ਨਿਊਯਾਰਕ- ਵਿਦੇਸ਼ ਵਿਭਾਗ ਦੇ ਇੱਕ ਸੀਨੀਅਰ ਅਧਿਕਾਰੀ ਨੇ ਕਿਹਾ ਅਮਰੀਕੀ ਰਾਸ਼ਟਰਪਤੀ ਡੋਨਲਡ ਟਰੰਪ ਅਤੇ ਪ੍ਰਧਾਨ ਮੰਤਰੀ ਨਰਿੰਦਰ ਮੋਦੀ ਦੇ ਆਪਸ ਵਿੱਚ ਬਹੁਤ, ਬਹੁਤ ਸਕਾਰਾਤਮਕ ਸਬੰਧ ਹਨ ਅਤੇ ਉਹ ਜਲਦੀ ਹੀ ਮੁਲਾਕਾਤ ਕਰਨਗੇ। ਇਸ ਦੇ ਨਾਲ ਹੀ ਇਸ ਗੱਲ ’ਤੇ ਜ਼ੋਰ ਦਿੱਤਾ ਕਿ ਅਗਲੇ ਕੁਆਡ (Quad) ਸੰਮੇਲਨ ਲਈ ਯੋਜਨਾਬੰਦੀ ਚੱਲ ਰਹੀ ਹੈ, ਜਿਸਦੀ ਉਮੀਦ ਇਸ ਸਾਲ ਦੇ ਅੰਤ ਵਿੱਚ ਜਾਂ 2026 ਦੇ ਸ਼ੁਰੂ ਵਿੱਚ ਹੈ। ਭਾਰਤ ਵਿੱਚ ਅਮਰੀਕਾ, ਆਸਟ੍ਰੇਲੀਆ ਅਤੇ ਜਾਪਾਨ ਦੇ ਨੇਤਾਵਾਂ ਦੀ ਮੇਜ਼ਬਾਨੀ ਕਰਨੀ ਹੈ। 2024 ਦਾ ਸੰਮੇਲਨ ਅਮਰੀਕਾ ਦੇ ਵਿਲਮਿੰਗਟਨ, ਡੇਲਾਵੇਅਰ ਵਿੱਚ ਹੋਇਆ ਸੀ।
ਵਿਦੇਸ਼ ਵਿਭਾਗ ਦੇ ਅਧਿਕਾਰੀ ਨੇ ਪੀਟੀਆਈ ਨੂੰ ਦੱਸਿਆ, ‘‘ਜਲਦੀ ਹੋਣ ਵਾਲੀਆਂ ਮੀਟਿੰਗਾਂ ਦੇ ਸੰਦਰਭ ਵਿੱਚ, ਮੈਂ ਯਕੀਨੀ ਤੌਰ ’ਤੇ ਰਾਸ਼ਟਰਪਤੀ ਲਈ ਕਿਸੇ ਵੀ ਚੀਜ਼ ਦਾ ਐਲਾਨ ਕਰਨ ਤੋਂ ਅੱਗੇ ਨਹੀਂ ਜਾਣਾ ਚਾਹੁੰਦਾ, ਪਰ ਮੈਨੂੰ ਯਕੀਨ ਹੈ ਕਿ ਤੁਸੀਂ ਦੋਵਾਂ (ਪੀ.ਐਮ. ਮੋਦੀ ਅਤੇ ਰਾਸ਼ਟਰਪਤੀ ਟਰੰਪ) ਨੂੰ ਮਿਲਦੇ ਦੇਖੋਗੇ।’’
ਅਧਿਕਾਰੀ ਨੇ ਕਿਹਾ, ‘‘ਉਨ੍ਹਾਂ ਦਾ ਆਪਸ ਵਿੱਚ ਬਹੁਤ, ਬਹੁਤ ਸਕਾਰਾਤਮਕ ਰਿਸ਼ਤਾ ਹੈ। ਸਾਡੇ ਕੋਲ ਇੱਕ ਕਵਾਡ ਸੰਮੇਲਨ ਹੈ, ਜਿਸ ਦੀ ਯੋਜਨਾ 'ਤੇ ਅਸੀਂ ਕੰਮ ਕਰ ਰਹੇ ਹਾਂ, ਇਸ ਲਈ ਕਿਸੇ ਸਮੇਂ ਇਹ ਹੋਵੇਗਾ, ਜੇ ਇਸ ਸਾਲ ਨਹੀਂ, ਤਾਂ ਅਗਲੇ ਸਾਲ ਦੇ ਸ਼ੁਰੂ ਵਿੱਚ ਹੋਵੇਗਾ। ਅਸੀਂ ਇਸ ਦੀਆਂ ਤਰੀਕਾਂ ’ਤੇ ਕੰਮ ਕਰ ਰਹੇ ਹਾਂ।’’ ਚੱਲ ਰਹੇ ਅਮਰੀਕਾ-ਭਾਰਤ ਸੰਪਰਕਾਂ ਨੂੰ "ਬਹੁਤ ਹੀ ਲਾਭਕਾਰੀ" ਦੱਸਦਿਆਂ, ਅਧਿਕਾਰੀ ਨੇ ਕਿਹਾ ਕਿ ਆਉਣ ਵਾਲੇ ਮਹੀਨਿਆਂ ਵਿੱਚ "ਨਿਰੰਤਰ ਸਕਾਰਾਤਮਕ ਵਿਕਾਸ" ਦੀ ਉਮੀਦ ਹੈ।