ਮੰਡੀ ਗੋਬਿੰਦਗੜ੍ਹ, 13 ਨਵੰਬਰ - ਦੇਸ਼ ਭਗਤ ਆਯੁਰਵੈਦਿਕ ਕਾਲਜ ਅਤੇ ਹਸਪਤਾਲ ਵੱਲੋਂ ਆਯੁਰਵੈਦ ਦੀ ਹਰ ਖੇਤਰ ਵਿੱਚ ਪ੍ਰਵਾਨਤਾ ਨੂੰ ਵਧਾਉਣ ਲਈ ਪੰਜ ਰੋਜ਼ਾ ਮੈਡੀਕਲ ਕੈਂਪ, ਸਕੂਲ ਹੈਲਥ ਚੈਕਅੱਪ, ਜਾਗਰੂਕਤਾ ਭਾਸ਼ਣ ਅਤੇ ਹੋਰ ਗਤੀਵਿਧੀਆਂ ਕਰਵਾਈਆਂ ਗਈਆਂ। ਇਹ ਗਤੀਵਿਧੀਆਂ ਦੇਸ਼ ਭਗਤ ਆਯੁਰਵੈਦਿਕ ਹਸਪਤਾਲ ਅਤੇ ਨੇੜਲੇ ਖੇਤਰ ਦੇ ਪਿੰਡਾਂ, ਸਕੂਲਾਂ ਅਤੇ ਮਸਜਿਦਾਂ ਵਿੱਚ ਵਿਸ਼ੇਸ਼ ਮਾਹਿਰ ਸਲਾਹਕਾਰਾਂ ਦੀ ਟੀਮ ਦੁਆਰਾ ਕੀਤੀਆਂ ਗਈਆਂ| ਜਿਸ ਵਿੱਚ ਡਾ. ਪ੍ਰਾਚੀ ਸ਼ਰਮਾ (ਬਾਲ ਰੋਗ ਮਾਹਿਰ), ਡਾ. ਸਨਾਮਿਕਾ (ਕੰਨ  ਅਤੇ ਅੱਖਾਂ ਦੇ ਮਾਹਿਰ), ਡਾ. ਈਸ਼ੂ ਅਤੇ ਡਾ. ਜਸਪ੍ਰੀਤ (ਫਿਜ਼ਿਓਥੈਰੇਪਿਸਟ), ਡਾ. ਅਨਿਲ ਜੋਸ਼ੀ (ਲਾਈਫ ਸਟਾਈਲ ਡਿਸਆਰਡਰ ਕੋਚ), ਡਾ. ਪੂਨਮ (ਸਰਜਨ), ਡਾ: ਦਰਸ਼ਨਾ (ਮੈਡੀਕਲ ਸਪੈਸ਼ਲਿਸਟ), ਡਾ: ਸੁਰਿੰਦਰ (ਐਕਯੂਪੰਕਚਰ ਸਪੈਸ਼ਲਿਸਟ) ਅਤੇ ਮੈਡੀਕਲ ਅਫ਼ਸਰ ਸ਼ਾਮਲ ਸਨ। 
ਇਹ ਜਾਗਰੂਕਤਾ ਸਿਹਤ ਜਾਂਚ ਕੈਂਪ ਡਾ.ਕੁਲਭੂਸ਼ਨ (ਡਾਇਰੈਕਟਰ ਡੀ.ਬੀ.ਏ.