ਐਸ ਏ ਐਸ ਨਗਰ, 5 ਜੁਲਾਈ- ਚੰਡੀਗੜ੍ਹ ਗਰੁੱਪ ਆਫ ਕਾਲਜਿਜ਼ ਝੰਜੇੜੀ, ਮੁਹਾਲੀ ਵੱਲੋਂ ਨਾਰਕੋਟਿਕਸ ਕੰਟਰੋਲ ਬਿਊਰੋ, ਚੰਡੀਗੜ੍ਹ ਜ਼ੋਨਲ ਯੂਨਿਟ ਨਾਲ ਸਾਂਝੇਦਾਰੀ ਕਰਕੇ ਅੰਤਰਰਾਸ਼ਟਰੀ ਨਸ਼ਾ ਰੋਧੀ ਦਿਵਸ ਮੌਕੇ ਐਂਟੀ ਨਾਰਕੋਟਿਕ ਸਾਈਕਲੋਥਾਨ 2025 ਦਾ ਆਯੋਜਨ ਕੀਤਾ। ਇਸ ਸਾਈਕਲੋਥਾਨ ਨੂੰ ਮੁੱਖ ਮਹਿਮਾਨ ਸੰਬਿਤ ਮਿਸ਼ਰਾ (ਡਾਇਰੈਕਟਰ, ਐਨ ਸੀ ਬੀ ਜ਼ੋਨਲ ਹੈੱਡਕੁਆਟਰ, ਮੁਹਾਲੀ) ਵੱਲੋਂ ਹਰੀ ਝੰਡੀ ਦਿਖਾ ਕੇ ਰਵਾਨਾ ਕੀਤਾ ਗਿਆ। 
ਆਪਣੇ ਸੰਬੋਧਨ ਦੌਰਾਨ ਸ੍ਰੀ ਮਿਸ਼ਰਾ ਨੇ ਨਸ਼ਾ ਮੁਕਤ ਭਾਰਤ ਦੀ ਲੋੜ ਅਤੇ ਇਸ ਲਈ ਸਾਰੇ ਸਮਾਜ ਦੇ ਸਾਂਝੇ ਯਤਨਾਂ ’ਤੇ ਜ਼ੋਰ ਦਿੱਤਾ। ਇਸ ਮੌਕੇ ਅਮਨਜੀਤ ਸਿੰਘ, ਆਈ.ਆਰ.ਐਸ., ਐਡੀਸ਼ਨਲ ਡਾਇਰੈਕਟਰ, ਐਨ ਸੀ ਬੀ, ਚੰਡੀਗੜ੍ਹ, ਸੁਨੀਲ ਕੁਮਾਰ, ਭਾਰਤੀ ਹੈਂਡਬਾਲ ਕੋਚ ਅਤੇ ਸਾਬਕਾ ਏ.ਆਈ.ਯੂ. ਖਿਡਾਰੀ, ਸੁਰੇਸ਼ ਕੁਮਾਰ, ਸਾਬਕਾ ਪ੍ਰੋ ਕਬੱਡੀ ਲੀਗ ਖਿਡਾਰੀ ਅਮਨਦੀਪ ਸਿੰਘ, ਸਟੀਲ ਮੈਨ ਆਫ ਇੰਡੀਆ ਅਤੇ ਐਮ.ਐਮ.ਏ. ਫਾਈਟਰ ਮਨਦੀਪ ਕੌਸ਼ਿਕ, ਜ਼ਿਲ੍ਹਾ ਸਪੋਰਟਸ ਅਫਸਰ ਵਿਸ਼ੇਸ਼ ਮਹਿਮਾਨਾਂ ਵਿੱਚ ਸ਼ਾਮਲ ਸਨ। 
ਇਸ ਰੈਲੀ ਵਿੱਚ 300 ਤੋਂ ਵੱਧ ਸਾਈਕਲ ਸਵਾਰਾਂ ਨੇ ਹਿੱਸਾ ਲਿਆ। ਇਹ ਰੈਲੀ ਸਵੇਰੇ ਸੈਕਟਰ 66 ਮੁਹਾਲੀ ਤੋਂ ਆਰੰਭ ਹੋ ਕੇ ਸੀ ਜੀ ਸੀ ਝੰਜੇੜੀ ਤੱਕ ਕੱਢੀ ਗਈ। ਇਸ ਦੌਰਾਨ ਰਾਹ ਵਿੱਚ ਹਾਈਡ੍ਰੇਸ਼ਨ ਅਤੇ ਸੁਰੱਖਿਆ ਚੈਕ ਪੁਆਇੰਟ ਵੀ ਲਗਾਏ ਗਏ। ਰੈਲੀ ਖਤਮ ਹੋਣ ’ਤੇ ਸੀ ਜੀ ਸੀ ਝੰਜੇੜੀ ਵਿੱਚ ਹੋਏ ਸਨਮਾਨ ਸਮਾਰੋਹ ਵਿੱਚ ਮਰਦ ਅਤੇ ਮਹਿਲਾ ਵਰਗਾਂ ਦੇ ਟੌਪ ਪਰਫਾਰਮਰਾਂ ਨੂੰ ਸਨਮਾਨਿਤ ਕੀਤਾ ਗਿਆ ਅਤੇ ਸਾਰੇ ਭਾਗੀਦਾਰਾਂ ਨੂੰ ਈ-ਸਰਟੀਫਿਕੇਟ ਦਿੱਤੇ ਗਏ। 
ਇਸ ਮੌਕੇ ਸੀ ਜੀ ਸੀ ਝੰਜੇੜੀ ਦੇ ਐਮ.ਡੀ. ਅਰਸ਼ ਧਾਲੀਵਾਲ ਨੇ ਕਿਹਾ ਕਿ ਨੌਜਵਾਨਾਂ ਨੂੰ ਨਸ਼ਿਆਂ ਦੇ ਮਾਰੂ ਪ੍ਰਭਾਵਾਂ ਬਾਰੇ ਜਾਗਰੂਕ ਕਰਨਾ ਸਾਡੀ ਨੈਤਿਕ ਜ਼ਿੰਮੇਵਾਰੀ ਹੈ। ਇਹ ਸਾਈਕਲੋਥਾਨ ਸਿਰਫ ਇੱਕ ਸਮਾਗਮ ਨਹੀਂ ਸੀ, ਸਗੋਂ ਨਸ਼ਾ ਮੁਕਤ ਸਮਾਜ ਦੇ ਨਿਰਮਾਣ ਲਈ ਸਾਡੀ ਸਮੂਹਿਕ ਪ੍ਰਤੀਬੱਧਤਾ ਦਾ ਪ੍ਰਤੀਕ ਸੀ।