ਐਸ ਏ ਐਸ ਨਗਰ, 1 ਮਾਰਚ - ਨਗਰ ਨਿਗਮ ਦੀ ਅੱਜ ਹੋਈ ਬਜਟ ਮੀਟਿੰਗ ਦੌਰਾਨ ਨਗਰ ਨਿਗਮ ਦੀ ਇਸ਼ਤਿਹਾਰਬਾਜੀ ਦੇ ਟੈਂਡਰ ਨਾ ਕੀਤੇ ਜਾਣ ਅਤੇ ਇਸ਼ਤਿਹਾਰਬਾਜੀ ਦੀ ਆਮਦਨ ਘੱਟ ਹੋਣ ਦੀ ਵਿਜੀਲੈਂਸ ਜਾਂਚ ਕਰਵਾਉਣ ਦਾ ਮਤਾ ਹਾਊਸ ਵਲੋਂ ਪ੍ਰਵਾਨ ਕਰ ਲਿਆ ਗਿਆ। ਮੀਟਿੰਗ ਦੌਰਾਨ ਸਾਬਕਾ ਡਿਪਟੀ ਮੇਅਰ ਸz. ਮਨਜੀਤ ਸਿੰਘ ਸੇਠੀ ਵਲੋਂ ਇਹ ਮੁੱਦਾ ਚੁੱਕਦਿਆਂ ਨਗਰ ਨਿਗਮ ਦੀ ਅਫਸਰਸ਼ਾਹੀ ਤੇ ਇਲਜਾਮ ਲਗਾਇਆ ਗਿਆ ਕਿ ਨਿੱਜੀ ਫਾਇਦੇ ਲਈ ਇਹ ਟੈਂਡਰ ਰੋਕੇ ਗਏ ਅਤੇ 31 ਕਰੋੜ ਦੇ ਟੀਚੇ ਦੀ ਥਾਂ ਸਿਰਫ 4 ਕਰੋੜ 22 ਲੱਖ ਦੀ ਆਮਦਨ ਹੋਈ ਅਤੇ ਯੂਨੀਪੋਲਾਂ ਦੀ ਕਮਾਈ ਵਿੱਚ ਭ੍ਰਿਸ਼ਟਾਚਾਰ ਹੋਇਆ ਜਿਸਦੀ ਵਿਜੀਲੈਂਸ ਜਾਂਚ ਕਰਵਾਈ ਜਾਵੇ। ਇਸ ਮੌਕੇ ਹਾਊਸ ਵਲੋਂ ਇਸ ਮਤੇ ਨੂੰ ਪ੍ਰਵਾਨਗੀ ਦੇ ਦਿੱਤੀ ਗਈ। ਮੀਟਿੰਗ ਦੀ ਪ੍ਰਧਾਨਗੀ ਮੇਅਰ ਸz. ਅਮਰਜੀਤ ਸਿੰਘ ਜੀਤੀ ਸਿੱਧੂ ਨੇ ਕੀਤੀ।

ਇਸਤੋਂ ਪਹਿਲਾਂ ਬਜਟ ਮੀਟਿੰਗ ਦੌਰਾਨ ਇਸ਼ਤਿਹਾਰਬਾਜੀ ਤੋਂ ਹੋਣ ਵਾਲੀ ਆਮਦਨ ਨੂੰ 12 ਕਰੋੜ ਤੋਂ ਵਧਾ ਕੇ 15 ਕਰੋੜ ਕਰਨ ਅਤੇ ਬਿਜਲੀ ਬੋਰਡ ਤੋਂ ਹੋਣ ਵਾਲੀ ਆਮਦਨ ਨੂੰ 5 ਕਰੋੜ ਵਧਾਉਣ ਤੋਂ ਇਲਾਵਾ ਹੋਰ ਮਦਾਂ ਵਿੱਚ ਵੀ ਕੁੱਝ ਰਕਮ ਵਿੱਚ ਵਾਧੇ ਨੂੰ ਪ੍ਰਵਾਨਗੀ ਦਿੱਤੀ ਗਈ ਜਿਸਤੋਂ ਬਾਅਦ ਬਜਟ ਪਾਸ ਕਰ ਦਿੱਤਾ ਗਿਆ।

