ਲੁਧਿਆਣਾ 26 ਜੁਲਾਈ 2025- ਗੁਰੂ ਅੰਗਦ ਦੇਵ ਵੈਟਨਰੀ ਅਤੇ ਐਨੀਮਲ ਸਾਇੰਸਜ਼ ਯੂਨੀਵਰਸਿਟੀ, ਲੁਧਿਆਣਾ ਵੱਲੋਂ ਪਿੰਡ ਮੂਮ ਵਿਖੇ ਪਸ਼ੂਆਂ ਨੂੰ ਮੌਖਿਕ ਚੁੰਬਕ ਦੇਣ ਦੇ ਜਾਗਰੂਕਤਾ ਅਤੇ ਪ੍ਰਦਰਸ਼ਨੀ ਕੈਂਪ ਦਾ ਆਯੋਜਨ ਕੀਤਾ ਗਿਆ। ਇਹ ਕੈਂਪ ਫਾਰਮਰ ਫਸਟ ਪ੍ਰਾਜੈਕਟ ਅਧੀਨ ਕੀਤੀਆਂ ਜਾਂਦੀਆਂ ਗਤੀਵਿਧੀਆਂ ਦਾ ਹਿੱਸਾ ਸੀ। ਇਸ ਕੈਂਪ ਵਿੱਚ ਪਸ਼ੂਆਂ ਨੂੰ ਮੌਖਿਕ ਚੁੰਬਕ ਦੇ ਕੇ ਉਸ ਨਾਲ ਪਸ਼ੂਆਂ ਦੀ ਸਿਹਤ ਸੰਭਾਲ ਅਤੇ ਉਤਪਾਦਕਤਾ ਵਧਾਉਣ ਸੰਬੰਧੀ ਦੱਸਿਆ ਗਿਆ। 
ਇਹ ਨਵੀਨ ਪਹੁੰਚ ਡਾ. ਜਤਿੰਦਰ ਪਾਲ ਸਿੰਘ ਗਿੱਲ, ਉਪ-ਕੁਲਪਤੀ ਦੀ ਅਗਵਾਈ ਅਧੀਨ ਲਾਗੂ ਕੀਤੀ ਗਈ। ਇਸ ਪ੍ਰਾਜੈਕਟ ਦੇ ਸਹਿ-ਮੁੱਖ ਨਿਰੀਖਕ ਡਾ. ਰਾਜੇਸ਼ ਕਸਰੀਜਾ ਅਤੇ ਗੁਰਪ੍ਰੀਤ ਕੌਰ ਤੁਲਾ ਨੇ ਇਸ ਕੈਂਪ ਦਾ ਸੰਯੋਜਨ ਕੀਤਾ। ਕੈਂਪ ਦੌਰਾਨ ਪਸ਼ੂ ਪਾਲਕਾਂ ਵੱਲੋਂ ਉਤਸ਼ਾਹ ਭਰਪੂਰ ਸ਼ਮੂਲੀਅਤ ਕੀਤੀ ਗਈ ਅਤੇ ਉਨ੍ਹਾਂ ਨੇ ਇਸ ਤਨਕੀਕ ਅਤੇ ਇਸ ਦੇ ਫਾਇਦਿਆਂ ਬਾਰੇ ਜਾਣਨ ਵਾਸਤੇ ਪੂਰਨ ਰੁਚੀ ਵਿਖਾਈ।
        ਡਾ. ਕਸਰੀਜਾ ਨੇ ਜਾਣਕਾਰੀ ਦਿੱਤੀ ਕਿ ਅਜਿਹੀ ਚੁੰਬਕ ਪਸ਼ੂ ਦੇ ਪੇਟ ਵਿੱਚ ਪਹੁੰਚਾਈ ਜਾਂਦੀ ਹੈ ਅਤੇ ਉਸ ਤੋਂ ਬਾਅਦ ਜੇ ਪਸ਼ੂ ਧਾਤ ਵਾਲੀ ਕੋਈ ਨੁਕੀਲੀ ਵਸਤੂ ਨਿਗਲ ਜਾਂਦਾ ਹੈ ਤਾਂ ਉਹ ਪੇਟ ਵਿੱਚ ਇਸ ਚੁੰਬਕ ਨਾਲ ਚਿੰਬੜ ਜਾਂਦੀ ਹੈ। ਇਸ ਕਾਰਣ ਉਹ ਧਾਤੂ ਜਾਂ ਨੁਕੀਲੀ ਵਸਤੂ ਉਥੇ ਹੀ ਸਥਿਰ ਹੋ ਜਾਂਦੀ ਹੈ ਅਤੇ ਪਸ਼ੂ ਦੇ ਅੰਦਰ ਕੋਈ ਜ਼ਖ਼ਮ ਜਾਂ ਕੋਈ ਹੋਰ ਨੁਕਸਾਨ ਨਹੀਂ ਕਰਦੀ। ਕੈਂਪ ਵਿੱਚ ਸ਼ਾਮਿਲ ਕਿਸਾਨਾਂ ਨੇ ਆਪਣੇ ਪਸ਼ੂਆਂ ਲਈ ਇਹ ਤਕਨੀਕ ਅਪਣਾਉਣ ਵਿੱਚ ਦਿਲਚਸਪੀ ਵਿਖਾਈ। ਇਸ ਕੈਂਪ ਨਾਲ ਕੁੱਲ ਅੱਠ ਪਰਿਵਾਰਾਂ ਨੂੰ ਲਾਭ ਹੋਇਆ। 
ਫਾਰਮਰ ਫਸਟ ਪ੍ਰਾਜੈਕਟ ਰਾਹੀਂ ਕਿਸਾਨਾਂ ਨੂੰ ਨਵੀਨ ਖੋਜਾਂ ਅਤੇ ਪਸਾਰ ਸੇਵਾਵਾਂ ਰਾਹੀਂ ਉਤਪਾਦਕਤਾ ਵਧਾਉਣ ਦੇ ਟੀਚੇ ਲਈ ਯਤਨ ਕੀਤੇ ਜਾ ਰਹੇ ਹਨ। ਇਹ ਪ੍ਰਾਜੈਕਟ ਉੱਤਮ ਅਭਿਆਸਾਂ ਨੂੰ ਉਤਸ਼ਾਹਿਤ ਕਰਨ ਅਤੇ ਜਾਨਵਰਾਂ ਦੀ ਸਮੁੱਚੀ ਭਲਾਈ ਲਈ ਕਿਸਾਨਾਂ, ਸਥਾਨਕ ਅਧਿਕਾਰੀਆਂ ਅਤੇ ਪਸ਼ੂ ਪਾਲਣ ਮਾਹਿਰਾਂ ਨਾਲ ਪੂਰਨ ਭਾਈਵਾਲੀ ਤਹਿਤ ਕਾਰਜ ਕਰ ਰਿਹਾ ਹੈ।