ਸਾਹਿਬਜ਼ਾਦਾ ਅਜੀਤ ਸਿੰਘ ਨਗਰ, 18 ਅਗਸਤ: ਜ਼ਿਲ੍ਹਾ ਸਾਹਿਬਜ਼ਾਦਾ ਅਜੀਤ ਸਿੰਘ ਨਗਰ ਦੇ ਆਈ.ਟੀ.ਆਈਜ਼ ਵਿਖੇ ਵੱਖ-ਵੱਖ ਟਰੇਡਾਂ ਵਿੱਚ ਸਾਲ 2025-2026 ਲਈ ਦਾਖਲਾ ਪ੍ਰਕਿਰਿਆ ਸ਼ੁਰੂ ਹੋ ਚੁੱਕੀ ਹੈ, ਜਿਸ ਵਿੱਚ ਲੋੜੀਂਦੀ ਯੋਗਤਾ ਦਸਵੀਂ ਅਤੇ ਬਾਰਵੀਂ ਪਾਸ ਅਤੇ ਉਮਰ ਸੀਮਾ- ਘੱਟੋ-ਘੱਟ ਉਮਰ 14 ਸਾਲ ਹੈ। ਵਿਦਿਆਰਥੀ ਆਪਣੀ ਨਜ਼ਦੀਕੀ ਆਈ.ਟੀ.ਆਈ. ਵਿੱਚ ਦਾਖਲੇ ਲਈ ਅਪਲਾਈ ਕਰ ਸਕਦੇ ਹਨ।
      ਇਹ ਜਾਣਕਾਰੀ ਦਿੰਦਿਆਂ ਜ਼ਿਲ੍ਹਾ ਰੋਜ਼ਗਾਰ ਤੇ ਕਾਰੋਬਾਰ ਬਿਊਰੋ, ਸਾਹਿਬਜ਼ਾਦਾ ਅਜੀਤ ਸਿੰਘ ਨਗਰ ਦੇ ਡਿਪਟੀ ਡਾਇਰੈਕਟਰ, ਹਰਪ੍ਰੀਤ ਸਿੰਘ ਮਾਨਸ਼ਾਹੀਆ ਵੱਲੋਂ ਦੱਸਿਆ ਗਿਆ ਕਿ ਆਈ.ਟੀ.ਆਈਜ਼ ਵੱਲੋਂ ਵੱਖ-ਵੱਖ ਟਰੇਡਾਂ ਸਬੰਧੀ ਕੋਰਸ ਜਿਵੇਂ ਕਿ ਵੈਲਡਰ, ਫੀਟਰ, ਮੋਟਰ ਮਕੈਨਿਕ, ਇਲਕੈਟ੍ਰੀਕਲ, ਕੋਪਾ ਅਤੇ ਸਿਲਾਈ,ਕਢਾਈ ਆਦਿ ਚਲਾਏ ਜਾ ਰਹੇ ਹਨ। ਪ੍ਰਾਰਥੀ ਆਪਣੀ ਰੁਚੀ ਅਤੇ ਯੋਗਤਾ ਅਨੁਸਾਰ ਕਿਸੇ ਵੀ ਕੋਰਸ ਵਿੱਚ ਦਾਖਲਾ ਲੈ ਸਕਦੇ ਹਨ ਤਾਂ ਜੋ ਭਵਿੱਖ ਵਿੱਚ ਚੰਗੀ ਨੌਕਰੀ ਜਾਂ ਸਵੈ ਰੁਜਗਾਰ ਕਰ ਸਕਣ।
     ਉਨ੍ਹਾਂ ਦੱਸਿਆ ਕਿ  ਆਈ.ਟੀ.ਆਈਜ਼ ਵਿੱਚ ਲੜਕੇ ਅਤੇ ਲੜਕੀਆਂ ਦੋਵੇਂ ਦਾਖਲਾ ਲੈ ਸਕਦੇ ਹਨ। ਉਨ੍ਹਾਂ ਉਮੀਦਵਾਰਾਂ ਨੂੰ ਅਪੀਲ ਕਰਦਿਆ ਕਿਹਾ ਕਿ ਇਸ ਮੌਕੇ ਦਾ ਵੱਧ ਤੋਂ ਵੱਧ ਲਾਹਾ ਲਿਆ ਜਾਵੇ। ਵਧੇਰੇ ਜਾਣਕਾਰੀ ਲਈ ਪ੍ਰਾਰਥੀ ਆਪਣੀ ਨਜ਼ਦੀਕੀ ਆਈ.ਟੀ.ਆਈ ਨਾਲ ਸੰਪਰਕ ਕਰਨ।