ਬਲਾਚੌਰ-ਨੌਜਵਾਨ ਗਾਇਕ ਜਗਦੀਸ਼ ਹੀਰਾ ਦਾ ਹਾਲ ਹੀ ਵਿੱਚ ਗਾਇਕਾ ਸੁਪਿੰਦਰ ਕੌਰ ਨਾਲ ਗਾਇਆ ਸਿੰਗਲ ਟ੍ਰੈਕ ਦੋ-ਗਾਣਾ ਜੋੜੀਆਂ ਬਣਾਉਣ ਵਾਲਿਆ ਤੇਰਾ ਲੱਖ-ਲੱਖ ਸ਼ੁਕਰ ਹੋਵੇ, ਖੂਬ ਚਰਚਾ ਵਿੱਚ ਹੈ| ਇਸ ਗਾਣੇ ਨੂੰ ਲਿਖਿਆ ਹੈ ਪੰਮੀ ਲਾਲੋਮਜਾਰਾ ਨੇ ਅਤੇ ਸੰਗੀਤ ਦਿੱਤਾ ਹੈ ਰੋਮੀ ਸਿੰਘ ਨੇ| ਇਸ ਦੇ ਪ੍ਰੋਡਿਊਸਰ ਰਮੇਸ਼ ਭੰਡਾਰੀ ਤੇ ਕਰਨ ਜਲਾਲ ਹਨ| ਦੋ-ਗਾਣੇ ਦਾ ਫਿਲਮੀਕਰਨ ਕੀਤਾ ਹੈ ਆਰ ਐਸ ਫਿਲਮਜ਼ ਨੇ ਅਤੇ ਪੇਸ਼ਕਸ਼ ਹੈ ਐਫ ਐਮ ਡੀ ਮਿਊਜਿਕ ਕੰਪਨੀ ਦੀ| 
ਬਹੁਤ ਹੀ ਖੂਬਸੂਰਤ ਤੇ ਬੁਲੰਦ ਅਵਾਜ਼ ਵਿੱਚ ਗਾਇਆ ਇਹ ਗਾਣਾ ਵਿਆਹ ਸੱਭਿਆਚਾਰ ਦੀ ਬਾਤ ਪਾਉਂਦਾ ਹੋਇਆ ਆਮ ਧਾਰਨਾਂ ਤੋਂ ਹਟਕੇ ਜੋੜੀਆਂ ਬਣਾਉਣ ਵਾਲੇ ਸੂਤਰਧਾਰ ਵਿਚੋਲੇ ਦੀ ਸਿਫਤ ਵੀ ਕਰਦਾ ਹੈ ਤੇ ਸ਼ਾਬਾਸ਼ੀ ਵੀ ਦਿੰਦਾ ਹੈ| ਇਸ ਤੋਂ ਮਹੀਨਾ ਕੁ ਪਹਿਲਾਂ ਜਗਦੀਸ਼ ਹੀਰਾ ਨੇ ਗਾਇਕਾ ਦਵਿੰਦਰ ਦਿਓਲ ਨਾਲ ਦੋ-ਗਾਣਾ , ਕੋਰੇ-ਕੋਰੇ ਨੋਟ, ਸਰੋਤਿਆਂ ਦੀ ਝੋਲੀ ਪਾ ਕਾਫੀ ਵਾਹ ਵਾਹ ਖੱਟੀ ਸੀ| ਇਹ ਦੋਵੇਂ ਗਾਣੇ ਭੰਗੜਾ ਬੀਟ ਦੇ ਹੋਣ ਕਰਕੇ ਵਿਆਹਾਂ ਵਿੱਚ ਵੱਜਦੇ ਡੀ ਜ਼ੇ ਖੂਬ ਰੌਣਕਾਂ ਲਾ ਰਹੇ ਨੇ| 
