ਪਟਿਆਲਾ 23 ਅਗਸਤ: ਅੱਜ ਪੀ ਆਰ ਟੀ ਸੀ ਪਟਿਆਲਾ ਡਿਪੂ ਦੇ ਵੱਖ-ਵੱਖ ਜਥੇਬੰਦੀਆਂ ਨਾਲ ਸਬੰਧਤ ਵਰਕਸ਼ਾਪ ਕਰਮਚਾਰੀਆਂ ਨੇ ਇਕੱਤਰ ਹੋਕੇ ਡਿਪੂ ਵਿੱਚ ਕਰਮਚਾਰੀਆਂ ਦੀ ਸੁਰੱਖਿਆ ਨੂੰ ਬਣੇ ਭਾਰੀ ਖਤਰੇ ਦੇ ਸਬੰਧ ਵਿੱਚ ਅਤੇ ਪਿਛਲੇ ਦਿਨੀ ਵਾਪਰੀ ਹਿੰਸਕ ਘਟਨਾ ਅਤੇ ਵਰਕਸ਼ਾਪ ਇੰਚਾਰਜਾਂ ਨੂੰ ਡਰਾਇਵਰ ਸੰਦੀਪ ਸਿੰਘ ਅਤੇ ਜ਼ਸਦੀਪ ਸਿੰਘ ਵੱਲੋਂ ਧਮਕੀਆਂ ਦੇਣ ਅਤੇ ਵਰਕਸ਼ਾਪ ਦੇ ਕੰਮ ਵਿੱਚ ਵਿਘਨ ਪਾਉਣ ਵਰਗੇ ਵਰਤਾਰੇ ਦੀ ਰਿਪੋਰਟ ਜਨਰਲ ਮੈਨੇਜਰ ਕੋਲ ਕੀਤੀ ਗਈ।
 ਪਰ ਜਨਰਲ ਮੈਨੇਜਰ ਵੱਲੋਂ ਉੱਕਾ ਹੀ ਕੋਈ ਕਾਰਵਾਈ ਨਹੀਂ ਕੀਤੀ ਗਈ। ਇਹਨਾਂ ਘਟਨਾਵਾਂ ਨੂੰ ਜਨਰਲ ਮੈਨੇਜਰ ਵੱਲੋਂ ਅਣਗੋਲਿਆ ਕਰਨਾ ਜਿੱਥੇ ਮੰਦਭਾਗਾ ਅਤੇ ਗੈਰ ਜਿੰਮੇਵਾਰਾਨਾ ਵੀ ਹੈ। ਉੱਥੇ ਹੀ ਉਹਨਾਂ ਦਾ ਇਸ ਤਰ੍ਹਾਂ ਦਾ ਰਵਈਆ ਭਵਿੱਖ ਵਿੱਚ ਕਿਸੇ ਵੀ ਮਾੜੀ ਘਟਨਾ ਦੇ ਵਾਪਰਨ ਦਾ ਵੀ ਖਤਰਾ ਖੜਾ ਕਰਦਾ ਹੈ। 
ਘਟਨਾਵਾਂ ਦਾ ਵੇਰਵਾ ਦਿੰਦਿਆ ਵਰਕਸ਼ਾਪ ਵਿੱਚ ਕੰਮ ਕਰਦੇ ਜਥੇਬੰਦੀਆਂ ਦੇ ਆਗਆਂ ਪਰਮਜੀਤ ਸਿੰਘ, ਤਰਸੇਮ ਸਿੰਘ, ਦਲੇਰ ਸਿੰਘ, ਲਾਲ ਸਿੰਘ, ਪਰਮਿੰਦਰ ਸਿੰਘ ਸਬ ਇੰਸਪੈਕਟਰ, ਇੰਦਰਜੀਤ ਸਿੰਘ ਆਦਿ ਨੇ ਦੱਸਿਆ ਕਿ 21 ਅਗਸਤ ਨੂੰ ਸੰਦੀਪ ਸਿੰਘ ਡਰਾਈਵਰ ਵਰਕਸ਼ਾਪ ਦੇ ਸਿਫਟ ਇੰਚਾਰਜ ਦੀਪਕ ਕੁਮਾਰ ਅਤੇ ਵਰਕਸ਼ਾਪ ਦੇ ਇੰਚਾਰਜ ਸਤਵੀਰ ਸਿੰਘ ਨਾਲ ਬਹਿਸਬਾਜੀ ਕਰਦਾ ਕਰਦਾ ਧਮਕੀਆਂ ਦੇਣ ਅਤੇ ਮਾੜੀ ਭਾਸ਼ਾ ਬੋਲਣ ਤੇ ਉਤਰ ਆਇਆ ਸੀ। 
