ਐਸ ਏ ਐਸ ਨਗਰ, 12 ਮਾਰਚ- ਮੁਹਾਲੀ ਪੁਲੀਸ ਨੇ ਤੀਜੀ ਕਮਾਂਡੋ ਬਟਾਲੀਅਨ ਵਿੱਚ ਨਿਯੁਕਤ ਬਬਨਜੀਤ ਸਿੰਘ ਨਾਮ ਦੇ ਇੱਕ ਵਿਅਕਤੀ ਅਤੇ ਉਸਦੇ ਇੱਕ ਸਾਥੀ ਮਨਪ੍ਰੀਤ ਸੰਧੂ ਨੂੰ ਪਿੰਡ ਸੋਹਾਣਾ ਵਿੱਚ ਹੱਡੀਆਂ ਦਾ ਕਲੀਨਿਕ ਚਲਾਉਣ ਵਾਲੇ ਰਮਨ ਕੁਮਾਰ ਨੂੰ ਨਸ਼ਿਆਂ ਦੇ ਕੇਸ ਵਿੱਚ ਫਸਾਉਣ ਦੀ ਧਮਕੀ ਦੇ ਕੇ ਉਸਦੇ ਗੱਲੇ ਤੋਂ ਨਕਦ ਰਕਮ ਵਸੂਲਣ ਦੇ ਦੋਸ਼ ਹੇਠ ਕਾਬੂ ਕੀਤਾ ਹੈ।
ਇਸ ਸੰਬੰਧੀ ਜਾਣਕਾਰੀ ਦਿੰਦਿਆਂ ਡੀ. ਐਸ. ਪੀ. ਸਿਟੀ 2 ਸ੍ਰੀ ਹਰਸਿਮਰਨ ਸਿੰਘ ਬੱਲ ਨੇ ਦੱਸਿਆ ਕਿ ਇਹਨਾਂ ਵਿਅਕਤੀਆਂ ਨੂੰ ਐਸ. ਐਸ. ਪੀ. ਸ੍ਰੀ ਦੀਪਕ ਪਾਰਿਕ ਦੀ ਅਗਵਾਈ ਹੇਠ ਸਮਾਜ ਵਿਰੋਧੀ ਅਨਸਰਾਂ ਖਿਲਾਫ ਚਲਾਈ ਜਾ ਰਹੀ ਮੁਹਿੰਮ ਤਹਿਤ ਥਾਣਾ ਸੋਹਾਣਾ ਦੇ ਮੁੱਖ ਅਫਸਰ ਇੰਸਪੈਕਟਰ ਸਿਮਰਨ ਸਿੰਘ ਦੀ ਅਗਵਾਈ ਹੇਠ ਕਾਬੂ ਕੀਤਾ ਗਿਆ ਹੈ।
ਉਨ੍ਹਾਂ ਦੱਸਿਆ ਕਿ ਸੈਕਟਰ 77, ਸੋਹਾਣਾ ਵਿੱਚ ਹੱਡੀਆਂ ਦੇ ਇਲਾਜ ਦਾ ਕਲੀਨਿਕ ਚਲਾਉਣ ਵਾਲੇ ਰਮਨ ਕੁਮਾਰ ਵਲੋਂ ਸ਼ਿਕਾਇਤ ਦਿੱਤੀ ਗਈ ਸੀ ਕਿ ਬੀਤੀ 8 ਮਾਰਚ ਨੂੰ ਪੰਜਾਬ ਪੁਲੀਸ ਦੀ ਵਰਦੀ ਪਾ ਕੇ ਉਸਦੀ ਦੁਕਾਨ ਵਿੱਚ ਆਏ ਬਬਨਪ੍ਰੀਤ ਸਿੰਘ (ਜੋ ਖੁਦ ਨੂੰ ਸੀ. ਆਈ. ਏ. ਸਟਾਫ ਦਾ ਮੁਲਾਜਮ ਦੱਸ ਰਿਹਾ ਸੀ) ਨੇ ਆਪਣੇ ਜੇਬ ਵਿਚੋਂ ਕੁਝ ਨਸ਼ੀਲੇ ਪਦਾਰਥ ਕੱਢ ਕੇ ਉਸਦੇ ਕਲੀਨਕ ਵਿੱਚ ਰੱਖੇ ਅਤੇ ਕਿਹਾ ਕਿ ਤੁਸੀਂ ਨਸ਼ੀਲੇ ਪਦਾਰਥ ਵੇਚਦੇ ਹੋ। ਬਾਅਦ ਵਿੱਚ ਬਬਨਜੀਤ ਵਲੋਂ ਉਸਦੇ ਕਲੀਨਕ ਵਿਚੋਂ ਫੋਨ ਅਤੇ 30,000/- ਨਕਦ ਗੱਲੇ ਵਿਚ ਕੱਢ ਲਏ ਅਤੇ ਆਪਣੀ ਗੱਡੀ ਵਿੱਚ ਬੈਠਾ ਕੇ ਛੱਡਣ ਦੀ ਏਵਜ ਵਿੱਚ ਰੁਪਏ 2 ਲੱਖ ਦੀ ਮੰਗ ਕੀਤੀ ਹੈ।
ਉਨ੍ਹਾਂ ਦੱਸਿਆ ਕਿ ਪੁਲੀਸ ਵਲੋਂ ਇਸ ਸੰਬੰਧੀ ਬਬਨਜੀਤ ਸਿੰਘ ਉਰਫ ਬੱਬਲੂ ਵਾਸੀ ਨਾਨਕ ਨਗਰੀ ਮੋਗਾ ਅਤੇ ਮਨਪ੍ਰੀਤ ਸੰਧੂ ਉਰਫ ਮੰਨੂ ਸੰਧੂ ਵਾਸੀ ਅਨੰਦ ਨਗਰੀ, ਅਬੋਹਰ ਜਿਲ੍ਹਾ ਫਾਜ਼ਿਲਕਾ ਦੇ ਖਿਲਾਫ ਬੀ. ਐਨ. ਐਸ. ਦੀ ਧਾਰਾ 308(2),303(2), 35,61 (2),351(2) ਤਹਿਤ ਮਾਮਲਾ ਦਰਜ ਕਰਕੇ ਇਹਨਾਂ ਦੋਵਾਂ ਨੂੰ ਕਾਬੂ ਕੀਤਾ ਗਿਆ। ਉਨ੍ਹਾਂ ਦੱਸਿਆ ਕਿ ਤਫਤੀਸ਼ ਦੌਰਾਨ ਬਬਨਜੀਤ ਸਿੰਘ ਨੇ ਪੁੱਛਗਿਛ ਵਿੱਚ ਦੱਸਿਆ ਕਿ ਉਹ ਤੀਜੀ ਕਮਾਡੋ ਬਟਾਲੀਅਨ ਵਿਚ ਭਰਤੀ ਹੈ ਅਤੇ ਹੁਣ ਰਿਟਾ. ਆਈ.ਏ.ਐਸ. ਨਾਲ ਗੰਨਮੈਨ ਤਾਇਨਾਤ ਹੈ। 
ਬਬਨਜੀਤ ਦੇ ਸਾਥੀ ਮਨਪ੍ਰੀਤ ਸੰਧੂ ਤੇ ਜਿੰਦ ਸਿੱਧੂ ਨਾਲ ਮਿਲ ਕੇ ਮੈਡੀਕਲ ਦੀ ਦੁਕਾਨ ਤੋਂ ਦੁਕਾਨਦਾਰ ਨੂੰ ਧਮਕੀ ਦਿੰਦੇ ਹੋਏ ਸੀ.ਆਈ.ਏ. ਸਟਾਫ ਦੱਸਕੇ ਮੋਬਾਇਲ ਫੋਨ ਤੇ ਪੈਸੇ ਚੁੱਕ ਲਏ ਅਤੇ ਜਿੰਦ ਸੰਧੂ ਦੇ ਗੂਗਲਪੇਅ ਤੇ 42500/- ਰੁਪਏ ਭਿਜਵਾ ਦਿੱਤੇ ਸੀ। ਉਨ੍ਹਾਂ ਦੱਸਿਆ ਕਿ ਇਸ ਮਾਮਲੇ ਵਿੱਚ ਜਿੰਦ ਸੰਧੂ ਦੀ ਗ੍ਰਿਫਤਾਰੀ ਅਜੇ ਬਾਕੀ ਹੈ ਅਤੇ ਇਹਨਾਂ ਵਿਅਕਤੀਆਂ ਦਾ ਪੁਲੀਸ ਰਿਮਾਂਡ ਹਾਸਲ ਕਰਕੇ ਡੂੰਘਾਈ ਨਾਲ ਪੁੱਛਗਿਛ ਕੀਤੀ ਜਾਵੇਗੀ।