ਹਰੋਲੀ/ਊਨਾ, 6 ਜੂਨ (ਰਾਜਵੀਰ ਚੋਪੜਾ):- ਜਨਗਣਨਾ 2026 ਦੇ ਪਹਿਲੇ ਪੜਾਅ ਹਾਊਸ ਲਿਸਟਿੰਗ ਆਪਰੇਸ਼ਨ (HLO) ਦੇ ਸਫਲ ਸੰਚਾਲਨ ਲਈ ਨਗਰ ਪੰਚਾਇਤ ਟਾਹਲੀਵਾਲ ਦਫ਼ਤਰ ਵਿੱਚ ਆਯੋਜਿਤ ਤਿੰਨ ਦਿਨਾਂ ਟ੍ਰੇਨਿੰਗ ਪ੍ਰੋਗਰਾਮ ਸ਼ਨੀਵਾਰ ਨੂੰ ਸਫਲਤਾਪੂਰਵਕ ਸੰਪੰਨ ਹੋ ਗਿਆ। ਇਸ ਟ੍ਰੇਨਿੰਗ ਦੌਰਾਨ ਹਾਰੋਲੀ ਵਿਧਾਨ ਸਭਾ ਖੇਤਰ ਦੇ ਪ੍ਰਗਣਕਾਂ ਅਤੇ ਸੁਪਰਵਾਈਜ਼ਰਾਂ ਨੂੰ ਜਨਗਣਨਾ ਨਾਲ ਸਬੰਧਿਤ ਵੱਖ-ਵੱਖ ਪੱਖਾਂ ਬਾਰੇ ਵਿਸਥਾਰਪੂਰਵਕ ਜਾਣਕਾਰੀ ਦਿੱਤੀ ਗਈ।
ਟ੍ਰੇਨਿੰਗ ਦੌਰਾਨ ਲਲਿਤ ਮੋਹਨ ਨੇ ਦੱਸਿਆ ਕਿ ਭਾਰਤ ਸਰਕਾਰ ਵੱਲੋਂ ਜਨਗਣਨਾ 2026 ਦੇ ਸਫਲ ਆਯੋਜਨ ਲਈ ਵੱਖ-ਵੱਖ ਥਾਵਾਂ 'ਤੇ ਅਧਿਆਪਕਾਂ ਅਤੇ ਨਿਯੁਕਤ ਕਰਮਚਾਰੀਆਂ ਨੂੰ ਸਿਖਲਾਈ ਦਿੱਤੀ ਜਾ ਰਹੀ ਹੈ। ਹਰੋਲੀ ਵਿਧਾਨ ਸਭਾ ਖੇਤਰ ਲਈ ਕੁੱਲ ਤਿੰਨ ਬੈਚ ਬਣਾਏ ਗਏ ਹਨ, ਜਿਨ੍ਹਾਂ ਵਿੱਚ 116 ਪ੍ਰਗਣਕਾਂ ਅਤੇ ਸੁਪਰਵਾਈਜ਼ਰਾਂ ਦੀ ਨਿਯੁਕਤੀ ਕੀਤੀ ਗਈ ਹੈ। ਇਨ੍ਹਾਂ ਵਿੱਚੋਂ ਦੋ ਬੈਚਾਂ ਦੀ ਟ੍ਰੇਨਿੰਗ ਸ਼ਨੀਵਾਰ ਨੂੰ ਪੂਰੀ ਹੋ ਗਈ, ਜਦਕਿ ਤੀਜੇ ਬੈਚ ਦੀ ਟ੍ਰੇਨਿੰਗ 8 ਤੋਂ 10 ਜੂਨ ਤੱਕ ਹਾਰੋਲੀ ਵਿੱਚ ਕਰਵਾਈ ਜਾਵੇਗੀ।