ਸੀ. ਐਂਡ ਐਚ), ਡਾ. ਸਮਿਤਾ ਜੌਹਰ (ਪ੍ਰਿੰਸੀਪਲ), ਡਾ. ਜੋਤੀ ਐਚ ਧਾਮੀ (ਮੈਡੀਕਲ ਸੁਪਰਡੈਂਟ) ਦੀ ਅਗਵਾਈ ਹੇਠ ਲਗਾਇਆ ਗਿਆ। ਕੈਂਪ  ਦੌਰਾਨ ਦੇਸ਼ ਭਗਤ ਗਲੋਬਲ ਸਕੂਲ ਅਤੇ ਨਨਕਾਣਾ ਸਾਹਿਬ ਪਬਲਿਕ ਸਕੂਲ ਬਡਾਲੀ ਵਿੱਚ ਬੱਚਿਆਂ ਦੀ ਜਨਰਲ ਹੈਲਥ ਚੈਕਅਪ, ਅੱਖਾਂ/ਈਐਨਟੀ ਚੈਕਅੱਪ, ਆਮ ਸਿਹਤ ਜਾਗਰੂਕਤਾ ਸਬੰਧੀ ਗੱਲਬਾਤ ਕੀਤੀ ਗਈ। ਪਿੰਡ ਅੰਨੀਆ ਵਿੱਚ  ਮਨਰੇਗਾ ਵਰਕਰਾਂ ਜੋੜਾਂ ਦੀਆਂ ਬਿਮਾਰੀਆਂ ਸਬੰਧੀ ਜਨਰਲ ਜਾਂਚ ਕੀਤੀ ਗਈ। ਪਿੰਡ ਸੌਂਟੀ ਦੀ ਮਸਜਿਦ ਵਿੱਚ ਡਾਕਟਰਾਂ ਨੇ ਸਿਹਤ ਬਾਰੇ ਜਾਗਰੂਕਤਾ ਕੀਤਾ। 
ਇਸ ਮੌਕੇ ਡਾ: ਜ਼ੋਰਾ ਸਿੰਘ ਚਾਂਸਲਰ ਨੇ ਕਿਹਾ ਕਿ ਦੇਸ਼ ਭਗਤ ਯੂਨੀਵਰਸਿਟੀ ਨੇ ਇੱਕ ਸਮਾਜ ਸੇਵੀ ਸੰਸਥਾ ਹੋਣ ਦੇ ਨਾਤੇ ਸਿਹਤ ਜਾਗਰੂਕਤਾ ਗਤੀਵਿਧੀਆਂ, ਭਾਸ਼ਣ ਅਤੇ ਸਕੂਲੀ ਵਿਦਿਆਰਥੀਆਂ ਦਾ ਮੁਫ਼ਤ ਮੈਡੀਕਲ ਚੈਕਅੱਪ ਕਰਵਾ ਕੇ ਇੱਕ ਪਹਿਲਕਦਮੀ ਕੀਤੀ ਹੈ। ਗਤੀਵਿਧੀਆਂ ਦਾ ਮੁੱਖ ਉਦੇਸ਼ ਇਹ ਯਕੀਨੀ ਬਣਾਉਣਾ ਸੀ ਕਿ ਲੋਕ ਸਹੀ ਸਮੇਂ 'ਤੇ ਸਿਹਤ ਸਹੂਲਤ ਪ੍ਰਾਪਤ ਕਰ ਸਕਣ ਅਤੇ ਛੋਟੀ ਜਿਹੀ ਸਿਹਤ ਸਮੱਸਿਆ ਦੇ ਗੰਭੀਰ ਹੋਣ ਤੋਂ ਪਹਿਲਾਂ ਡਾਕਟਰ ਦੀ ਸਲਾਹ ਲੈਣ। 
ਉਨ੍ਹਾਂ ਨੇ ਇਸ ਸ਼ਾਨਦਾਰ ਉਪਰਾਲੇ ਲਈ ਟੀਮ ਨੂੰ ਵਧਾਈ ਦਿੱਤੀ ਅਤੇ ਭਵਿੱਖ ਵਿੱਚ ਵੀ ਅਜਿਹੇ ਜਾਗਰੂਕਤਾ ਕੈਂਪ ਨੂੰ ਜਾਰੀ ਰੱਖਣ ਲਈ ਆਪਣਾ ਪੂਰਾ ਸਹਿਯੋਗ ਦੇਣ ਦਾ ਵਾਅਦਾ ਕੀਤਾ।