ਐਸ ਏ ਐਸ ਨਗਰ, 19 ਮਈ- ਐਚ ਐਮ ਹਾਊਸਿੰਗ ਵੈਲਫੇਅਰ ਐਸੋਸੀਏਸ਼ਨ ਫੇਜ-4 ਨੇ ਮੰਗ ਕੀਤੀ ਹੈ ਕਿ ਐਚ ਐਮ ਦੇ ਮਕਾਨਾਂ ਵਿੱਚ ਲੱਗੇ ਬਿਜਲੀ ਦੇ ਖੰਭਿਆਂ ਤੇ ਬਿਜਲੀ ਦੀਆਂ ਉਲਝੀਆਂ ਤਾਰਾਂ ਦੀ ਸਮੱਸਿਆ ਦਾ ਹੱਲ ਕੀਤਾ ਜਾਵੇ।
ਐਸੋਸੀਏਸ਼ਨ ਦੇ ਚੇਅਰਮੈਨ ਸ. ਐਨ ਐਸ ਕਲਸੀ, ਪ੍ਰਧਾਨ ਸ. ਸੁਖਦੀਪ ਸਿੰਘ ਅਤੇ ਸੀਨੀਅਰ ਮੀਤ ਪ੍ਰਧਾਨ ਸ੍ਰੀ ਈਸ਼ ਕੁਮਾਰ ਨੇ ਕਿਹਾ ਕਿ ਐਚ ਮਕਾਨਾਂ ਦੇ ਬਾਹਰ ਲੱਗੇ ਖੰਭਿਆਂ ਤੇ ਬਿਜਲੀ ਦੀਆਂ ਤਾਰਾਂ ਦੇ ਮਕੜ ਜਾਲ ਬਣ ਗਏ ਹਨ, ਜਿਸ ਤੋਂ ਐਚ ਐਮ ਮਕਾਨਾਂ ਦੇ ਵਸਨੀਕ ਬਹੁਤ ਤੰਗ ਹਨ। ਉਹਨਾਂ ਕਿਹਾ ਕਿ ਜੇਕਰ ਕਿਤੇ ਬਿਜਲੀ ਖਰਾਬ ਹੋ ਜਾਵੇ ਤਾਂ ਫਾਲਟ ਲੱਭਣ ਵਿੱਚ ਬਹੁਤ ਮੁਸ਼ਕਲ ਆਉਂਦੀ ਹੈ।
 ਉਹਨਾਂ ਕਿਹਾ ਕਿ ਇੱਥੇ ਖੰਭਿਆਂ ਤੇ ਆਏ ਦਿਨ ਕੋਈ ਨਾ ਕੋਈ ਕੰਪਨੀ ਵਾਲਾ ਆਪਣੀਆਂ ਤਾਰਾਂ ਲਗਾ ਦਿੰਦਾ ਹੈ ਜਿਸ ਕਾਰਨ ਪਤਾ ਹੀ ਨਹੀਂ ਲੱਗਦਾ ਕਿ ਕਿਹੜੀ ਤਾਰ ਕਿਸ ਕੰਪਨੀ ਦੀ ਹੈ ਅਤੇ ਇਸ ਕਾਰਨ ਹਾਦਸਾ ਹੋਣ ਦਾ ਵੀ ਖਦਸ਼ਾ ਬਣਿਆ ਰਹਿੰਦਾ ਹੈ।
ਉਹਨਾਂ ਨਗਰ ਨਿਗਮ, ਸਥਾਨਕ ਪ੍ਰਸ਼ਾਸਨ ਅਤੇ ਬਿਜਲੀ ਵਿਭਾਗ ਤੋਂ ਮੰਗ ਕੀਤੀ ਹੈ ਕਿ ਇਸ ਸਮੱਸਿਆ ਦਾ ਤੁਰੰਤ ਹੱਲ ਕੀਤਾ ਜਾਵੇ ਅਤੇ ਵਸਨੀਕਾਂ ਨੂੰ ਤਾਰਾਂ ਦੇ ਮਕੜ ਜਾਲ ਤੋਂ ਨਿਜਾਤ ਦਿਵਾਈ ਜਾਵੇ।