ਮੁਹਾਲੀ, 23 ਅਗਸਤ: ਬ੍ਰਹਮਾਕੁਮਾਰੀਜ ਸੰਸਥਾ ਨੇ ਅੱਜ ਮੋਹਾਲੀ ਵਿੱਚ ਸੁਖ ਸ਼ਾਂਤੀ ਭਵਨ ਫੇਜ਼ 7 ਵਿਖੇ ਇੱਕ ਮੈਗਾ ਖੂਨਦਾਨ ਕੈਂਪ ਦਾ ਆਯੋਜਨ ਕੀਤਾ ਜਿਸ ਵਿੱਚ 114 ਯੂਨਿਟ ਖੂਨਦਾਨ ਕੀਤਾ ਗਿਆ। ਖੂਨਦਾਨ ਕੈਂਪ ਦੀ ਇੱਕ ਵਿਸ਼ੇਸ਼ਤਾ ਇਹ ਸੀ ਕਿ ਹਿੰਦੂ, ਮੁਸਲਿਮ ਅਤੇ ਸਿੱਖ ਧਰਮਾਂ ਦੇ ਪੈਰੋਕਾਰਾਂ ਨੇ ਇਕੱਠੇ ਖੂਨਦਾਨ ਕੀਤਾ ਅਤੇ ਬ੍ਰਹਮਾਕੁਮਾਰੀਜ ਅਤੇ ਬ੍ਰਹਮਾਕੁਮਾਰਾਂ ਨੇ ਇਸ ਵਿੱਚ ਉਤਸ਼ਾਹ ਨਾਲ ਹਿੱਸਾ ਲਿਆ। 
ਖੂਨਦਾਨ ਕੈਂਪ ਦਾ ਉਦਘਾਟਨ ਪੰਜਾਬ ਦੇ ਸਿਹਤ ਸਕੱਤਰ ਡਾ ਬਸੰਤ ਗਰਗ ਆਈ ਏ ਐਸ, ਬ੍ਰਹਮਾਕੁਮਾਰੀ ਪ੍ਰੇਮਲਤਾ ਮੋਹਾਲੀ—ਰੋਪੜ ਰਾਜਯੋਗ ਕੇਂਦਰਾਂ ਦੀ ਇਨਚਾਰਜ , ਪੰਜਾਬ ਦੇ ਵਣਪਾਲ ਸ਼੍ਰੀ ਵਿਸ਼ਾਲ ਚੌਹਾਨ ਆਈ ਐਫ ਐਸ, ਮੋਹਾਲੀ—ਰੋਪੜ ਰਾਜਯੋਗ ਕੇਂਦਰਾਂ ਦੀ ਸਹਿ—ਇਨਚਾਰਜ ਬ੍ਰਹਮਾਕੁਮਾਰੀ ਡਾ ਰਮਾ, ਇਨਰ ਵੀਲ ਕਲੱਬ ਅਤੇ ਲਾਇਨਜ਼ ਕਲੱਬ ਦੇ ਅਧਿਕਾਰੀ, ਸ਼੍ਰੀ ਗੁਰਚਰਨ ਸਿੰਘ ਸਰਾਂ ਅਤੇ ਬੀ ਕੇ  ਨਮਰਤਾ, ਬੀ ਕੇ ਅੰਜੂ ਆਦਿ ਨੇ 25 ਦੀਪਕ ਜਗਾ ਕੇ ਅਤੇ ਹਜ਼ਾਰਾਂ ਲੋਕਾਂ ਨੇ ਦਾਦੀ ਪ੍ਰਕਾਸ਼ਮਨੀ ਨੂੰ ਉਨ੍ਹਾਂ ਦੀ 18ਵੀਂ ਬਰਸੀ ਤੇ ਸ਼ਰਧਾਂਜਲੀ ਵੀ ਦਿੱਤੀ।
ਖੂਨਦਾਨ ਕੈਂਪ ਦਾ ਉਦਘਾਟਨ ਕਰਨ ਤੋਂ ਬਾਅਦ ਆਪਣੇ ਵਿਚਾਰ ਪ੍ਰਗਟ ਕਰਦੇ ਹੋਏ ਪੰਜਾਬ ਸਿਹਤ ਵਿਭਾਗ ਦੇ ਸਕੱਤਰ ਡਾ  ਬਸੰਤ ਗਰਗ ਨੇ ਬ੍ਰਹਮਾਕੁਮਾਰੀ ਸੰਗਠਨ ਦੇ ਤਿਆਗ, ਤਪੱਸਿਆ ਅਤੇ ਸੇਵਾ ਦੀ ਪ੍ਰਸ਼ੰਸਾ ਕੀਤੀ ਅਤੇ ਕਿਹਾ ਕਿ ਇਹ ਸੰਸਥਾ 6000 ਸੇਵਾ ਕੇਂਦਰਾਂ ਰਾਹੀਂ ਇੱਕ ਮਹਾਨ ਸਮਾਜ ਸੇਵਾ ਕਰ ਰਹੀ ਹੈ। ਖੂਨਦਾਨ ਕਰਨਾ ਨਾ ਸਿਰਫ ਇੱਕ ਦਾਨ ਹੈ ਬਲਕਿ ਇੱਕ ਸਮਾਜਿਕ ਸੇਵਾ ਵੀ ਹੈ ਜਿਸ ਰਾਹੀਂ ਕਿਸੇ ਜ਼ਖਮੀ ਜਾਂ ਹੋਰ ਲੋੜਵੰਦ ਵਿਅਕਤੀ ਦੀ ਜਾਨ ਬਚਾਈ ਜਾ ਸਕਦੀ ਹੈ। ਡਾ ਬਸੰਤ ਗਰਗ ਨੇ ਖੁਦ ਵੀ ਖੂਨਦਾਨ ਕੀਤਾ।
ਬ੍ਰਹਮਾਕੁਮਾਰੀ ਮੋਹਾਲੀ—ਰੋਪੜ ਰਾਜਯੋਗਾ ਕੇਂਦਰਾਂ ਦੀ ਇਨਚਾਰਜ ਬਰ੍ਰਮਾਕੁਮਾਰੀ ਪ੍ਰੇਮਲਤਾ ਭੈਣ ਜੀ, ਜੋ ਖੂਨਦਾਨ ਕੈਂਪ ਦਾ ਸੰਚਾਲਨ ਕਰ ਰਹੀ ਸੀ, ਨੇ ਕਿਹਾ ਕਿ ਇਹ ਕੈਂਪ ਰਾਜਯੋਗਿਨੀ ਡਾ ਦਾਦੀ ਪ੍ਰਕਾਸ਼ਮਨੀ ਜੀ ਬ੍ਰਹਮਾਕੁਮਾਰੀ ਸੰਸਥਾ ਦੇ ਸਾਬਕਾ ਪ੍ਰਸ਼ਾਸਕੀ ਮੁਖੀ ਦੀ 18ਵੀਂ ਬਰਸੀ ਤੇ ਆਯੋਜਿਤ ਕੀਤਾ ਜਾ ਰਿਹਾ ਹੈ। ਹਰ ਸਾਲ ਸੰਸਥਾ ਵੱਲੋਂ ਇਸਨੂੰ ਵਿਸ਼ਵ ਭਾਈਚਾਰਾ ਦਿਵਸ ਵਜੋਂ ਮਨਾਇਆ ਜਾਂਦਾ ਹੈ, ਪਰ ਇਸ ਸਾਲ ਉਨ੍ਹਾਂ ਦੀ ਬਰਸੀ ਦੇ ਮੌਕੇਤੇ ਭਾਰਤ ਅਤੇ ਨੇਪਾਲ ਦੇ ਸਾਰੇ ਰਾਜਯੋਗ ਕੇਂਦਰਾਂ ਤੇ ਇੱਕ ਵਿਸ਼ਾਲ ਖੂਨਦਾਨ ਮੁਹਿੰਮ ਦਾ ਆਯੋਜਨ ਕੀਤਾ ਗਿਆ ਹੈ, ਜੋ ਕਿ 22 ਤੋਂ 25 ਅਗਸਤ ਤੱਕ ਚੱਲੇਗੀ। 
