ਪਟਿਆਲਾ, 27 ਅਗਾਸਤ - ਕੇਂਦਰੀ ਪ੍ਰਦੂਸ਼ਣ ਰੋਕਥਾਮ ਬੋਰਡ ਵੱਲੋਂ ਹੈਜ਼ਰਡਸ ਵੇਸਟ ਦੇ ਜਨਰੇਸ਼ਨ, ਟਰਾਂਸਪੋਰਟੇਸ਼ਨ, ਸਟੋਰੇਜ, ਰੀਸਾਈਕਲਿੰਗ, ਯੂਟੀਲਾਈਜ਼ੇਸ਼ਨ ਅਤੇ ਡਿਸਪੋਜ਼ਲ ਦੀ ਨਿਗਰਾਨੀ ਲਈ  ਨੈਸ਼ਨਲ ਹੈਜ਼ਰਡਸ ਵੇਸਟ ਟਰੈਕਿੰਗ ਸਿਸਟਮ ਦਾ ਈ ਪੋਰਟਲ ਬਣਾਇਆ ਗਿਆ ਹੈ।  
ਪੰਜਾਬ ਪ੍ਰਦੂਸ਼ਣ ਰੋਕਥਾਮ ਬੋਰਡ ਅਤੇ ਕੇਂਦਰੀ ਪ੍ਰਦੂਸ਼ਣ ਰੋਕਥਾਮ ਬੋਰਡ ਦੇ ਅਧਿਕਾਰੀ ਡਾ. ਦੀਪਤੀ ਕਪਿਲ ਅਤੇ ਉਹਨਾਂ ਦੇ ਸਹਿਯੋਗੀਆਂ ਨੇ ਅੱਜ ਲੁਧਿਆਣਾ ਵਿਖੇ ਪੰਜਾਬ ਵਿੱਚ ਹੈਜ਼ਰਡਸ ਵੇਸਟ ਦੀ ਟਰੈਕਿੰਗ ਪ੍ਰਣਾਲੀ (ਈ ਪੋਰਟਲ) ਦੇ ਮੈਨੇਜਮੈਂਟ ਇਨਫਰਮੇਸ਼ਨ ਸਿਸਟਮ ਮੋਡਿਊਲ ਦੀ ਜਾਣਕਾਰੀ  ਸਬੰਧੀ "ਸਲਾਹਕਾਰ ਮਿਲਣੀ" ਵਿੱਚ ਹੈਜ਼ਰਡਸ ਵੇਸਟ ਦੇ ਵੱਖ ਵੱਖ ਕੰਮਾਂ ਨਾਲ ਸਬੰਧਿਤ ਵਪਾਰੀ ਤੇ ਸਅਨਤਕਾਰਾਂ ਨੇ ਭਾਗ ਲਿਆ। 
ਇਸ ਟਰੈਕਿੰਗ ਸਿਸਟਮ ਸਬੰਧੀ ਸਲਾਹਕਾਰ ਮਿਲਣੀ ਪ੍ਰੋਗਰਾਮ ਦੇ ਮੁੱਖ ਮਹਿਮਾਨ ਵਜੋਂ ਪੀਪੀਸੀਬੀ ਮੁਖ ਵਾਤਾਵਰਣ ਇੰਜਨੀਅਰ, ਇੰਜੀ. (ਡਾ) ਕਰੂਨੇਸ਼ ਗਰਗ ਨੇ ਆਪਣੇ ਸੰਬੋਧਨ ਵਿੱਚ ਹੈਜ਼ਰਡਸ ਵੇਸਟ ਦੇ ਖਤਰਨਾਕ ਪ੍ਰਭਾਵ ਇਸ ਸਬੰਧੀ ਰੂਲ / ਨਿਯਮਾਂ, ਟਰੈਕਿੰਗ ਸਿਸਟਮ ਦੀ ਅਜੋਕੇ ਸਮੇਂ ਵਿੱਚ ਉਪਯੋਗਤਾ ਅਤੇ ਸਾਰਿਆਂ ਤੋਂ ਸਹਿਯੋਗ ਸਬੰਧੀ ਉਮੀਦ ਰੱਖਦਿਆਂ ਉਹਨਾਂ ਦਾ ਇਸ ਵਿੱਚ ਭਾਗ ਲੈਣ ਲਈ ਧੰਨਵਾਦ ਵੀ ਕੀਤਾ। ਮੁੱਖ ਵਾਤਾਵਰਣ ਇੰਜਨੀਅਰ ਰਾਜੀਵ ਗੋਇਲ  ਨੇ ਵੀ ਇਸ ਟਰੈਕਿੰਗ ਸਿਸਟਮ ਸਬੰਧੀ ਆਪਣੇ ਵਿਚਾਰ ਰੱਖੇ।
ਇਸ ਮੌਕੇ ਡਾ. ਦੀਪਤੀ ਕਪਿਲ, ਸਹਾਇਕ ਡਾਇਰੈਕਟਰ, ਸੀਪੀਸੀਬੀ ਨੇ ਇਸ ਮੋਡਿਊਲ ਦਾ ਲਾਈਵ ਉਪਯੋਗ ਕਰਕੇ ਇਸ ਦੀ ਵਿਸਥਾਰਪੂਰਵਕ ਜਾਣਕਾਰੀ ਦਿੰਦਿਆਂ ਕਿਹਾ ਕਿ ਹੈਜ਼ਰਡਸ ਵੇਸਟ ਦੀ ਜਨਰੇਸ਼ਨ (ਕਿਸਮ ਅਤੇ ਮਾਤਰਾ) ਤੋਂ ਲੈ ਕੇ ਇਸਦੀ ਡਿਸਪੋਜ਼ਲ ਤਕ ਦੇ ਵੱਖ ਵੱਖ ਪੜਾਵਾਂ ਦੇ ਪੂਰੇ ਰਿਕਾਰਡ ਦੀ ਜਾਣਕਾਰੀ ਰਹੇਗੀ।
ਪ੍ਰਸ਼ਨ-ਉੱਤਰ ਮੌਕੇ ਸਨਅਤਕਾਰਾਂ ਨੇ ਇਸ ਮੋਡਿਊਲ ਦੇ ਉਪਯੋਗ ਸਬੰਧੀ ਬਹੁਤ ਸਾਰੇ ਪ੍ਰਸ਼ਨ/ਸ਼ੰਕੇ ਜ਼ਾiਹਰ ਕੀਤੇ,  ਜਿਨਾਂ ਦਾ ਕੇਂਦਰੀ ਟੀਮ ਵੱਲੋਂ ਸਵਾਗਤ ਕਰਦਿਆਂ ਸੰਤੋਸ਼ਜਨਕ ਜਵਾਬ ਦਿੱਤਾ ਗਿਆ। ਉਹਨਾਂ ਕਿਹਾ ਕਿ ਕਾਨੂੰਨੀ ਤੌਰ 'ਤੇ ਹੈਜ਼ਰਡਸ ਵੇਸਟ ਨਾਲ ਸੰਬੰਧਿਤ ਵਪਾਰੀ/ਸਨਅਤਕਾਰ ਨੂੰ ਇਸ ਪੋਰਟਲ 'ਤੇ ਰਜਿਸਟਰੇਸ਼ਨ ਕਰਨੀ ਜ਼ਰੂਰੀ ਹੈ। ਪੰਜਾਬ ਪ੍ਰਦੂਸ਼ਣ ਰੋਕਥਾਮ ਬੋਰਡ ਦੇ ਚੇਅਰਮੈਨ ਪ੍ਰੋਫੈਸਰ (ਡਾ.) ਆਦਰਸ਼ ਪਾਲ ਵਿਗ, ਜੋ ਆਪਣੇ ਦਫਤਰੀ ਰੁਝੇਵਿਆਂ ਕਾਰਨ ਇਸ ਪ੍ਰੋਗਰਾਮ ਵਿੱਚ ਨਹੀਂ ਪਹੁੰਚ ਸਕੇ ਅਤੇ ਲਗਾਤਾਰ ਇਸ ਪ੍ਰੋਗਰਾਮ ਨੂੰ ਵੈਬੈਕਸ ਰਾਹੀਂ ਦੇਖ ਰਹੇ ਸਨ, ਨੇ ਆਨਲਾਈਨ ਆਪਣੇ ਸੰਬੋਧਨ ਵਿੱਚ ਸਾਰਿਆਂ ਦਾ ਸਵਾਗਤ ਤੇ ਧੰਨਵਾਦ ਕਰਦਿਆਂ ਕਿਹਾ ਕਿ ਹਵਾ ਤੇ ਪਾਣੀ ਦੇ ਪ੍ਰਦੂਸ਼ਣ ਤੋਂ ਕਾਫੀ ਅੱਗੇ ਲੰਘ ਕੇ ਹੋਰ ਬਹੁਤ ਸਾਰੇ ਪ੍ਰਦੂਸ਼ਣਾਂ ਵਿੱਚ ਹੈਜ਼ਰਡਸ ਵੇਸਟ ਨੂੰ ਅਜੋਕੇ ਸਮੇਂ ਵਿਗਿਆਨਕ ਤੇ ਸੁਚੱਜੇ ਢੰਗ ਨਾਲ ਸਾਂਭਣਾ, ਰੀਸਾਈਕਲ, ਰੀਪ੍ਰੋਸੈਸ ਅਤੇ ਵਿਗਿਆਨਕ ਤਰੀਕੇ ਨਾਲ ਇਸਦਾ ਪ੍ਰਬੰਧਨ ਵੀ ਕੁਦਰਤ ਦੀ ਵੱਡੀ ਸੇਵਾ ਹੈ।
ਇਸ ਮਿਲਣੀ ਵਿੱਚ ਬੋਰਡ ਵੱਲੋਂ ਉਚੇਚੇ ਤੌਰ 'ਤੇ ਸੀਨੀਅਰ ਵਾਤਾਵਰਣ ਇੰਜੀਨੀਅਰ ਲਵਨੀਤ ਦੂਬੇ, ਇੰਜੀਨੀਅਰ (ਡਾ.) ਰਾਜੀਵ ਗੁਪਤਾ, ਇੰਜੀ: ਸਮਿਤਾ, ਇੰਜੀ: ਕੁਲਦੀਪ ਸਿੰਘ,  ਇੰਜੀ: ਰਵਿੰਦਰ ਭੱਟੀ, ਇੰਜੀ: ਵਿਜੇ ਕੁਮਾਰ, ਇੰਜੀ: ਗੁਰਸ਼ਰਨ ਦਾਸ ਅਤੇ ਬੋਰਡ ਦੇ ਹੋਰ ਬਹੁਤ ਸਾਰੇ ਅਧਿਕਾਰੀਆਂ ਨੇ ਸ਼ਿਰਕਤ ਕੀਤੀ। ਪੀਪੀਸੀਬੀ ਹੈਜ਼ਰਡਸ ਸ਼ਾਖਾ ਦੇ ਸੀਨੀਅਰ ਵਾਤਾਵਰਨ ਇੰਜੀਨੀਅਰ ਪਰਵੀਨ ਸਲੂਜਾ ਨੇ ਇਸ ਪ੍ਰੋਗਰਾਮ ਨੂੰ ਸਫਲ ਬਣਾਉਣ ਵਿੱਚ ਭੂਮਿਕਾ ਨਿਭਾਉਣ ਵਾਲਿਆਂ, ਸਾਰੇ ਮਹਿਮਾਨਾਂ, ਬੋਰਡ ਆਫਿਸਰਾਂ, ਵਪਾਰੀਆਂ ਅਤੇ ਸਨਅਤਕਾਰਾਂ  ਦਾ ਧੰਨਵਾਦ ਕੀਤਾ।