ਪਟਿਆਲਾ, 19 ਜਨਵਰੀ - ਭਗਵਾਨ ਸ੍ਰੀ ਰਾਮ ਲੱਲਾ ਦੇ 22 ਜਨਵਰੀ ਨੂੰ ਹੋ ਰਹੇ ਪ੍ਰਾਣ ਪ੍ਰਤੀਸ਼ਠਾ ਸਮਾਗਮ ਲਈ ਪਟਿਆਲਾ ਮੀਡੀਆ ਕਲੱਬ ਨੂੰ ਸੱਦਾ ਪੱਤਰ ਦਿੱਤਾ ਗਿਆ ਤੇ ਕਲੱਬ ਮੈਂਬਰਾਂ ਨੂੰ ਅਕਸ਼ਿਤ ਅਤੇ ਸ੍ਰੀ ਰਾਮ ਮੰਦਿਰ ਦੀ ਤਸਵੀਰ ਭੇਂਟ ਕੀਤੀ ਗਈ। ਇਹ ਰਸਮ ਸ੍ਰੀ ਰਾਮ ਜਨਮ ਭੂਮੀ ਨਿਆਸ ਦੀ ਪਟਿਆਲਾ ਇਕਾਈ ਦੇ ਸੰਯੋਜਕ ਰਾਜਿੰਦਰ ਕੁਮਾਰ ਨੇ ਅਦਾ ਕੀਤੀ।
ਅੱਜ ਕਲੱਬ ਵਿਚ ਇਸ ਸਬੰਧੀ ਵਿਸ਼ੇਸ਼ ਸਮਾਗਮ ਰੱਖਿਆ ਗਿਆ ਸੀ। ਇਸ ਸਮਾਗਮ ਵਿਚ  ਰਾਜਿੰਦਰ ਕੁਮਾਰ ਨੇ ਦੱਸਿਆ ਕਿ ਅਯੁੱਧਿਆ ਵਿਚ ਸ੍ਰੀ ਰਾਮ ਮੰਦਿਰ ਦੇ ਨਿਰਮਾਣ ਲਈ 900 ਕਰੋੜ ਰੁਪਏ ਇਕੱਤਰ ਕਰਨ ਦਾ ਟੀਚਾ ਰੱਖਿਆ ਗਿਆ ਸੀ ਜੋ ਸਿਰਫ 4 ਹਫਤਿਆਂ ਵਿਚ ਹੀ ਇਕੱਤਰ ਹੋ ਗਏ ਸਨ ਤੇ ਦੇਸ਼ ਭਰ ਤੋਂ ਲੋਕਾਂ ਨੇ ਮੰਦਿਰ ਨਿਰਮਾਣ ਲਈ 3200 ਕਰੋੜ ਰੁਪਏ ਦਾਨ ਦਿੱਤੇ ਹਨ।
ਉਹਨਾਂ ਦੱਸਿਆ ਕਿ 22 ਜਨਵਰੀ ਨੂੰ ਪ੍ਰਾਣ ਪ੍ਰਤੀਸ਼ਠਾ ਸਮਾਗਮ ਸਵੇਰੇ 11.00 ਵਜੇ ਤੋਂ ਦੁਪਹਿਰ 1.00 ਤਕ ਹੋਵੇਗਾ ਤੇ ਪਟਿਆਲਾ ਵਿਚ 105 ਥਾਵਾਂ ’ਤੇ ਮੰਦਿਰਾਂ ਵਿਚ ਤੇ ਹੋਰ ਜਨਤਕ ਥਾਵਾਂ ’ਤੇ ਵੱਡੀਆਂ ਸਕਰੀਨਾਂ ਲਗਾ ਕੇ ਪ੍ਰੋਗਰਾਮ ਲਾਈਵ ਵਿਖਾਉਣ ਦਾ ਪ੍ਰਬੰਧ ਕੀਤਾ ਗਿਆ ਹੈ। ਉਹਨਾਂ ਦੱਸਿਆ ਕਿ 150 ਵੱਡੇ ਮੰਦਿਰਾਂ ਵਿਚ ਵੀ ਵਿਸ਼ੇਸ਼ ਸਮਾਗਮ ਕੀਤੇ ਜਾ ਰਹੇ ਹਨ ਤੇ ਅਯੁੱਧਿਆ ਰਾਮ ਮੰਦਿਰ ਤੋਂ ਆਏ ਕਲਸ਼ ਵੀ 400 ਮੰਦਿਰਾਂ ਦੇ ਪ੍ਰਬੰਧਕਾਂ ਨੇ ਲਿਜਾ ਕੇ ਅਕਸ਼ਿਤ ਵੰਡ ਦਾ ਕੰਮ ਕੀਤਾ ਹੈ ਤੇ ਪਟਿਆਲਾ ਵਿਚ 85000 ਘਰਾਂ ਵਿਚ ਅਕਸ਼ਿਤ ਵੰਡ ਦਿੱਤੇ ਗਏ ਹਨ।