ਦਾਦੀ ਜੀ ਨੇ ਸਮਾਜ ਦੇ ਹਰ ਵਰਗ ਅਤੇ ਦੇਸ਼—ਵਿਦੇਸ਼ ਵਿੱਚ ਰੁਹਾਨੀ ਸੰਦੇਸ਼ ਫੈਲਾਉਣ ਦਾ ਕੰਮ ਕੀਤਾ। ਉਨ੍ਹਾਂ ਕਿਹਾ ਕਿ ਮੋਹਾਲੀ ਸਰਕਲ ਵਿੱਚ 100 ਯੂਨਿਟ ਖੂਨ ਇਕੱਠਾ ਕਰਨ ਦਾ ਟੀਚਾ ਸੀ, ਪਰ ਬ੍ਰਹਮਾਕੁਮਾਰੀਜ ਦੇ ਭਰਾਵਾਂ—ਭੈਣਾਂ ਅਤੇ ਖੂਨਦਾਨੀਆਂ ਦੇ ਭਾਰੀ ਉਤਸ਼ਾਹ ਕਾਰਨ 114 ਯੂਨਿਟ ਖੂਨਦਾਨ ਕੀਤਾ ਗਿਆ ਹੈ।
ਮੋਹਾਲੀ—ਰੋਪੜ ਰਾਜਯੋਗ ਕੇਂਦਰਾਂ ਦੀ ਸਹਿ—ਇਨਚਾਰਜ ਬ੍ਰਹਮਾਕੁਮਾਰੀ ਡਾ ਰਮਾ ਭੈਣ ਜੀ ਨੇ ਕਿਹਾ ਕਿ ਇਹ ਵਿਸ਼ਾਲ ਖੂਨਦਾਨ ਮੁਹਿੰਮ ਜ਼ਖਮੀਆਂ, ਔਰਤਾਂ ਅਤੇ ਹੋਰ ਲੋਕਾਂ ਦੀਆਂ ਖੂਨ ਦੀਆਂ ਜ਼ਰੂਰਤਾਂ ਨੂੰ ਪੂਰਾ ਕਰਨ ਅਤੇ ਗਿਨੀਜ਼ ਵਰਲਡ ਰਿਕਾਰਡ ਬਣਾਉਣ ਦੇ ਉਦੇਸ਼ ਨਾਲ ਸ਼ੁਰੂ ਕੀਤੀ ਗਈ ਹੈ, ਜਿਸ ਵਿੱਚ ਇਨਰ ਵੀਲ ਕਲੱਬ, ਲਾਇਨ ਕਲੱਬ ਅਤੇ ਸਥਾਨਕ ਖੂਨਦਾਨੀਆਂ ਨੇ ਉਤਸ਼ਾਹ ਨਾਲ ਹਿੱਸਾ ਲਿਆ ਹੈ।
 ਸਾਰੇ ਖੂਨਦਾਨੀਆਂ ਨੂੰ ਬ੍ਰਹਮਾਕੁਮਾਰੀਜ, ਪੀਜੀਆਈ ਅਤੇ ਰੋਟਰੀ ਕਲੱਬ ਵੱਲੋਂ ਸਰਟੀਫਿਕੇਟ ਦੇ ਕੇ ਸਨਮਾਨਿਤ ਵੀ ਕੀਤਾ ਗਿਆ ਅਤੇ ਉਨ੍ਹਾਂ ਨੂੰ ਰਿਫਰੈਸ਼ਮੈਂਟ ਵੀ ਦਿੱਤੀ ਗਈ।