ਗੜ੍ਹਸ਼ੰਕਰ- ਪੰਜਾਬ ਵਿੱਚ ਭਿਆਨਕ ਹੜ੍ਹਾਂ ਕਾਰਨ ਹੋਏ ਲੋਕਾਂ ਦੇ ਜਾਨੀ ਤੇ ਮਾਲੀ ਨੁਕਸਾਨ ਦਾ  ਢੁਕਵਾਂ ਮੁਆਵਜ਼ਾ ਦੇਣ ਲਈ ਜ਼ਮਹੂਰੀ ਕਿਸਾਨ ਸਭਾ ਵਲੋਂ ਸਮੁੱਚੇ ਰਾਜ ਵਿਚ  ਡਿਪਟੀ ਕਮਿਸ਼ਨਰਾਂ ਤੇ ਐਸ. ਡੀ. ਐਮਜ ਰਾਹੀਂ ਮੁੱਖ ਮੰਤਰੀ ਪੰਜਾਬ ਨੂੰ ਮੰਗ ਪੱਤਰ ਭੇਜੇ ਜਾ ਰਹੇ ਹਨ। ਇਸ ਸੰਬੰਧ ਵਿਚ ਜਮਹੂਰੀ ਕਿਸਾਨ ਸਭਾ ਇਕਾਈ ਗੜ੍ਹਸ਼ੰਕਰ ਵਲੋਂ ਗਿਆਨੀ ਅਵਤਾਰ ਸਿੰਘ ਦੀ ਅਗਵਾਈ ਵਿੱਚ ਮੰਗ ਪੱਤਰ ਐਸ. ਡੀ. ਐਮ. ਦਫਤਰ ਗੜ੍ਹਸ਼ੰਕਰ ਦੀ ਸੁਪਰਡੈਂਟ ਨੂੰ ਦਿੱਤਾ ਗਿਆ ਕਿਉਂਕਿ ਐਸ. ਡੀ. ਐਮ. ਸਾਹਿਬ ਕਿਸੀ  ਰੁਝੇਵੇਂ ਕਾਰਨ ਦਫਤਰ ਵਿਚ ਮੌਜੂਦ ਨਹੀਂ ਸਨ।  
ਇਸ ਸਮੇਂ ਇਕਾਈ ਦੇ ਸਕੱਤਰ ਰਾਮ ਜੀ ਦਾਸ ਚੌਹਾਨ ਵਲੋਂ ਮੰਗਾਂ ਦਾ ਜ਼ਿਕਰ ਕਰਦੇ ਹੋਏ ਕਿਹਾ ਕਿ ਹੜ੍ਹ ਕਾਰਨ ਮਰੇ ਵਿਅਕਤੀਆਂ ਨੂੰ ਪ੍ਰਤੀ ਵਿਅਕਤੀ ਦਸ ਲੱਖ ਰੁਪੈ ਮੁਆਵਜ਼ਾ ਦਿੱਤਾ ਜਾਵੇ, ਬਰਬਾਦ ਹੋਈਆਂ ਫ਼ਸਲਾਂ ਲਈ ਪ੍ਰਤੀ ਏਕੜ 70 ਹਜ਼ਾਰ,ਗੰਨੇ ਦੀ ਫ਼ਸਲ ਲਈ ਪ੍ਰਤੀ ਏਕੜ ਇੱਕ ਲੱਖ ਰੁਪਏ ਮੁਆਵਜ਼ਾ ਦਿੱਤਾ ਜਾਵੇ,ਮੁਆਵਜ਼ੇ ਦੀ ਰਕਮ ਅਸਲੀ ਕਾਸ਼ਤਕਾਰ ਨੂੰ ਹੀ ਦਿੱਤੀ ਜਾਵੇ।
ਹੜ੍ਹ ਪ੍ਰਭਾਵਿਤ ਖੇਤਰਾਂ ਦੇ ਬੇਜ਼ਮੀਨੇ ਪਰਿਵਾਰਾਂ ਨੂੰ ਪ੍ਰਤੀ ਪਰਿਵਾਰ 10 ਹਜ਼ਾਰ ਰੁਪੈ ਦਿੱਤੇ ਜਾਣ,ਮ੍ਰਿਤਕ ਪਸ਼ੂਆਂ ਲਈ ਪ੍ਰਤੀ ਪਸ਼ੂ ਇੱਕ ਲੱਖ ਰੁਪੈ ਦੀ ਰਾਸ਼ੀ ਦਿੱਤੀ ਜਾਵੇ, ਡਿੱਗੇ ਘਰਾਂ ਲਈ ਪ੍ਰਤੀ ਘਰ ਦਸ ਲੱਖ ਰੁਪਏ ਦਿੱਤੇ  ਜਾਣ, ਬਰਬਾਦ ਹੋਏ ਬਾਗ਼ਾਂ, ਦਰੱਖਤਾਂ,ਪੋਲਟਰੀ ਫਾਰਮ,ਖੇਤੀ ਮਸ਼ੀਨਰੀ ਦੀ ਵੱਖਰੇ ਤੌਰ ਤੇ ਭਰਪਾਈ ਕੀਤੀ ਜਾਵੇ, ਬੈਂਕ ਕਰਜ਼ੇ ਦੀਆਂ ਕਿਸ਼ਤਾਂ ਅੱਗੇ ਪਾਈਆਂ ਜਾਣ, ਹੜ੍ਹ ਕਾਰਨ ਹੋਣ ਬਿਮਾਰੀਆਂ ਨੂੰ ਰੋਕਣ ਦੇ ਅਗਾਊ ਪਰਬੰਧ ਕੀਤੇ ਜਾਣ।
 ਹੜ੍ਹ ਪੀੜਿਤਾਂ ਨੂੰ ਦਿੱਤੀ ਜਾਣ ਵਾਲੀ ਸਰਕਾਰੀ ਸਹਾਇਤਾ ਵਿਚ ਸੰਭਾਵੀ ਭ੍ਰਿਸ਼ਟਾਚਾਰ ਨੂੰ ਰੋਕਣ ਲਈ ਸਖ਼ਤ ਕਦਮ ਚੁੱਕੇ ਜਾਣ, ਨੁਕਸਾਨੀਆਂ ਸੜਕਾਂ ਤੇ ਪੁਲਾਂ ਆਦਿ ਦੀ ਮੁਰੰਮਤ ਜਲਦੀ ਤੋਂ ਜਲਦੀ ਕੀਤੀ ਜਾਵੇ। ਦਫਤਰ ਸੁਪਰਡੈਂਟ ਵਲੋਂ ਯਕੀਨ ਦਵਾਇਆ ਗਿਆ ਕਿ ਮੰਗ ਪੱਤਰ ਸ਼ਿਫਾਰਸ਼ ਤਹਿਤ ਉੱਚ ਅਧਿਕਾਰੀਆਂ ਨੂੰ ਭੇਜ ਦਿੱਤਾ ਜਾਵੇਗਾ। ਇਸ ਸਮੇਂ ਕੁਲਭੂਸ਼ਨ ਕੁਮਾਰ  ਮਹਿੰਦਵਾਨੀ,ਮਾਸਟਰ ਬਲਵੰਤ ਰਾਮ,ਬਾਬੂ ਗੋਪਾਲ ਦਾਸ ਮਨਹੋਤਰਾ,ਦੇਵੀ ਦਾਸ ਭੱਜਲ਼ ਤੇ ਸ਼ਾਮ ਸੁੰਦਰ ਮੌਜੂਦ ਸਨ।