਿ ਅਸੀਂ ਤਿਲ ਤਿਲ ਮਰ ਰਹੇ ਹਾਂ। 
ਮਾਵਾਂ ਤੜਫ ਰਹੀਆਂ ਨੇ, ਭੈਣਾਂ ਵੀਰਾਂ ਦੇ ਰੱਖੜੀ ਬੰਨਣ ਲਈ ਤਰਸ ਰਹੀਆਂ ਨੇ। ਇਹ ਆਲਮ ਸਿਰਜਿਆ ਹੈ ਸਾਡੇ ਤਸਕਰਾਂ ਨੇ ਤੇ ਪੈਸੇ ਦੇ ਲਾਲਚੀਆਂ ਨੇ ਜਿਨ੍ਹਾਂ ਵਿੱਚੋਂ ਇਨਸਾਨੀਅਤ ਖਤਮ ਹੋ ਚੁੱਕੀ ਸੀ। ਇਸ ਵਿਸ਼ੇ ਤੇ ਕੰਮ ਕਰਨ ਵਾਲੇ ਵਧਾਈ ਦੇ ਹੱਕਦਾਰ ਹਨ ਜੋ ਦੇਸ਼ ਕੌਮ ਨੂੰ ਨਸ਼ਿਆਂ ਦੇ ਜਿਲਣ ਚੋਂ ਕੱਢਣ ਲਈ ਯਤਨਸ਼ੀਲ ਹਨ।
   ਨਿਰਮਾਤਾ ਅਤੇ ਅਦਾਕਾਰ ਅਮਰਜੀਤ ਸਿੰਘ ਦੀ ਵੈਬ ਸੀਰੀਜ਼ 'ਤਸਕਰ' ਦੀ ਪ੍ਰਸੰਸਾ ਕਰਨੀ ਬਣਦੀ ਹੈ ਜੋ ਇਸ ਉਦੇਸ਼ ਦੀ ਪੂਰਤੀ ਵਾਸਤੇ ਸਰਗਰਮ ਭੂਮਿਕਾ ਅਦਾ ਕਰ ਰਹੇ ਹਨ। ਉਹਨਾਂ ਦਾ ਮਨੋਰਥ ਹੈ ਕਿ ਸਾਡੀ ਨਵੀਂ ਪਨੀਰੀ ਨਸ਼ਿਆਂ ਦੀ ਚੁੰਗਲ ਚੋਂ ਬਚ ਕੇ ਸੋਹਣੀ ਅਤੇ ਨਰੋਈ ਬਣ ਸਕੇ ਅਤੇ ਦੇਸ਼ ਕੌਮ ਦੇ ਨਵ ਨਿਰਮਾਣ ਵਿੱਚ ਆਪਣਾ ਯੋਗਦਾਨ ਪਾ ਸਕੇ। ਤਸਕਰ ਵੈਬ ਸੀਰੀਜ਼ ਦੇ ਨਿਰਦੇਸ਼ਕ ਜੋਤ ਹਰਜੋਤ ਬਹੁਤ ਹੀ ਉਤਸ਼ਾਹ ਵਰਧਕ ਨਿਰਦੇਸ਼ਕ ਹਨ ਜਿਹੜੇ ਆਪਣੇ ਕਾਰਜ ਨੂੰ ਸਮਰਪਿਤ ਹੋ ਕੇ ਨਿਭਾ ਰਹੇ ਹਨ। 
30 ਤੋਂ ਵੱਧ ਫੀਚਰ ਫਿਲਮਾਂ ਵਿੱਚ ਕੰਮ ਕਰਨ ਵਾਲੇ ਪ੍ਰਸਿੱਧ ਐਕਟਰ ਡਾਇਰੈਕਟਰ ਅਸ਼ੋਕ ਪੁਰੀ ਇਸ ਵੈਬ ਸੀਰੀਜ਼ ਵਿੱਚ ਆਪਣੀ ਇੱਕ ਅਹਿਮ ਭੂਮਿਕਾ ਅਦਾ ਕਰ ਰਹੇ ਹਨ। ਉਹਨਾਂ ਦਾ ਕਹਿਣਾ ਹੈ ਕਿ ਇਸ ਯੂਨਿਟ ਵਿੱਚ ਕੰਮ ਕਰਕੇ ਉਹਨਾਂ ਨੂੰ ਭਰਪੂਰ ਆਨੰਦ ਮਿਲ ਰਿਹਾ ਹੈ। ਇਸ ਤੋਂ ਪਹਿਲਾਂ ਉਹ ਦੇਸ਼ ਭਗਤਾਂ ਅਤੇ ਮਹਾਂਪੁਰਸ਼ਾਂ ਦੀਆਂ ਜੀਵਨੀਆਂ ਤੇ ਵੀ ਵਿਸ਼ੇਸ਼ ਕਾਰਜ ਕਰ ਚੁੱਕੇ ਹਨ। ਤਸਕਰ ਵਿੱਚ ਉਹ ਇੱਕ ਬਾਪ ਦੀ ਭੂਮਿਕਾ ਨਿਭਾ ਰਹੇ ਹਨ। ਮਾਹਿਲਪੁਰ ਇਲਾਕੇ ਵਿੱਚ ਕੀਤੀ ਜਾ ਰਹੀ ਇਸ ਸੀਰੀਜ਼ ਦੀ ਸ਼ੂਟਿੰਗ ਨੂੰ ਪ੍ਰਸ਼ਾਸਨ ਅਤੇ ਲੋਕਾਂ ਵੱਲੋਂ ਭਰਪੂਰ ਹੁੰਗਾਰਾ ਮਿਲ ਰਿਹਾ ਹੈ। 
ਇੰਜ ਮਹਿਸੂਸ ਹੋ ਰਿਹਾ ਹੈ ਕਿ ਇਹ ਸੀਰੀਜ਼ ਕਾਮਯਾਬ ਵੀ ਰਹੇਗੀ ਅਤੇ ਆਪਣੇ ਟੀਚੇ ਨੂੰ ਪੂਰਾ ਵੀ ਕਰੇਗੀ। ਇਸ ਵੈਬ ਸੀਰੀਜ਼ ਵਿੱਚ ਸੁਨੀਤਾ ਸਿੰਘ ਅਤੇ ਅਸ਼ੋਕ ਸੱਭਰਵਾਲ ਵੀ ਆਪਣੀਆਂ ਸ਼ਾਨਦਾਰ ਭੂਮਿਕਾਵਾਂ ਅਦਾ ਕਰ ਰਹੇ ਹਨ। ਨਿਰਮਾਤਾ ਅਮਰਜੀਤ ਦਾ ਕਹਿਣਾ ਹੈ ਕਿ ਇਸ ਸੀਰੀਜ਼ ਰਾਹੀਂ ਉਹ ਆਪਣੀ ਨੌਜਵਾਨ ਪਨੀਰੀ ਨੂੰ ਸਹੀ ਦਿਸ਼ਾ ਪ੍ਰਦਾਨ ਕਰਨ ਦਾ ਯਤਨ ਕਰ ਰਹੇ ਹਨ।