ਉਨ੍ਹਾਂ ਦੱਸਿਆ ਕਿ ਟ੍ਰੇਨਿੰਗ ਦੇ ਪਹਿਲੇ ਦਿਨ ਭਾਗੀਦਾਰਾਂ ਨੂੰ ਖੇਤਰ ਦੀਆਂ ਹੱਦਾਂ (ਬਾਊਂਡਰੀ) ਨਿਰਧਾਰਤ ਕਰਨ ਦੀ ਪ੍ਰਕਿਰਿਆ ਸਮਝਾਈ ਗਈ। ਦੂਜੇ ਦਿਨ ਜਨਗਣਨਾ ਦੌਰਾਨ ਪੁੱਛੇ ਜਾਣ ਵਾਲੇ 34 ਪ੍ਰਸ਼ਨਾਂ ਬਾਰੇ ਵਿਸਥਾਰ ਨਾਲ ਜਾਣਕਾਰੀ ਦਿੱਤੀ ਗਈ, ਜਦਕਿ ਆਖਰੀ ਦਿਨ ਭਾਗੀਦਾਰਾਂ ਨੂੰ HLO ਐਪ ਦੀ ਵਰਤੋਂ, ਡਾਟਾ ਐਂਟਰੀ ਅਤੇ ਪ੍ਰੈਕਟੀਕਲ ਅਭਿਆਸ ਕਰਵਾਇਆ ਗਿਆ।
ਟ੍ਰੇਨਿੰਗ ਪ੍ਰੋਗਰਾਮ ਵਿੱਚ ਫੀਲਡ ਟ੍ਰੇਨਰ ਪ੍ਰੀਤਪਾਲ ਸਿੰਘ, ਸੁਪਰਵਾਈਜ਼ਰ ਯਸ਼ਪਾਲ ਅਤੇ ਅਰੁਣ ਪਾਠਕ ਨੇ ਭਾਗੀਦਾਰਾਂ ਦੀ ਰਹਿਨੁਮਾਈ ਕੀਤੀ। ਕੈਂਪ ਵਿੱਚ 32 ਭਾਗੀਦਾਰਾਂ ਨੇ ਹਿੱਸਾ ਲੈ ਕੇ ਸਿਖਲਾਈ ਪ੍ਰਾਪਤ ਕੀਤੀ।
ਇਸ ਮੌਕੇ ਚਾਰਜ ਸੈਂਸਸ ਅਫ਼ਸਰ ਅਤੇ ਨਗਰ ਪੰਚਾਇਤ ਟਾਹਲੀਵਾਲ ਦੇ ਸਕੱਤਰ ਵਿਜੈ ਸਿੰਘ, ਚਾਰਜ ਸੈਂਸਸ ਕਲਰਕ ਆਕਾਸ਼ਦੀਪ ਧੀਮਾਨ, ਤਕਨੀਕੀ ਸਹਾਇਕ ਵਿਸ਼ਾਲ ਸਿੰਘ ਕੰਗ, ਸਫ਼ਾਈ ਸੁਪਰਵਾਈਜ਼ਰ ਅਮਨਦੀਪ ਸਿੰਘ, ਰਾਧਾ ਰਾਣੀ ਅਤੇ ਹੋਰ ਅਧਿਕਾਰੀ ਤੇ ਕਰਮਚਾਰੀ ਵੀ ਮੌਜੂਦ ਸਨ।
ਅਧਿਕਾਰੀਆਂ ਨੇ ਉਮੀਦ ਜਤਾਈ ਕਿ ਸਿਖਲਾਈ ਪ੍ਰਾਪਤ ਪ੍ਰਗਣਕ ਅਤੇ ਸੁਪਰਵਾਈਜ਼ਰ ਜਨਗਣਨਾ 2026 ਦੇ ਪਹਿਲੇ ਪੜਾਅ ਨੂੰ ਸਫਲਤਾਪੂਰਵਕ ਸੰਪੰਨ ਕਰਵਾਉਣ ਵਿੱਚ ਅਹਿਮ ਭੂਮਿਕਾ ਨਿਭਾਉਣਗੇ।