ਪਟਿਆਲਾ, 5 ਜੂਨ – ਵਿਸ਼ਵਕਰਮਾ ਮੰਦਿਰ ਲਹੌਰੀ ਗੇਟ ਪਟਿਆਲਾ ਰਜਿ. ਨੰ. 1429 ਦੇ ਪ੍ਰਬੰਧਨ ਨੂੰ ਲੈ ਕੇ ਸਥਿਤੀ ਤਣਾਅਪੂਰਨ ਹੋ ਗਈ ਹੈ। ਪਿਛਲੇ 55 ਸਾਲਾਂ ਤੋਂ ਵਿਸ਼ਵਕਰਮਾ ਵੰਸੀਆਂ ਵਲੋਂ ਚੱਲ ਰਹੇ ਇਸ ਇਤਿਹਾਸਕ ਮੰਦਿਰ ਦੀ ਸ਼ੁਰੂਆਤ ਭਗਤੀਆਂ ਅਤੇ ਸੇਵਕਾਂ ਨੇ ਕੀਤੀ ਸੀ। ਮੰਦਿਰ ਅਜਿਹੀ ਸਥਿਤੀ ‘ਚ ਪਹੁੰਚ ਗਿਆ ਹੈ ਜਿੱਥੇ ਬੈਂਕ ਵਿੱਚ ਵਾਧੂ ਬੈਲੇਂਸ ਹੈ ਅਤੇ 2 ਏਕੜ ਜ਼ਮੀਨ ਮੌਜੂਦ ਹੈ ਜੋ ਸਰਕਾਰੀ ਗ੍ਰਾਂਟਾਂ ਅਤੇ ਭਗਤਾਂ ਦੇ ਯੋਗਦਾਨ ਨਾਲ ਖਰੀਦੀ ਗਈ।
ਇਹ ਸੰਪਤੀ ਹੁਣ ਮੰਦਿਰ ਦੀ ਮਲਕੀਅਤ ਹੈ, ਪਰ ਕੁਝ ਸਾਲਾਂ ਤੋਂ ਕੁਝ ਮੈਂਬਰਾਂ ਨੇ ਆਪਣੇ ਨਿੱਜੀ ਹਿੱਤਾਂ ਲਈ ਵਿਸ਼ਵਕਰਮਾ ਟਰੱਸਟ ਬਣਾਇਆ ਅਤੇ ਆਪਣੀ ਮਰਜ਼ੀ ਨਾਲ ਟਰੱਸਟੀ ਨਿਯੁਕਤ ਕਰ ਲਏ। ਇਨ੍ਹਾਂ ਵਲੋਂ ਸ਼ੁਰੂ ਤੋਂ ਹੀ ਗਲਤ ਫੈਸਲੇ ਲਏ ਜਾਂਦੇ ਰਹੇ। ਮਿਤੀ 15-05-2025 ਨੂੰ ਮੌਜੂਦਾ ਪ੍ਰਧਾਨ ਸੁਰਜੀਤ ਸਿੰਘ ਮਹਿਲ ਨੂੰ ਟਰੱਸਟੀਆਂ ਵਲੋਂ ਨਾ ਸਹਿਯੋਗ ਦੇਣ ਦੇ ਆਰੋਪ ਲਾ ਕੇ ਹਟਾ ਦਿੱਤਾ ਗਿਆ, ਜਿਸ ਦਾ ਵਿਸ਼ਵਕਰਮਾ ਭਾਈਚਾਰੇ ਨੇ ਸਖ਼ਤ ਵਿਰੋਧ ਕੀਤਾ।
ਇਸ ਸੰਬੰਧੀ ਮਿਤੀ 01-06-2025 ਐਤਵਾਰ ਨੂੰ ਜਨਰਲ ਮੀਟਿੰਗ ਬੁਲਾਈ ਗਈ ਸੀ ਪਰ ਮੰਦਿਰ ਵਿੱਚ ਦੂਜੀ ਧਿਰ ਵਲੋਂ ਵੱਡੀ ਗਿਣਤੀ ਵਿੱਚ ਪੁਲਿਸ ਬੁਲਾ ਲਈ ਗਈ। ਪੁਲਿਸ ਨੇ ਨਾ ਸਿਰਫ਼ ਮੀਟਿੰਗ ਰੋਕੀ, ਸਗੋਂ ਬਾਹਰੋਂ ਆਉਣ ਵਾਲੇ ਮੈਂਬਰਾਂ ਨੂੰ ਮੰਦਰ ਵਿੱਚ ਦਾਖਲ ਹੋਣ ਤੋਂ ਵੀ ਰੋਕ ਦਿੱਤਾ। ਇਸ ਦੇ ਵਿਰੋਧ ਵਿੱਚ ਸਮੂਹ ਮੈਂਬਰਾਂ ਨੇ ਮੰਦਰ ਵਿੱਚ ਹੀ ਰੋਸ ਰੂਪ ਵਿੱਚ ਮੀਟਿੰਗ ਕੀਤੀ।
ਮੀਟਿੰਗ ਵਿੱਚ ਸਰਵਸੰਮਤੀ ਨਾਲ ਮੌਜੂਦਾ ਰਜਿਸਟ੍ਰੇਸ਼ਨ ਨੰਬਰ 1429 ਅਨੁਸਾਰ ਭਗਵਾਨ ਵਿਸ਼ਵਕਰਮਾ ਮੰਦਿਰ ਕਮੇਟੀ ਲਹੌਰੀ ਗੇਟ ਪਟਿਆਲਾ ਨੂੰ ਮੁੜ ਇੱਕਟ੍ਰਿਤ ਕਰਕੇ ਸੁਰਜੀਤ ਸਿੰਘ ਮਹਿਲ ਨੂੰ ਪ੍ਰਧਾਨ ਨਿਯੁਕਤ ਕੀਤਾ ਗਿਆ। ਸਮੂਹ ਮੈਂਬਰਾਂ ਨੇ ਹੱਥ ਖੜੇ ਕਰਕੇ ਸਮਰਥਨ ਦਿੱਤਾ। ਇਸ ਨਾਲ ਹੀ ਕੋਰਮ ਪੂਰਾ ਕਰਨ ਲਈ ਉਨ੍ਹਾਂ ਨੂੰ ਟੀਮ ਚੁਣਨ ਦੇ ਅਧਿਕਾਰ ਵੀ ਦਿੱਤੇ ਗਏ।
ਮੌਜੂਦਾ ਤਣਾਅਪੂਰਨ ਹਾਲਾਤਾਂ ਅਤੇ ਟਕਰਾਅ ਨੂੰ ਦੇਖਦਿਆਂ ਸਮੂਹ ਮੈਂਬਰਾਂ ਨੇ ਸਰਕਾਰ ਨੂੰ ਅਪੀਲ ਕੀਤੀ ਹੈ ਕਿ ਮੰਦਿਰ ਦਾ ਪ੍ਰਬੰਧ ਧਰਮ ਅਰਥ ਬੋਰਡ ਦੇ ਅਧੀਨ ਕਰਕੇ ਨਵਾਂ ਪ੍ਰਬੰਧਕ ਲਗਾਇਆ ਜਾਵੇ ਤਾਂ ਜੋ ਕਿਸੇ ਵੀ ਹੋਰ ਤਣਾਅ ਜਾਂ ਮਾਲੀ ਜਾਨੀ ਨੁਕਸਾਨ ਤੋਂ ਬਚਿਆ ਜਾ ਸਕੇ।