ਉਹਨਾਂ ਕਿਹਾ ਕਿ ਭਗਵਾਨ ਸ੍ਰੀ ਰਾਮ ਦੀ ਉਸਤਤ ਦਾ ਹਰ ਕੋਈ ਗਾਇਨ ਕਰ ਰਿਹਾ ਹੈ ਤੇ ਸਾਰੇ ਧਰਮਾਂ ਦੇ ਲੋਕਾਂ ਵੱਲੋਂ ਇਸ ਮੁਹਿੰਮ ਨੂੰ ਵੱਡਾ ਹੁੰਗਾਰਾ ਦਿੱਤਾ ਜਾ ਰਿਹਾ ਹੈ।
ਇਸ ਮੌਕੇ ਕਲੱਬ ਦੇ ਪ੍ਰਧਾਨ ਨਵਦੀਪ ਢੀਂਗਰਾ ਤੇ ਚੀਫ ਡਾਇਰੈਕਟਰ ਬਲਜਿੰਦਰ ਸ਼ਰਮਾ ਪੰਜੌਲਾ ਨੇ ਰਾਜਿੰਦਰ ਕੁਮਾਰ ਦਾ ਧੰਨਵਾਦ ਕੀਤਾ ਤੇ ਕਿਹਾ ਕਿ ਪੱਤਰਕਾਰ ਭਾਈਚਾਰੇ ਦਾ ਅਯੁੱਧਿਆ ਦੌਰੇ ਦਾ ਪ੍ਰੋਗਰਾਮ ਆਉਂਦੇ ਸਮੇਂ ਵਿਚ ਉਲੀਕਿਆ ਜਾਵੇਗਾ। ਰਾਜਿੰਦਰ ਕੁਮਾਰ ਨੇ ਭਰੋਸਾ ਦੁਆਇਆ ਕਿ ਜੇਕਰ ਅਜਿਹਾ ਪ੍ਰੋਗਰਾਮ ਉਲੀਕਿਆ ਜਾਂਦਾ ਹੈ ਤਾਂ ਉਹਨਾਂ ਵੱਲੋਂ ਅਜਿਹੇ ਪ੍ਰੋਗਰਾਮ ਲਈ ਹਰ ਕਿਸਮ ਦਾ ਸਹਿਯੋਗ ਦਿੱਤਾ ਜਾਵੇਗਾ। ਇਸ ਮੌਕੇ ਹੋਰਨਾਂ ਤੋਂ ਇਲਾਵਾ ਸਾਬਕਾ ਐਮ ਸੀ ਹੈਪੀ ਸ਼ਰਮਾ, ਕੁਲਭੂਸ਼ਣ ਪ੍ਰਿੰਸ ਤੇ ਸੰਜੀਵ ਸ਼ਰਮਾ, ਸਰਪੰਚ ਯੁਵਰਾਜ ਸ਼ਰਮਾ ਚੇਅਰਮੈਨ ਸਰਬਜੀਤ ਸਿੰਘ ਭੰਗੂ, ਪ੍ਰਧਾਨ ਨਵਦੀਪ ਢੀਂਗਰਾ, ਮੀਤ ਪ੍ਰਧਾਨ ਪਰਮੀਤ ਸਿੰਘ ਅਤੇ ਕਰਮ ਪ੍ਰਕਾਸ਼, ਮੈਂਬਰਾਂ ਵਿਚ ਵਿਨੇ ਸ਼ੌਰੀ, ਪਰਗਟ ਸਿੰਘ,ਲਖਵਿੰਦਰ ਸਿੰਘ ਔਲਖ ਗੁਲਸ਼ਨ ਸ਼ਰਮਾ, ਦਮਨਪ੍ਰੀਤ ਸਿੰਘ, ਰਵੀ ਜੱਬਲ, ਰਾਣਾ ਰੱਖੜਾ, ਚਰਨਜੀਵ ਜੋਸ਼ੀ, ਸੁਖਵਿੰਦਰ ਸੁੱਖੀ, ਹਰਮੀਤ ਸੋਢੀ, ਰਾਜੇਸ਼ ਸੱਚਰ, ਅੰਗਰੇਜ਼ ਸਿੰਘ, ਮੁਕੇਸ਼ ਢੀਂਗਰਾ, ਰਾਜੇਸ਼ ਅਗਰਵਾਲ ਤੇ ਹੋਰ ਪਤਵੰਤੇ ਹਾਜ਼ਰ ਸਨ।