ਐਸ.ਏ.ਐਸ ਨਗਰ, 17 ਨਵੰਬਰ - ਚੰਡੀਗੜ੍ਹ ਗਰੁੱਪ ਆਫ਼ ਕਾਲਜਿਜ ਦੇ ਝੰਜੇੜੀ ਕੈਂਪਸ ਦੇ ਚੰਡੀਗੜ੍ਹ ਲਾਅ ਕਾਲਜ ਵੱਲੋਂ ਰੋਟਰੈਕਟ ਦੇ ਸਹਿਯੋਗ ਨਾਲ ਕੈਂਪਸ ਵਿਚ ਪਹਿਲੇ ਨੈਸ਼ਨਲ ਮੂਟ ਕੋਰਟ ਮੁਕਾਬਲਿਆਂ ਦਾ ਆਯੋਜਨ ਕੀਤਾ ਜਿਸ ਵਿੱਚ ਦੇਸ਼ ਭਰ ਦੇ 35 ਅਦਾਰਿਆਂ ਦੇ ਵਿਦਿਆਰਥੀਆਂ ਨੇ ਭਾਗ ਲਿਆ। ਇਨ੍ਹਾਂ ਮੁਕਾਬਲਿਆਂ ਵਿਚ ਭਾਗ ਲੈਣ ਵਾਲੀਆਂ ਟੀਮਾਂ ਵਿਚ ਹੈਦਰਾਬਾਦ ਅਤੇ ਪੁਣੇ ਤੋਂ ਸਿੰਬਾਇਓਸਿਸ ਲਾਅ ਸਕੂਲ, ਰਾਜਸਥਾਨ ਅਤੇ ਪੰਜਾਬ ਤੋਂ ਐਮਿਟੀ, ਬੈਂਗਲੁਰੂ ਅਤੇ ਦਿੱਲੀ ਤੋਂ ਮਸੀਹ, ਦਿੱਲੀ ਵਿਚ ਕੈਂਪਸ ਲਾਅ ਸੈਂਟਰ, ਪਟਿਆਲਾ ਵਿਚ ਰਾਜੀਵ ਗਾਂਧੀ ਨੈਸ਼ਨਲ ਯੂਨੀਵਰਸਿਟੀ ਆਫ਼ ਲਾਅ, ਅਤੇ ਪੰਜਾਬ ਯੂਨੀਵਰਸਿਟੀ, ਚੰਡੀਗੜ੍ਹ ਦੇ ਕਾਨੂੰਨ ਵਿਭਾਗ ਪ੍ਰਮੁੱਖ ਸਨ।

ਇਸ ਮੌਕੇ ਮਾਣਯੋਗ ਪੰਜਾਬ ਅਤੇ ਹਰਿਆਣਾ ਹਾਈ ਕੋਰਟ ਦੇ 35 ਉੱਘੇ ਕਾਨੂੰਨ ਮਾਹਿਰਾਂ ਨੇ ਜੱਜਾਂ ਦੀ ਭੂਮਿਕਾ ਨਿਭਾਈ। ਪ੍ਰਮੁੱਖ ਕਾਨੂੰਨੀ ਸ਼ਖ਼ਸੀਅਤ ਐਡਵੋਕੇਟ ਸੌਰਿਆ ਮਹਿਰਾ, ਐਡਵੋਕੇਟ ਤਾਰਾ ਚੰਦ, ਅਤੇ ਐਡਵੋਕੇਟ ਅਨਿਲ ਮਹਿਤਾ ਸਮੇਤ ਕਈ ਨਾਮਵਰ ਸ਼ਖ਼ਸੀਅਤਾਂ ਨੇ ਸਮਾਗਮ ਦੀ ਸ਼ੋਭਾ ਵਧਾਈ। ਇਸ ਦੌਰਾਨ ਨੌਜਵਾਨ ਵਿਦਿਆਰਥੀਆਂ ਨੇ ਆਪਣੀ ਵਕਾਲਤ ਦੀ ਪ੍ਰਤਿਭਾ, ਕਾਨੂੰਨੀ ਸੂਝਬੂਝ ਅਤੇ ਮੂਟ ਕੋਰਟ ਦੀ ਕਾਰਵਾਈ ਦੌਰਾਨ ਕੋਰਟ ਦੇ ਨਿਯਮਾਂ ਅਤੇ ਪ੍ਰੋਟੋਕਾਲ ਦਾ ਬਾਖ਼ੂਬੀ ਪ੍ਰਦਰਸ਼ਨ ਕੀਤਾ। ਇਸ ਮੁਕਾਬਲੇ ਵਿਚ ਪੰਜ ਦੌਰ ਸ਼ਾਮਲ ਕੀਤੇ ਗਏ, ਜਿਨ੍ਹਾਂ ਵਿਚ ਦੋ ਸ਼ੁਰੂਆਤੀ ਦੌਰ, ਇੱਕ ਕੁਆਰਟਰ ਫਾਈਨਲ ਰਾਊਂਡ, ਇੱਕ ਸੈਮੀਫਾਈਨਲ ਅਤੇ ਇੱਕ ਰੋਮਾਂਚਕ ਫਾਈਨਲ ਰਾਊਂਡ ਸ਼ਾਮਲ ਸਨ।

ਇਸ ਮੌਕੇ ਸੰਬੋਧਨ ਕਰਦਿਆਂ ਸੀ ਜੀ ਸੀ ਦੇ ਪ੍ਰੈਜ਼ੀਡੈਂਟ ਰਛਪਾਲ ਸਿੰਘ ਧਾਲੀਵਾਲ ਨੇ ਕਿਹਾ ਕਿ ਨੈਸ਼ਨਲ ਮੂਟ ਕੋਰਟ ਮੁਕਾਬਲੇ ਨੇ ਇੱਕ ਪਰੰਪਰਾ ਦੀ ਸ਼ੁਰੂਆਤ ਕੀਤੀ ਹੈ, ਜੋ ਭਵਿੱਖ ਦੇ ਵਕੀਲਾਂ ਦੀ ਕਾਨੂੰਨੀ ਪ੍ਰਤਿਭਾ ਨੂੰ ਨਿਖਾਰਨ ਦਾ ਕੰਮ ਕਰੇਗੀ। ਝੰਜੇੜੀ ਕੈਂਪਸ ਦੇ ਐਮ ਡੀ ਅਰਸ਼ ਧਾਲੀਵਾਲ ਨੇ ਕਿਹਾ ਕਿ ਦੇਸ਼ ਦੇ ਮਸ਼ਹੂਰ ਵਕੀਲਾਂ ਦੀ ਇਸ ਮੁਕਾਬਲੇ ਵਿਚ ਮੌਜੂਦਗੀ ਨੇ ਇਸ ਮੁਕਾਬਲੇ ਦਾ ਮਾਣ ਵਧਾਇਆ ਹੈ।