ਬਜਟ ਮੀਟਿੰਗ ਦੇ ਨਾਲ ਨਿਗਮ ਦੀ ਮਹੀਨਾਵਾਰ ਮੀਟਿੰਗ ਵੀ ਕੀਤੀ ਗਈ ਜਿਸ ਦੌਰਾਨ ਵੱਖ ਵੱਖ ਮੈਂਬਰਾਂ ਵਲੋਂ ਆਪੋ ਆਪਣੇ ਵਾਰਡਾਂ ਦੇ ਮਸਲੇ ਵੀ ਚੁੱਕੇ ਗਏ। ਇਸ ਮੌਕੇ ਸਾਬਕਾ ਸੀਨੀਅਰ ਡਿਪਟੀ ਮੇਅਰ ਸ੍ਰੀ ਰਿਸ਼ਵ ਜੈਨ ਵਲੋਂ ਫੇਜ਼ 11 ਵਿੱਚ ਬਰਸਾਤੀ ਪਾਣੀ ਦੀ ਨਿਕਾਸੀ ਠੀਕ ਢੰਗ ਨਾਲ ਨਾ ਹੋਣ ਦਾ ਮੁੱਦਾ ਚੁੱਕਿਆ। ਇਸ ਮੌਕੇ ਮੇਅਰ ਨੇ ਦੱਸਿਆ ਕਿ ਫੇਜ਼ 11 ਦੇ ਬਰਸਾਤੀ ਪਾਣੀ ਦੀ ਨਿਕਾਸੀ ਕਰਵਾਉਣ ਲਈ ਨਵੀਆਂ ਪਾਈਪਾਂ ਪਾਉਣ ਲਈ 2 ਕਰੋੜ 5 ਲੱਖ ਦਾ ਮਤਾ ਪਾਸ ਕੀਤਾ ਗਿਆ ਹੈ ਅਤੇ ਇਸ ਵਾਸਤੇ ਜਨ ਸਿਹਤ ਵਿਭਾਗ ਨੂੰ 1 ਕਰੋੜ ਰੁਪਏ ਜਾਰੀ ਕਰ ਦਿੱਤੇ ਗਏ ਹਨ ਜਿਸਦਾ ਕੰਮ ਛੇਤੀ ਹੀ ਆਰੰਭ ਹੋ ਜਾਵੇਗਾ।

ਇਸ ਮੌਕੇ ਸੋਹਾਣਾ ਦੇ ਕੌਂਸਲਰ ਸz. ਹਰਜੀਤ ਬੈਦਵਾਨ ਭੋਲੂ ਨੇ ਸੈਕਟਰ 78 ਵਿੱਚ ਬਣਾਈ ਜਾ ਰਹੀ ਵੈਂਡਿਗ ਜੋਨ ਦਾ ਮੁੱਦਾ ਚੁੱਕਦਿਆਂ ਕਿਹਾ ਜਿਸ ਥਾਂ ਤੇ ਇਹ ਵੈਂਡਿੰਗ ਜੋਨ ਬਣਾਈ ਜਾ ਰਹੀ ਹੈ ਉੱਥੇ ਪਾਰਕਿੰਗ ਦਾ ਬਿਲਕੁਲ ਵੀ ਪ੍ਰਬੰਧ ਨਹੀਂ ਹੈ। ਉਹਨਾਂ ਕਿਹਾ ਕਿ ਇਸ ਥਾਂ ਤੇ ਗੁਰਦੁਆਰਾ ਸਿੰਘ ਸ਼ਹੀਦਾਂ ਜਾਣ ਵਾਲੇ ਸ਼ਰਧਾਲੂ ਲੰਘਦੇ ਹਨ ਅਤੇ ਜੇਕਰ ਇੱਥੇ ਵੈਡਿੰਗ ਜੋਨ ਦੀ ਉਸਾਰੀ ਕੀਤੀ ਗਈ ਤਾਂ ਉਹ ਵਸਨੀਕਾਂ ਨੂੰ ਨਾਲ ਲੈ ਕੇ ਇਸਦਾ ਪੁਰਜੋਰ ਵਿਰੋਧ ਕਰਣਗੇੇ।

