ਲੁਧਿਆਣਾ 02 ਫਰਵਰੀ 2024:- ਗੁਰੂ ਅੰਗਦ ਦੇਵ ਵੈਟਨਰੀ ਅਤੇ ਐਨੀਮਲ ਸਾਇੰਸਜ਼ ਯੂਨੀਵਰਸਿਟੀ, ਲੁਧਿਆਣਾ ਦੇ ਵੈਟਨਰੀ ਪਸ਼ੂ ਹਸਪਤਾਲ ਵਿਖੇ ਅਤਿ-ਆਧੁਨਿਕ ਨਵੀਂ ਅਲਟ੍ਰਾਸਾਊਂਡ ਇਕਾਈ ਦਾ ਉਦਘਾਟਨ ਕੀਤਾ ਗਿਆ। ਇਸ ਅਲਟ੍ਰਾਸਾਊਂਡ ਇਕਾਈ ਨਾਲ ਜਿਥੇ ਪਸ਼ੂ ਬਿਮਾਰੀਆਂ ਦੇ ਨਿਰੀਖਣ ਵਿਚ ਤੇਜ਼ੀ ਅਤੇ ਪੁਖ਼ਤਗੀ ਆਏਗੀ ਉਥੇ ਇਲਾਜ ਵਿਚ ਵੀ ਬਿਹਤਰੀ ਹੋਵੇਗੀ।
ਡਾ. ਇੰਦਰਜੀਤ ਸਿੰਘ, ਉਪ-ਕੁਲਪਤੀ ਨੇ ਡਾ. ਸਰਵਪ੍ਰੀਤ ਸਿੰਘ ਘੁੰਮਣ, ਡੀਨ, ਵੈਟਨਰੀ ਸਾਇੰਸ ਕਾਲਜ, ਅਧਿਆਪਕਾਂ ਅਤੇ ਵਿਦਿਆਰਥੀਆਂ ਦੀ ਮੌਜੂਦਗੀ ਵਿਚ ਇਸ ਇਕਾਈ ਦਾ ਉਦਘਾਟਨ ਕੀਤਾ। ਡਾ. ਇੰਦਰਜੀਤ ਸਿੰਘ ਨੇ ਕਿਹਾ ਕਿ ਇਸ ਨਾਲ ਸਾਡੇ ਪਸ਼ੂ ਹਸਪਤਾਲ ਦੀਆਂ ਸੇਵਾਵਾਂ ਹੋਰ ਸੁਦ੍ਰਿੜ ਹੋਣਗੀਆਂ। ਉਨ੍ਹਾਂ ਕਿਹਾ ਕਿ ਨਵੀਆਂ ਤਕਨਾਲੋਜੀਆਂ ਅਤੇ ਮਸ਼ੀਨਾਂ ਨਾਲ ਅਸੀਂ ਪਸ਼ੂ ਇਲਾਜ ਦੇ ਖੇਤਰ ਵਿਚ ਬਹੁਤ ਜ਼ਿਕਰਯੋਗ ਕਾਰਗੁਜ਼ਾਰੀ ਦਰਜ ਕਰ ਰਹੇ ਹਾਂ ਜਿਸ ਨਾਲ ਕਿ ਮਰੀਜ਼ਾਂ ਨੂੰ ਵੱਡੇ ਪੱਧਰ ’ਤੇ ਰਾਹਤ ਮਿਲਦੀ ਹੈ।
ਡਾ. ਘੁੰਮਣ ਨੇ ਕਿਹਾ ਕਿ ਬਿਮਾਰੀ ਦੀ ਪਛਾਣ ਸੰਬੰਧੀ ਇਹ ਇਕਾਈ ਇਕ ਨਵੀਂ ਤੇ ਵੱਖਰੀ ਭੂਮਿਕਾ ਨਿਭਾਏਗੀ। ਡਾ. ਸਵਰਨ ਸਿੰਘ ਰੰਧਾਵਾ, ਨਿਰਦੇਸ਼ਕ ਵੈਟਨਰੀ ਪਸ਼ੂ ਹਸਪਤਾਲ ਨੇ ਕਿਹਾ ਕਿ ਪਸ਼ੂਆਂ ਨੂੰ ਸੁਚੱਜਾ ਇਲਾਜ ਦੇਣਾ ਸਾਡਾ ਪਹਿਲਾ ਟੀਚਾ ਹੈ। ਅਸੀਂ ਪਸ਼ੂ ਇਲਾਜ ਦੇ ਉੱਚੇ ਮਾਪਦੰਡ ਰੱਖਣ ਵਾਸਤੇ ਸਦਾ ਯਤਨਸ਼ੀਲ ਰਹਿੰਦੇ ਹਾਂ। ਉਨ੍ਹਾਂ ਇਹ ਵੀ ਜਾਣਕਾਰੀ ਦਿੱਤੀ ਕਿ ਇਸ ਅਲਟ੍ਰਾਸਾਊਂਡ ਇਕਾਈ ਨਾਲ 55 ਇੰਚ ਦੀ ਐਲ ਈ ਡੀ ਸਕਰੀਨ ਵੀ ਜੋੜੀ ਗਈ ਹੈ ਜਿਸ ਨਾਲ ਕਿ ਵਿਦਿਆਰਥੀਆਂ ਦੇ ਵੱਡੇ ਸਮੂਹ ਨੂੰ ਅਤੇ ਸਪੱਸ਼ਟ ਰੂਪ ਵਿਚ ਅਲਟ੍ਰਾਸਾਊਂਡ ਚਿੱਤਰ ਦਿਖ ਸਕੇ।
ਇਸ ਇਕਾਈ ਦੀ ਸਥਾਪਨਾ ਵਿਚ ਮਹੱਤਵਪੂਰਨ ਯੋਗਦਾਨ ਪਾਉਣ ਵਾਲੇ ਡਾ. ਰਣਧੀਰ ਸਿੰਘ ਅਤੇ ਡਾ. ਰਾਜਸੁਖਬੀਰ ਸਿੰਘ ਨੇ ਦੱਸਿਆ ਕਿ ਅਸੀਂ ਇਸ ਇਕਾਈ ਨਾਲ ਇਲਾਜ ਵਿਚ ਆਉਣ ਵਾਲੀ ਬਿਹਤਰੀ ਤੋਂ ਬਹੁਤ ਪ੍ਰਸੰਨ ਹਾਂ। ਇਸ ਨਾਲ ਜਿਥੇ ਪਸ਼ੂਆਂ ਦੀ ਚੀਰ-ਫਾੜ ਘਟੇਗੀ ਉਥੇ ਉਨ੍ਹਾਂ ਦਾ ਇਲਾਜ ਵੀ ਘੱਟ ਤਕਲੀਫ ਵਾਲਾ ਅਤੇ ਸੌਖਾ ਹੋ ਜਾਵੇਗਾ।