ਲੁਧਿਆਣਾ 19 ਦਸੰਬਰ 2025:- ਗੁਰੂ ਅੰਗਦ ਦੇਵ ਵੈਟਨਰੀ ਅਤੇ ਐਨੀਮਲ ਸਾਇੰਸਜ਼ ਯੂਨੀਵਰਸਿਟੀ, ਲੁਧਿਆਣਾ ਨੇ ਕ੍ਰਿਸ਼ੀ ਵਿਗਿਆਨ ਕੇਂਦਰ ਅਤੇ ਮੱਝਾਂ
ਬਾਰੇ ਖੇਤਰੀ ਖੋਜ ਅਤੇ ਸਿਖਲਾਈ ਕੇਂਦਰ, ਬੂਹ ਵਿਖੇ ਨੀਲੀ ਰਾਵੀ ਦੁੱਧ ਚੁਆਈ ਮੁਕਾਬਲਾ ਅਤੇ ਕਿਸਾਨ ਮੇਲਾ ਆਯੋਜਿਤਕੀਤਾ।
ਡਾ. ਜਤਿੰਦਰ ਪਾਲ ਸਿੰਘ ਗਿੱਲ, ਉਪ-ਕੁਲਪਤੀ, ਸ. ਦਿਲਬਾਗ ਸਿੰਘ ਸੰਧੂ, ਚੇਅਰਮੈਨ, ਮਾਰਕੀਟ ਕਮੇਟੀ, ਹਰੀਕੇ, ਅਤੇ ਸ. ਦਿਲਜੀਤ ਸਿੰਘ ਗਿੱਲ, ਪ੍ਰਧਾਨ, ਪੀਡੀਐਫਏ ਪੰਜਾਬ ਨੇ ਇਸ ਸਮਾਗਮ ਦੇ ਪੁਰਸਕਾਰ ਵੰਡ ਸਮਾਰੋਹ ਦੀ
ਸ਼ੋਭਾ ਵਧਾਈ। ਇਹ ਸਮਾਗਮ ਕਿਸਾਨਾਂ ਵਿੱਚ ਨੀਲੀ ਰਾਵੀ ਨਸਲ ਸੁਧਾਰ ਨੂੰ ਉਤਸ਼ਾਹਿਤ ਕਰਨ ਲਈ ਆਯੋਜਿਤ ਕੀਤਾਗਿਆ ਸੀ।
ਡਾ. ਰਵਿੰਦਰ ਸਿੰਘ ਗਰੇਵਾਲ, ਨਿਰਦੇਸ਼ਕ ਪਸਾਰ ਸਿੱਖਿਆ ਨੇ ਪਤਵੰਤਿਆਂ ਦਾ ਸਵਾਗਤ ਕੀਤਾ ਅਤੇ ਪੰਜਾਬ ਦੀ ਪਸ਼ੂ ਪਾਲਣ ਭਲਾਈ ਪ੍ਰਤੀ ਵੈਟਨਰੀ ਯੂਨੀਵਰਸਿਟੀ ਦੀ ਭੂਮਿਕਾ 'ਤੇ ਚਾਨਣਾ ਪਾਇਆ। ਇਸ ਮੁਕਾਬਲੇ ਦਾ ਉਦੇਸ਼ ਪੰਜਾਬ ਵਿੱਚ ਉੱਚ ਦੁੱਧ ਦੇਣ ਵਾਲੀਆਂ ਨੀਲੀ ਰਾਵੀ ਮੱਝਾਂ ਦੀ ਪਛਾਣ ਕਰਨਾ ਅਤੇ ਬਰੀਡਰਾਂ ਨੂੰ ਪ੍ਰੇਰਿਤ ਕਰਨਾ ਸੀ। ਤਰਨਤਾਰਨ ਦੇ ਪਿੰਡ ਜਮਾਲਪੁਰ ਦੇ ਸ. ਗੁਰਲਾਲ ਸਿੰਘ ਦੀ ਮੱਝ, ਜਿਸਦੀ ਦੁੱਧ ਪੈਦਾਵਾਰ 25.298 ਕਿਲੋਗ੍ਰਾਮ ਸੀ, ਨੇ ਪਹਿਲਾ ਇਨਾਮ ਪ੍ਰਾਪਤ ਕੀਤਾ। ਦੂਜਾ, ਤੀਜਾ, ਚੌਥਾ ਅਤੇ ਪੰਜਵਾਂ ਇਨਾਮ ਕ੍ਰਮਵਾਰ ਪਿੰਡ ਕੋਹਾੜਾ, ਲੁਧਿਆਣਾ ਦੇ ਸ. ਲਖਵੀਰ ਸਿੰਘ (20.665 ਕਿਲੋਗ੍ਰਾਮ), ਪਿੰਡ ਚੀਮਾ ਕਲਾਂ, ਤਰਨ ਤਾਰਨ ਦੇ ਸ. ਬਚਿੱਤਰ ਸਿੰਘ (20.184 ਕਿਲੋਗ੍ਰਾਮ), ਪਿੰਡ ਪਿੱਥੋ, ਬਠਿੰਡਾ ਦੇ ਸ. ਅਮਰੀਕ ਸਿੰਘ (19.868 ਕਿਲੋਗ੍ਰਾਮ) ਅਤੇ ਪਿੰਡ ਚੀਮਾ ਕਲਾਂ, ਤਰਨ ਤਾਰਨ ਦੇ ਸ਼੍ਰੀ ਗੁਰਮਿਮਰਾਨ ਸਿੰਘ (18.950 ਕਿਲੋਗ੍ਰਾਮ) ਦੀਆਂ ਮੱਝਾਂ ਨੂੰ ਦਿੱਤਾ ਗਿਆ। ਪਹਿਲੇ, ਦੂਜੇ, ਤੀਜੇ, ਚੌਥੇ ਅਤੇ ਪੰਜਵੇਂ ਸਥਾਨ ਲਈ ਕ੍ਰਮਵਾਰ 51,000/-, 31,000/-, 21,000/- ਅਤੇ 5,100/- ਰੁਪਏ ਦੇ ਨਕਦ ਇਨਾਮ ਦਿੱਤੇ ਗਏ।
ਡਾ. ਗਿੱਲ ਨੇ ਇਸ ਗੱਲ 'ਤੇ ਜ਼ੋਰ ਦਿੱਤਾ ਕਿ ਅਜਿਹੇ ਮੁਕਾਬਲੇ ਉੱਤਮ ਨਸਲ ਦੀ ਪਛਾਣ ਅਤੇ ਸੰਭਾਲ ਲਈ ਬਹੁਤ ਮਹੱਤਵਪੂਰਨ ਹਨ। ਸ. ਦਿਲਬਾਗ ਸਿੰਘ ਸੰਧੂ ਨੇ ਵੈਟਨਰੀ ਯੂਨੀਵਰਸਿਟੀ ਨੂੰ ਇਸ ਮਹੱਤਵਪੂਰਨ ਸਮਾਗਮ ਨੂੰ ਸੁਚੱਜੇ
ਅਤੇ ਪਾਰਦਰਸ਼ੀ ਢੰਗ ਨਾਲ ਆਯੋਜਿਤ ਕਰਨ ਲਈ ਵਧਾਈ ਦਿੱਤੀ ਅਤੇ ਸਥਾਨਕ ਕਿਸਾਨਾਂ ਦੇ ਪੂਰੇ ਸਮਰਥਨ ਦਾ ਭਰੋਸਾ ਦਿੱਤਾ। ਡਾ. ਗਰੇਵਾਲ ਨੇ ਜੇਤੂਆਂ ਨੂੰ ਵਧਾਈ ਦਿੱਤੀ ਅਤੇ ਦੱਸਿਆ ਕਿ ਭਵਿੱਖ ਵਿੱਚ ਹੋਰ ਮੁਕਾਬਲੇ ਕਰਵਾਏ ਜਾਣਗੇ।
ਪੀ.ਡੀ.ਐਫ.ਏ. ਦੇ ਪ੍ਰਧਾਨ ਸ. ਦਿਲਜੀਤ ਸਿੰਘ ਗਿੱਲ ਨੇ ਆਪਣੀ ਐਸੋਸੀਏਸ਼ਨ ਵੱਲੋਂ ਪਹਿਲੇ ਤਿੰਨ ਸਥਾਨਾਂ ਲਈ ਬਰਾਬਰ ਨਕਦ ਇਨਾਮ ਦਾ ਐਲਾਨ ਕੀਤਾ। ਡਾ. ਪ੍ਰਬਜੀਤ ਸਿੰਘ, ਕੇ.ਵੀ.ਕੇ. ਦੇ ਡਿਪਟੀ ਡਾਇਰੈਕਟਰ ਨੇ ਧੰਨਵਾਦ ਦੇ ਸ਼ਬਦ ਸਾਂਝੇ ਕੀਤੇ।