ਲੁਧਿਆਣਾ 27 ਜੁਲਾਈ 2026:- ਗੁਰੂ ਅੰਗਦ ਦੇਵ ਵੈਟਨਰੀ ਅਤੇ ਐਨੀਮਲ ਸਾਇੰਸਜ਼ ਯੂਨੀਵਰਸਿਟੀ, ਲੁਧਿਆਣਾ ਦੇ ਪਸ਼ੂ ਅਹਾਰ ਵਿਭਾਗ ਨੇ ਪਸਾਰ ਸਿੱਖਿਆ ਨਿਰਦੇਸ਼ਾਲੇ ਦੀ ਅਗਵਾਈ ਹੇਠ "ਡੇਅਰੀ ਕਿਸਾਨਾਂ ਲਈ ਪੌਸ਼ਟਿਕ ਤਕਨਾਲੋਜੀਆਂ" ਵਿਸ਼ੇ 'ਤੇ ਪੰਜ ਦਿਨਾ ਦੇ ਵਿਹਾਰਕ ਸਿਖਲਾਈ ਪ੍ਰੋਗਰਾਮ ਦਾ ਆਯੋਜਨ ਕੀਤਾ। ਸਮਾਪਤੀ ਸੈਸ਼ਨ ਦੌਰਾਨ ਨਿਰਦੇਸ਼ਕ ਪਸਾਰ ਸਿੱਖਿਆ ਡਾ. ਰਵਿੰਦਰ ਸਿੰਘ ਗਰੇਵਾਲ ਨੇ ਪਸ਼ੂਆਂ ਦੀ ਉਤਪਾਦਕਤਾ ਵਧਾਉਣ ਅਤੇ ਮੁਨਾਫ਼ੇ ਨੂੰ ਬਿਹਤਰ ਕਰਨ ਲਈ ਵਿਗਿਆਨਕ ਖੁਰਾਕ ਅਭਿਆਸਾਂ ਅਤੇ ਆਧੁਨਿਕ ਪੌਸ਼ਟਿਕ ਤਕਨਾਲੋਜੀਆਂ ਨੂੰ ਅਪਣਾਉਣ ਦੀ ਮਹੱਤਤਾ 'ਤੇ ਜ਼ੋਰ ਦਿੱਤਾ। ਉਨ੍ਹਾਂ ਨੇ ਪ੍ਰਤੀਭਾਗੀਆਂ ਨੂੰ ਡੇਅਰੀ ਫਾਰਮਿੰਗ ਭਾਈਚਾਰੇ ਦੇ ਲਾਭ ਲਈ ਯੂਨੀਵਰਸਿਟੀ ਦੁਆਰਾ ਵਿਕਸਤ ਤਕਨਾਲੋਜੀਆਂ ਅਤੇ ਸਲਾਹਕਾਰ ਸੇਵਾਵਾਂ ਦੀ ਢੁੱਕਵੀਂ ਵਰਤੋਂ ਕਰਨ ਲਈ ਉਤਸ਼ਾਹਿਤ ਕੀਤਾ।
ਡਾ. ਜਸਪਾਲ ਸਿੰਘ ਹੁੰਦਲ, ਪਸ਼ੂ ਅਹਾਰ ਵਿਭਾਗ ਦੇ ਮੁਖੀ ਅਤੇ ਕੋਰਸ ਨਿਰਦੇਸ਼ਕ ਨੇ ਕਿਹਾ ਕਿ ਇਹ ਪ੍ਰੋਗਰਾਮ ਸੰਤੁਲਿਤ ਰਾਸ਼ਨ ਫਾਰਮੂਲਾ, ਸਥਾਨਕ ਤੌਰ 'ਤੇ ਉਪਲਬਧ ਫੀਡ ਸਰੋਤਾਂ ਦੀ ਸੁਚੱਜੀ ਵਰਤੋਂ ਅਤੇ ਪਸ਼ੂਆਂ ਦੀ ਸਿਹਤ, ਦੁੱਧ ਉਤਪਾਦਨ ਅਤੇ ਸਮੁੱਚੀ ਮੁਨਾਫ਼ੇਦਾਰੀ ਨੂੰ ਬਿਹਤਰ ਬਣਾਉਣ ਲਈ ਆਧੁਨਿਕ ਖੁਰਾਕ ਤਕਨਾਲੋਜੀਆਂ ਦਾ ਵਿਹਾਰਕ ਗਿਆਨ ਪ੍ਰਦਾਨ ਕਰਨ ਲਈ ਤਿਆਰ ਕੀਤਾ ਗਿਆ ਸੀ।
ਸਿਖਲਾਈ ਵਿੱਚ ਖਣਿਜ ਪੌਸ਼ਟਿਕਤਾ, ਫੀਡ ਵਿਸ਼ਲੇਸ਼ਣ, ਯੂਰੀਆ ਸ਼ੀਰਾ ਖਣਿਜ ਬਲਾਕ , ਬਾਈਪਾਸ ਫੈਟ ਤਕਨਾਲੋਜੀ, ਸੰਤੁਲਿਤ ਰਾਸ਼ਨ ਫਾਰਮੂਲਾ , ਸਾਈਲੇਜ ਬਣਾਉਣਾ, ਫੀਡ ਟੈਸਟਿੰਗ, ਅਫਲਾਟੌਕਸਿਨ ਪ੍ਰਬੰਧਨ, ਖਣਿਜ ਮਿਸ਼ਰਣ ਤਿਆਰ ਕਰਨਾ, ਫੀਡ ਮਿੱਲ ਮਸ਼ੀਨਰੀ, ਅਤੇ ਫਸਲੀ ਰਹਿੰਦ-ਖੂੰਹਦ ਨੂੰ ਯੂਰੀਏ ਨਾਲ ਸੋਧਣਾ ਅਤੇ ਹੇਅ 'ਤੇ ਲੈਕਚਰ ਅਤੇ ਵਿਹਾਰਕ ਪ੍ਰਦਰਸ਼ਨ ਸ਼ਾਮਲ ਸਨ।  ਪ੍ਰੋਗਰਾਮ ਦਾ ਸੰਯੋਜਨ ਡਾ. ਜੇ.ਐਸ. ਸਿੱਧੂ ਅਤੇ ਡਾ. ਸੰਦੀਪ ਉਨਿਆਲ ਵੱਲੋਂ ਕੀਤਾ ਗਿਆ ਸੀ।
ਵਿਭਾਗ ਦੇ ਅਧਿਆਪਕਾਂ ਨੇ ਪੂਰੇ ਪ੍ਰੋਗਰਾਮ ਦੌਰਾਨ ਭਾਸ਼ਣ ਦਿੱਤੇ ਅਤੇ ਵਿਹਾਰਕ ਪ੍ਰਦਰਸ਼ਨ ਕੀਤਾ । ਪ੍ਰਤੀਭਾਗੀਆਂ ਨੇ ਸਿਖਲਾਈ ਦੀ ਸ਼ਲਾਘਾ ਕੀਤੀ ਅਤੇ ਵਿਸ਼ਵਾਸ ਪ੍ਰਗਟ ਕੀਤਾ ਕਿ ਪ੍ਰਾਪਤ ਗਿਆਨ ਉਨ੍ਹਾਂ ਨੂੰ ਡੇਅਰੀ ਉਤਪਾਦਕਤਾ ਅਤੇ ਮੁਨਾਫ਼ਾ ਵਧਾਉਣ ਲਈ ਵਿਗਿਆਨਕ ਖੁਰਾਕ ਅਭਿਆਸਾਂ ਨੂੰ ਅਪਣਾਉਣ ਵਿੱਚ ਮਦਦ ਕਰੇਗਾ।