ਮੀਟਿੰਗ ਦੌਰਾਨ ਸੈਕਟਰ 69 ਦੀ ਕੌਂਸਲਰ ਕੁਲਦੀਪ ਕੌਰ ਧਨੋਆ ਵਲੋਂ ਸੈਕਟਰ 69 ਦੀ ਡਿਸਪੈਂਸਰੀ ਦੀ ਇਮਾਰਤ ਦੀ ਉਸਾਰੀ ਦਾ ਕੰਮ ਮੁਕੰਮਲ ਕਰਵਾਉਣ ਅਤੇ ਉਸ ਸਮੇਂ ਤਕ ਇਸਦੀ ਸਫਾਈ ਕਰਵਾਉਣ ਦੀ ਮੰਗ ਕੀਤੀ ਗਈ। ਉਹਨਾਂ ਕਿਹਾ ਕਿ ਇੱਥੇ ਝਾੜੀਆਂ ਖੜ੍ਹੀਆਂ ਹਨ ਅਤੇ ਇਹ ਥਾਂ ਸਮਾਜ ਵਿਰੋਧੀ ਅਨਸਰਾਂ ਦਾ ਡੇਰਾ ਬਣ ਗਈ ਹੈ। ਮੀਟਿੰਗ ਦੌਰਾਨ ਹੋਰਨਾਂ ਮੈਂਬਰਾਂ ਵਲੋਂ ਵੀ ਸਫਾਈ ਵਿਵਸਥਾ ਦੀ ਬਦਾਹਾਲੀ ਦਾ ਮੁੱਦਾ ਚੁੱਕਿਆ ਗਿਆ।

ਸ਼ਹਿਰ ਦੀਆਂ ਸੜਕਾਂ ਨੂੰ ਪੰਜ ਪਿਆਰਿਆਂ ਦੇ ਨਾਮ ਤੇ ਰੱਖਣ ਦੇ ਮਤੇ ਤੇ ਸz. ਮਨਜੀਤ ਸਿੰਘ ਸੇਠੀ ਨੇ ਕਿਹਾ ਕਿ ਇਹ ਧਾਰਮਿਕ ਮਸਲਾ ਹੈ ਅਤੇ ਇਸ ਮਤੇ ਨੂੰ ਪਹਿਲਾਂ ਸ਼੍ਰੋਮਣੀ ਕਮੇਟੀ ਨੂੰ ਭੇਜ ਕੇ ਪ੍ਰਵਾਨਗੀ ਲੈਣੀ ਚਾਹੀਦੀ ਹੈ ਤਾਂ ਜੋ ਬਾਅਦ ਵਿੱਚ ਕੋਈ ਇਤਰਾਜ ਨਾ ਹੋਵੇ। ਮੀਟਿੰਗ ਵਿੱਚ ਪੇਸ਼ ਬਾਕੀ ਸਾਰੇ ਮਤੇ ਪਾਸ ਕਰ ਦਿੱਤੇ ਗਏ।

ਮੀਟਿੰਗ ਦੌਰਾਨ ਕੌਂਸਲਰ ਦਵਿੰਦਰ ਕੌਰ ਵਾਲੀਆ ਦੇ ਮਾਤਾ ਅਤੇ ਕੌਂਸਲਰ ਮੀਨਾ ਕੌਂਡਲ ਦੀ ਸੱਸ ਦੇ ਅਕਾਲ ਚਲਾਣੇ ਤੇ ਹਾਊਸ ਵੱਲੋਂ 2 ਮਿੰਟ ਦਾ ਮੌਨ ਰੱਖ ਕੇ ਵਿਛੜੀਆਂ ਰੂਹਾਂ ਨੂੰ ਸ਼ਰਧਾਂਜਲੀ ਭੇਂਟ ਕੀਤੀ ਗਈ।