ਪਟਿਆਲਾ, 7 ਦਸੰਬਰ: ਪੰਜਾਬੀ ਯੂਨੀਵਰਸਿਟੀ ਦੇ ਯੁਵਕ ਭਲਾਈ ਵਿਭਾਗ ਅਤੇ ਪੰਜਾਬ ਸੰਗੀਤ ਅਕਾਦਮੀ ਚੰਡੀਗੜ੍ਹ ਦੇ ਸਹਿਯੋਗ ਨਾਲ਼ ਸਾਰਥਕ ਰੰਗਮੰਚ ਅਤੇ ਸੋਸ਼ਲ ਵੈਲਫੇਅਰ ਸੁਸਾਇਟੀ, ਪਟਿਆਲਾ ਵਲੋਂ ਜਾਰੀ 10ਵੇਂ ਨੋਰ੍ਹਾ ਰਿਚਰਡਜ਼ ਥੀਏਟਰ ਫੈਸਟੀਵਲ ਦੇ ਪੰਜਵੇ ਦਿਨ ਸੁਚੇਤਕ ਰੰਗਮੰਚ ਮੋਹਾਲੀ ਵੱਲੋਂ ਨਾਟਕ ‘ਇੰਨਾ ਦੀ ਆਵਾਜ਼’ ਪੇਸ਼ ਕੀਤਾ ਗਿਆ। ਇਸ ਉਰਦੂ ਦੀ ਗੂੜ੍ਹੀ ਰੰਗਤ ਵਾਲੇ ਹਿੰਦੀ ਨਾਟਕ ਦਾ ਪੰਜਾਬੀ ਅਨੁਵਾਦ ਸ਼ਬਦੀਸ਼ ਨੇ ਕੀਤਾ ਹੈ। ਅਸਗਰ ਵਜਾਹਤ ਦਾ ਨਾਟਕ ‘ਇੰਨਾ ਦੀ ਆਵਾਜ਼’ ਸੱਤਾ ਦੀ ਸ਼ਰਣ ਗਏ ਕਲਾਕਾਰ ਦੀ ਹੋਣੀ ਬਿਆਨ ਕਰਦਾ ਹੈ, ਜੋ ਲੋਕਾਈ ਦਾ ਪਿਆਰ ਗਵਾ ਬੈਠਦਾ ਹੈ ਅਤੇ ਓਥੇ ਹੀ ਪਹੁੰਚ ਜਾਂਦਾ ਹੈ, ਜਿੱਥੋਂ ਉਹ ਅਗਾਂਹ ਤੁਰਿਆ ਸੀ।
ਨਾਟਕਕਾਰ ਨੇ ਕਥਾ ਨੂੰ ਦੂਰਦੇਸ਼ ਵਿੱਚ ਤੇ ਸਦੀਆਂ ਪਹਿਲਾਂ ਵਾਪਰੇ ਘਟਨਾਕ੍ਰਮ ਵਜੋਂ ਦਰਸਾਇਆ ਹੈ, ਜਦੋਂ ਦੁਨੀਆਂ ਦੀ ਜਨਤਾ ਰਾਜਸ਼ਾਹੀ ਦੇ ਜ਼ੁਲਮਾਂ ਹੇਠ ਪਿੱਸ ਰਹੀ ਸੀ। ਇਹ ਨਾਟਕ ‘ਇੰਨਾ’ ਨਾਂ ਦੇ ਕਿਰਦਾਰ ਦੁਆਲੇ ਘੁੰਮਦਾ ਹੈ, ਜਿਸਨੂੰ ਫ਼ੌਜੀ ਹਮਲੇ ਤੋਂ ਬਾਅਦ ਗ਼ੁਲਾਮ ਬਣਾ ਲਿਆ ਗਿਆ ਸੀ ਅਤੇ ਇੱਕ ਬਾਦਸ਼ਾਹ ਦੇ ਅਹਿਲਕਾਰਾਂ ਨੇ ਖ਼ਰੀਦ ਕੇ ਆਪਣੀ ਰਿਆਸਤ ਵਿੱਚ ਕਾਮਾ ਬਣਾ ਲਿਆ ਸੀ। ਨਾਟਕ ਵਿੱਚ ਅਨੀਤਾ ਸ਼ਬਦੀਸ਼, ਗੈਰੀ ਵੜੈਚ, ਅਰਮਾਨ ਸੰਧੂ, ਗੁਰਜੰਟ ਸਿੰਘ, ਅਵਤਾਰ ਐਰੀ, ਯੁਵਰਾਜ ਬਾਜਵਾ, ਪਰਮ, ਗੁਰਮੁੱਖ ਗਿਨੀ,ਮਨਦੀਪ ਜੋਸ਼ੀ ,ਭਰਤ ਸ਼ਰਮਾ ,ਅਨੁਹਾਰ, ਸੋਨੀਆ, ਬਬੀਤਾ ਨੇ ਆਪਣੇ ਕਿਰਦਾਰਾਂ ਨੂੰ ਬਾਖੂਬੀ ਨਿਭਾਇਆ। ਲਾਈਟ ‘ਤੇ ਕਰਨ ਗੁਲਜ਼ਾਰ ਨੇ ਸਾਥ ਦਿੱਤਾ ਅਤੇ ਪਿੱਠਵਰਤੀ ਲਾਈਵ ਮਿਊਜ਼ਿਕ ‘ਤੇ ਸ਼ਬਦੀਸ਼ ਅਤੇ ਅਵਨੂਰ ਨੇ ਸਾਥ ਨਿਭਾਇਆ । ਨਾਟਕ ਦਾ ਸੈੱਟ ਡਿਜ਼ਾਈਨ ਤੇ ਮੇਕਅੱਪ ਡਾ. ਲੱਖਾ ਲਹਿਰੀ ਨੇ ਕੀਤਾ। ਫ਼ੈਸਟੀਵਲ ਡਾਇਰੈਕਟਰ ਡਾ.ਇੰਦਰਜੀਤ ਗੋਲਡੀ ਨੇ ਆਏ ਹੋਏ ਮਹਿਮਾਨਾਂ ਤੇ ਦਰਸ਼ਕਾਂ ਦਾ ਧੰਨਵਾਦ ਕੀਤਾ।
ਸਵੇਰ ਦੇ ਰੂ-ਬ-ਰੂ ਵਾਲ਼ੇ ਸੈਸ਼ਨ ਦੌਰਾਨ ਪੰਜਾਬੀ ਰੰਗਮੰਚ ਤੇ ਫਿਲਮੀ ਅਦਾਕਾਰਾ ਅਨੀਤਾ ਸ਼ਬਦੀਸ਼ ਅਤੇ ਉਨ੍ਹਾਂ ਦੇ ਹਮਸਫ਼ਰ ਲੇਖਕ ਸ਼ਬਦੀਸ਼ ਨੇ ਦਰਸ਼ਕਾਂ ਨਾਲ਼ ਆਪਣੇ ਰੰਗਮੰਚ ਤੇ ਫ਼ਿਲਮੀ ਸਫ਼ਰ ਦੀਆਂ ਯਾਦਾਂ ਸਾਂਝੀਆਂ ਕੀਤੀਆਂ ਤੇ ਦਰਸ਼ਕਾਂ ਦੇ ਸਵਾਲਾਂ ਦੇ ਜਵਾਬ ਦਿੱਤੇ। ਅਨੀਤਾ ਸ਼ਬਦੀਸ਼ ਨੇ ਕਿਹਾ ਕਿ ਫ਼ਿਲਮਾਂ ਪੈਸਾ ਦਿੰਦੀਆਂ ਹਨ ਪਰ ਰੰਗਮੰਚ ਸੰਤੁਸ਼ਟੀ ਦਿੰਦਾ ਹੈ। ਅੰਤ ਵਿੱਚ ਪੁਸਤਕ ਸੱਭਿਆਚਾਰ ਨੂੰ ਪ੍ਰਫੁੱਲਿਤ ਕਰਨ ਹਿੱਤ ਟਵੰਟੀ ਫ਼ਸਟ ਸੈਂਚੁਰੀ ਵਲੋਂ ਪ੍ਰਕਾਸ਼ਿਤ ਸਵਾਮੀ ਸਰਬਜੀਤ ਦੀ ਲਿਖੀ ਪੁਸਤਕ ‘ਤਮ੍ਹਾ ’ ਇਸ ਜੋੜੀ ਨੇ ਰਿਲੀਜ਼ ਕੀਤੀ।