ਨਵਾਂਸ਼ਹਿਰ, 1 ਅਗਸਤ- ਸਬ ਡਵੀਜ਼ਨ ਨਵਾਂਸ਼ਹਿਰ ਦੇ ਪਿੰਡ ਚਰਾਣ 'ਚ ਵਾਪਰੀ ਔਰਤ ਦੇ ਦਿਲ ਕੰਬਾਊ ਬਲਾਇੰਡ ਮਰਡਰ ਦੀ ਘਟਨਾ ਨੇ ਜਿਥੇ ਪੀੜਤ ਪਰਿਵਾਰ ਨੂੰ ਗਹਿਰੇ ਸਦਮੇ 'ਚ ਡੁਬੋਇਆ, ਉਥੇ ਥਾਣਾ ਸਦਰ ਨਵਾਂਸ਼ਹਿਰ ਦੀ ਪੁਲਿਸ ਵੱਲੋਂ ਮਾਮਲੇ ਨਾਲ ਸਬੰਧਤ ਕਥਿਤ ਦੋਸ਼ੀ ਨੂੰ 24 ਘੰਟਿਆਂ 'ਚ ਗ੍ਰਿਫਤਾਰ ਕਰਕੇ ਪੀੜਤ ਪਰਿਵਾਰ ਦੇ ਗਹਿਰੇ ਜ਼ਖਮਾਂ ਤੇ ਇਕ ਤਰ੍ਹਾਂ ਨਾਲ ਮੱਲ੍ਹਮ ਦਾ ਕੰਮ ਕੀਤਾ। 
ਇਸ ਮਾਮਲੇ ਨੂੰ ਲੈ ਕੇ ਡੀ.ਐਸ.ਪੀ. ਰਾਜ ਕੁਮਾਰ ਵੱਲੋਂ ਥਾਣਾ ਮੁਖੀ ਅਸ਼ੋਕ ਕੁਮਾਰ ਨੂੰ ਨਾਲ ਲੈਕੇ ਮੀਡੀਆ ਵਾਰਤਾ ਕਰਦਿਆਂ ਮਾਮਲੇ ਦੇ ਅਸਲ ਤੱਥ ਸਾਹਮਣੇ ਲਿਆਉਣ ਦਾ ਦਾਅਵਾ ਕੀਤਾ ਗਿਆ। ਉਨ੍ਹਾਂ ਦੱਸਿਆ ਕਿ 30 ਜੁਲਾਈ ਦੀ ਰਾਤ ਨੂੰ ਆਸ਼ਾ ਰਾਣੀ, ਉਮਰ ਕਰੀਬ 55 ਸਾਲ, ਪਿੰਡ ਚਰਾਣ ਵਿਖੇ ਆਪਣੇ ਘਰ ਇਕੱਲੀ ਸੁੱਤੀ ਪਈ ਸੀ। 
ਤਾਂ ਪਿੰਡ ਦਾ ਇਕ ਕਥਿਤ ਦੋਸ਼ੀ ਮੁਖਣ ਰਾਮ ਲੁੱਟ-ਖੋਹ ਦੀ ਨੀਅਤ ਨਾਲ ਉਨ੍ਹਾਂ ਦੇ ਘਰ 'ਚ ਲੁਕਵੇਂ ਤਰੀਕੇ ਨਾਲ ਦਾਖਲ ਹੋਇਆ। ਜਦੋਂ ਉਹ ਘਰ 'ਚ ਫਰੋਲਾ-ਫਰਾਲੀ ਕਰ ਰਿਹਾ ਸੀ, ਤਾਂ ਅਚਾਨਕ ਆਸ਼ਾ ਰਾਣੀ ਦੀ ਅੱਖ ਖੁੱਲ੍ਹ ਗਈ। ਤਾਂ ਉਸ ਨੇ ਕਥਿਤ ਦੋਸ਼ੀ ਨਾਲ ਮੁਕਾਬਲਾ ਕੀਤਾ। ਤਾਂ ਕਥਿਤ ਦੋਸ਼ੀ ਮੁਖਣ ਰਾਮ ਨੇ ਆਸ਼ਾ ਰਾਣੀ ਦੀ ਚੁੰਨੀ ਨਾਲ ਹੀ ਉਸ ਦਾ ਗਲਾ ਘੁੱਟ ਕੇ ਉਸ ਦੀ ਹੱਤਿਆ ਕਰ ਦਿੱਤੀ। ਉਨ੍ਹਾਂ ਦੱਸਿਆ ਕਿ ਦੌਰਾਨੇ ਮੁਕਾਬਲੇ ਆਸ਼ਾ ਰਾਣੀ ਨੇ ਕਥਿਤ ਦੋਸ਼ੀ ਦੇ ਹੱਥ ਦੇ ਦੰਦੀ ਵੱਢੀ ਸੀ, ਜਿਸ ਦਾ ਖੂਨ ਮੌਕੇ 'ਤੇ ਡਿੱਗਿਆ ਸੀ। 
ਘਟਨਾ ਦੀ ਸੂਚਨਾ ਮਿਲਦੇ ਸਾਰ ਥਾਣਾ ਮੁਖੀ ਅਸ਼ੋਕ ਕੁਮਾਰ ਘਟਨਾ ਸਥਾਨ 'ਤੇ ਪਹੁੰਚੇ ਸਨ, ਜਿਨ੍ਹਾਂ ਸਿਆਣਪ ਨਾਲ ਤਫਤੀਸ਼ ਕਰਦਿਆਂ ਮੌਕੇ ਵਾਰਦਾਤ ਦੀ ਚਸ਼ਮਦੀਦ ਗਵਾਹ ਆਸ਼ਾ ਰਾਣੀ ਦੀ ਗੁਆਂਢਣ ਬਲਜੀਤ ਕੌਰ ਦੇ ਬਿਆਨਾਂ 'ਤੇ ਥਾਣਾ ਸਦਰ ਨਵਾਂਸ਼ਹਿਰ ਵਿਖੇ ਮੁਕੱਦਮਾ ਨੰਬਰ 122 ਦਰਜ ਰਜਿਸਟਰ ਕਰਕੇ ਕਥਿਤ ਦੋਸ਼ੀ ਦੀ ਭਾਲ ਸ਼ੁਰੂ ਕੀਤੀ। ਤਾਂ ਕੁਝ ਘੰਟਿਆਂ ਵਿਚ ਹੀ ਕਥਿਤ ਦੋਸ਼ੀ ਨੂੰ ਗ੍ਰਿਫਤਾਰ ਕਰਕੇ ਪੁੱਛਗਿੱਛ ਲਈ ਉਸ ਦਾ ਰਿਮਾਂਡ ਪ੍ਰਾਪਤ ਕੀਤਾ। ਤਾਂ ਉਸ ਪਾਸੋਂ ਆਸ਼ਾ ਰਾਣੀ ਦੇ ਕੰਨਾਂ 'ਚੋਂ ਲਾਹੀ ਸੋਨੇ ਦੀ ਬਾਲੀ, ਡਰਾਉਣ ਲਈ ਵਰਤਿਆ ਦਾਤਰ ਅਤੇ ਮੌਕੇ ਵਾਰਦਾਤ ਤੋਂ ਭੱਜਣ ਲਈ ਵਰਤਿਆ ਮੋਟਰਸਾਈਕਲ ਬਰਾਮਦ ਕਰ ਲਿਆ।