ਜੇਕਰ ਉਸ ਨੂੰ ਡਰਾਇਵਰ ਰਮਨ ਕੁਮਾਰ ਨੇ ਸਮਝਾਉਣ ਦਾ ਜਤਨ ਕੀਤਾ ਤਾਂ ਸੰਦੀਪ ਸਿੰਘ ਉਸਨੂੰ ਮਾੜਾ ਬੋਲਣ ਲੱਗ ਪਿਆ ਅਤੇ ਕੋਈ ਲੋਹੇ ਦੀ ਭਾਰੀ ਚੀਜ ਜ਼ੋਰ ਨਾਲ ਉਸਦੇ ਸਿਰ ਵਿੱਚ ਮਾਰ ਦਿੱਤੀ ਜਿਸ ਨਾਲ ਰਮਨ ਕੁਮਾਰ ਗੰਭੀਰ ਜਖਮੀ ਹੋ ਗਿਆ। 
ਜਿਸ ਨੂੰ ਇਲਾਜ ਲਈ ਰਜਿੰਦਰਾ ਹਸਪਤਾਲ ਲਿਜਾਇਆ ਗਿਆ ਅਤੇ ਉਹ ਜੇਰੇ ਇਲਾਜ ਹੈ, ਪੁਲਿਸ ਕੇਸ ਦਰਜ ਹੈ। ਅਜਿਹਾ ਕੁੱਝ ਵਾਪਰਨ ਦੇ ਬਾਵਜੂਦ ਦੋਸ਼ੀ ਦਾ ਮੌਕੇ ਤੇ ਹਾਜਰ ਭਰਾ ਡਰਾਈਵਰ ਜ਼ਸਦੀਪ ਸਿੰਘ ਵੀ ਧਮਕਾਉਂਦਾ ਰਿਹਾ। ਇਹਨਾਂ ਵਾਕਿਅਤਾਂ ਦੇ ਸਬੰਧ ਵਿੱਚ ਸਾਰੀ ਜਾਣਕਾਰੀ ਜਨਰਲ ਮੈਨੇਜਰ ਦੇ ਨੋਟਿਸ ਵਿੱਚ ਹੋਣਦੇ ਬਾਵਜੂਦ ਕੋਈ ਐਕਸ਼ਨ ਨਾ ਕਰਨ ਦੇ ਵਿਰੋਧ ਵਿੱਚ ਕਰਮਚਾਰੀਆਂ ਵਲੋਂ ਸੋਮਵਾਰ 25 ਅਗਸਤ ਤੋਂ ਹਰ ਰੋਜ਼ ਰੋਸ ਪ੍ਰਗਟ ਕਰਨ ਲਈ ਮੁਜਾਹਰਾ ਕੀਤਾ ਜਾਇਆ ਕਰੇਗਾ। 
ਇਸ ਐਕਸ਼ਨ ਦੀ ਹਿਮਾਇਤ ਪਟਿਆਲਾ ਡਿਪੂ ਵਿੱਚ ਕੰਮ ਕਰਦੀਆਂ 4-5 ਜਥੇਬੰਦੀਆਂ ਵਲੋਂ ਕੀਤੀ ਜਾਵੇਗੀ। ਇਹਨਾਂ ਘਟਨਾਵਾਂ ਸਬੰਧੀ ਉੱਚ ਅਧਿਕਾਰੀ ਦੇ ਧਿਆਨ ਵਿੱਚ ਵੀ ਲਿਆਦਾ ਜਾ ਰਿਹਾ ਹੈ। ਇਸ ਮੌਕੇ ਜਥੇਬੰਦੀਆਂ ਏਟਕ ਪਰਮਜੀਤ ਸਿੰਘ ਅਤੇ ਦਲੇਰ ਸਿੰਘ, ਸੀਟੂ ਦੇ ਤਰਸੇਮ ਸਿੰਘ ਤੇ ਪਰਮਿੰਦਰ ਸਿੰਘ ਸਬ ਇੰਸਪੈਕਟਰ, ਇੰਟਕ ਗੁਰਨੈਬ ਸਿੰਘ, ਐਸ ਸੀ ਬੀ ਸੀ ਰਜਿੰਦਰ ਸਿੰਘ, ਨਸੀਬ ਚੰਦ, ਅਤੇ ਕਰਮਚਾਰੀ ਦਲ ਦੇ ਇੰਦਰਜੀਤ ਸਿੰਘ ਹਾਜਰ ਸਨ।