ਜਗਦੀਸ਼ ਹੀਰੇ ਦਾ ਜਨਮ ਪਿੰਡ ਗੜ੍ਹੀ-ਕਾਨੂੰਗੋਆਂ ਤਹਿਸੀਲ ਬਲਾਚੌਰ ਜ਼ਿਲ੍ਹਾ ਸ਼ਹੀਦ ਭਗਤ ਸਿੰਘ ਨਗਰ ਵਿਚ ਪਿਤਾ ਬਾਬੂ ਰਾਮ ਮਾਤਾ ਜਵਾਲੀ ਦੇਵੀ ਦੇ ਗ੍ਰਹਿ ਵਿਖੇ ਹੋਇਆ| ਇਲਾਕੇ ਵਿੱਚ ਅਤੇ ਆਪਣੇ ਪਿੰਡ ਲੱਗਦੇ ਰੋਸ਼ਨੀ ਮੇਲੇ ਵਿੱਚ ਲੱਗਦੇ ਗਾਇਕੀ ਦੇ ਅਖਾੜਿਆਂ ਨੂੰ ਵੇਖ-ਵੇਖ ਬਚਪਨ ਤੋਂ ਹੀ ਉਸ ਨੂੰ ਗਾਉਣ ਦਾ ਸ਼ੌਕ ਚਿੰਬੜ ਗਿਆ| ਇਲਾਕਾਈ ਮੇਲਿਆਂ, ਅਖਾੜਿਆਂ ਅਤੇ ਧਾਰਮਿਕ ਸਮਾਗਮਾਂ ਵਿੱਚ ਸ਼ਮੂਲੀਅਤ ਕਰਨ ਉਪਰੰਤ ਉਸਨੇ ਕਨੇਡਾ ਦੀ ਮਿਊਜਿਕ ਕੰਪਨੀ ਮਿਊਜ਼ਿਕ ਲਵਰ ਰਾਹੀਂ ਆਪਣੀ ਪਲੇਠੀ ਕੈਸਿਟ ਇੰਡੀਆ ਦੀ ਸੈਰ ਸਰੋਤਿਆਂ ਦੀ ਕਚਹਿਰੀ ਵਿੱਚ ਪੇਸ਼ ਕੀਤੀ|
ਇਸ ਕੈਸਿਟ ਵਿੱਚ ਉਹਦੇ ਨਾਲ ਸੁਪ੍ਰਸਿੱਧ ਗਾਇਕਾ ਪ੍ਰਵੀਨ ਭਾਰਟਾ ਅਤੇ ਸਦੇਸ਼ ਕੁਮਾਰੀ ਦੇ ਗਾਏ ਗੀਤਾਂ ਤੋਂ ਬਿਨ੍ਹਾਂ ਹੀਰਾ ਦੇ ਗਾਏ ਪੰਜ ਸੋਲੋ ਗੀਤ ਸਨ | ਉਸ ਤੋਂ ਬਾਅਦ ਮੁੰਡਾ ਕੋਹਿਨੂਰ ਵਰਗਾ ਸਿੰਗਲ ਟ੍ਰੈਕ ਗੀਤ ਦੇਣ ਤੋਂ ਬਾਅਦ ਹੁਣ ਜੋੜੀਆਂ ਲੈ ਕੇ ਹਾਜ਼ਰ ਹੋਇਆ ਹੈ| ਆਪਣੇ ਪਰਿਵਾਰ ਸਮੇਤ ਇਟਲੀ ਵੱਸਦਾ ਜਗਦੀਸ਼ ਹੀਰਾ ਜਦੋਂ ਵੀ ਸਾਲ ਦੋ ਸਾਲ ਮਗਰੋਂ ਪੰਜਾਬ ਪਰਤਦਾ ਹੈ ਤਾਂ ਇੱਕ ਦੋ ਸੱਭਿਆਚਾਰਕ ਗੀਤ ਸਰੋਤਿਆਂ ਦੇ ਸਨਮੁੱਖ ਕਰਕੇ ਆਪਣੀ ਮਿੱਟੀ ਨਾਲ ਜੁੜੇ ਹੋਣ ਦਾ ਸਬੂਤ ਦੇਣ ਦੇ ਨਾਲ ਚਰਚਾ ਵੀ ਛੇੜ ਜਾਂਦਾ ਹੈ|