ਨਵਾਂਸ਼ਹਿਰ - ਸ਼੍ਰੀ ਸਿੱਧ ਬਾਬਾ ਬਾਲਕ ਨਾਥ ਸੇਵਕ ਸੇਵਾ ਦਲ ਦੇ ਮੀਡੀਆ ਇੰਚਾਰਜ ਨੇ ਦੱਸਿਆ ਕਿ ਚੇਤ ਮਹੀਨੇ ਦੇ ਮੇਲੇ ਦੀ ਸ਼ੁਰੂਆਤ  ਪ੍ਰਸਿੱਧ ਸ਼ਕਤੀਪੀਠ ਸਿੱਧ ਜੋਗੀ ਬਾਬਾ ਬਾਲਕ ਨਾਥ ਮੰਦਰ ਦਿਓਟ ਸਿੱਧ ਵਿਖੇ ਹਜ਼ਾਰਾਂ ਸ਼ਰਧਾਲੂਆਂ ਦੀ ਹਾਜ਼ਰੀ ਵਿੱਚ ਪੂਜਾ, ਹਵਨ ਅਤੇ ਝੰਡੇ ਦੀ ਰਸਮ ਨਾਲ ਹੋਈ। ਡੀਸੀ ਹਮੀਰਪੁਰ ਅਮਰਜੀਤ ਸਿੰਘ ਨੇ ਮੰਦਰ ਦੇ ਮੁੱਖ ਮੰਦਰ ਵਿੱਚ ਪੂਜਾ ਅਰਚਨਾ ਅਤੇ ਹਵਨ ਕਰਕੇ ਝੰਡਾ ਚੜ੍ਹਾਉਣ ਦੀ ਰਸਮ ਅਦਾ ਕੀਤੀ। ਇਸ ਮੌਕੇ ਗੱਦੀਨਸ਼ੀਨ ਮਹੰਤ ਰਾਜਿੰਦਰ ਗਿਰੀ, ਐਸਪੀ ਪਦਮ ਸਿੰਘ, ਏਡੀਸੀ ਮਨੀਸ਼ ਯਾਦਵ, ਡੀਐਸਪੀ ਬਡਸਰ ਸਚਿਨ ਹਿਰੇਮਠ , ਐਸਡੀਐਮ ਡਾ. ਰੋਹਿਤ ਸ਼ਰਮਾ, ਐਸ.ਐਚ.ਓ ਪ੍ਰਵੀਨ ਰਾਣਾ, ਮੰਦਰ ਅਧਿਕਾਰੀ ਧਰਮਪਾਲ ਨੇਗੀ ਅਤੇ ਹੋਰ ਪ੍ਰਸ਼ਾਸਨਿਕ ਅਧਿਕਾਰੀ ਵਿਸ਼ੇਸ਼ ਤੌਰ 'ਤੇ ਹਾਜ਼ਰ ਸਨ |  ਇਸ ਸਬੰਧੀ ਜਾਣਕਾਰੀ ਦਿੰਦਿਆਂ ਨਵਾਂਸ਼ਹਿਰ ਤੋਂ ਵਾਸਦੇਵ ਪਰਦੇਸੀ ਨੇ ਕਿਹਾ ਕਿ ਝੰਡੇ ਦੀ ਰਸਮ ਪੂਰੀ ਹੁੰਦੇ ਹੀ ਮੰਦਰ ਕੰਪਲੈਕਸ ਅਤੇ ਸ਼ਿਵਾਲਿਕ ਦੀਆਂ ਪਹਾੜੀਆਂ ਦੁੱਧਧਾਰੀ ਅਤੇ ਪੌਣਾਹਾਰੀ ਦੇ ਜੈਕਾਰਿਆਂ ਨਾਲ ਗੂੰਜ ਉੱਠੀਆਂ। 14 ਅਪ੍ਰੈਲ ਤੱਕ ਚੱਲਣ ਵਾਲੇ ਚੈਤਰ ਮਹੀਨੇ ਦੇ ਮੇਲੇ ਦੇ ਪਹਿਲੇ ਦਿਨ ਪੰਜਾਬ, ਹਰਿਆਣਾ, ਦਿੱਲੀ ਅਤੇ ਦੇਸ਼-ਵਿਦੇਸ਼ ਤੋਂ ਹਜ਼ਾਰਾਂ ਦੀ ਗਿਣਤੀ ਵਿੱਚ ਸੰਗਤਾਂ ਬਾਬਾ ਜੀ ਦੇ ਦਰਬਾਰ ਵਿੱਚ ਪੁੱਜੀਆਂ ਅਤੇ ਬਾਬਾ ਜੀ ਦੇ ਦਰਸ਼ਨ ਕਰਕੇ ਅਸ਼ੀਰਵਾਦ ਲਿਆ।