ਨਵਾਂਸ਼ਹਿਰ- ਇੱਕ ਮਹੀਨਾ ਕੈਨੇਡਾ ਰਹਿਣ ਤੋਂ ਬਾਅਦ ਵਤਨ ਪਰਤੇ ਨਾਮ‌ਵਰ ਸ਼ਾਇਰਾ ਰਜਨੀ ਸ਼ਰਮਾ ਨੇ ਅਨੇਕਾਂ ਯਾਦਾਂ ਸਾਂਝੀਆਂ ਕੀਤੀਆਂ। ਉਹਨਾਂ ਦੱਸਿਆ ਕਿ ਸੱਤ ਸਮੁੰਦਰਾਂ ਤੋਂ ਪਾਰ ਵਸੇ ਇਸ ਦੇਸ਼ ਨੇ ਪੰਜਾਬੀ ਵਰਗ ਲਈ ਅਨੇਕਾਂ ਮੌਕੇ ਪ੍ਰਦਾਨ ਕੀਤੇ ਅਤੇ ਉੱਥੇ ਵਸੇ ਪੰਜਾਬੀ ਪਰਿਵਾਰ ਉੱਥੇ ਦੇ ਚੌਗਿਰਦੇ ਅੰਦਰ ਆਪਣੇ ਵਿਰਸੇ ਅਤੇ ਬੋਲੀ ਦਾ ਰੰਗ ਵਰਸਾਉਣ ਵਿੱਚ ਵੀ ਸਫ਼ਲ ਹੋਏ ਹਨ। ਉਹਨਾਂ ਕਿਹਾ ਕਿ ਉਹਨਾਂ ਦੇ ਦੋਵੇਂ ਫਰਜ਼ੰਦ ਕੈਨੇਡਾ ਰਹਿੰਦੇ ਹਨ ਅਤੇ ਉਹਨਾਂ ਨੂੰ ਮਿਲਣ ਬਹਾਨੇ ਉਹ ਕੈਨੇਡਾ ਦੇਸ਼ ਦੀ ਵਾਤਾਵਰਣ ਅਤੇ ਸਲੀਕਾਦਾਰੀ ਪੱਖੋਂ ਨਿਵੇਕਲੀ ਪ੍ਰਵਿਰਤੀ ਦੇ ਅਨੇਕਾਂ ਅਹਿਸਾਸ ਨਾਲ ਲੈ ਕੇ ਪਰਤੇ ਹਨ।
         ਨਵਜੋਤ ਸਾਹਿਤ ਸੰਸਥਾ ਵਲੋਂ ਸ਼ਾਇਰਾ ਰਜਨੀ ਸ਼ਰਮਾ ਦਾ ਨਵਜੋਤ ਸਾਹਿਤ ਸੰਸਥਾ ਔਡ਼ ਦੇ ਬੈਨਰ ਹੇਠ ਵਤਨ ਵਾਪਸੀ ’ਤੇ ਨਿੱਘਾ ਸਵਾਗਤ ਕੀਤਾ ਗਿਆ ਅਤੇ ਸ਼ੁੱਭ ਕਾਮਨਾਵਾਂ ਦਿੱਤੀਆਂ ਗਈਆਂ। ਸੰਸਥਾ ਦੇ ਪ੍ਰਧਾਨ ਸੁਰਜੀਤ ਮਜਾਰੀ ਨੇ ਦੱਸਿਆ ਕਿ ਰਜਨੀ ਸ਼ਰਮਾ ਸੰਸਥਾ ਦੇ ਸਾਬਕਾ ਪ੍ਰਧਾਨ ਹਨ ਅਤੇ ਉਹਨਾਂ ਦਾ ਸਾਹਿਤਕ ਖੇਤਰ ਵਿੱਚ ਵਿਲੱਖਣ ਮੁਕਾਮ ਹੈ। ਸੰਸਥਾ ਵਲੋਂ ਉਹਨਾਂ ਦੇ ਸਵਾਗਤ ਹਿੱਤ ਹਾਰ ਪਾਹਿਨਾਏ ਗਏ ਅਤੇ ਯਾਦਗਾਰੀ ਤੋਹਫ਼ਾ ਪ੍ਰਦਾਨ ਕੀਤਾ ਗਿਆ।
         ਇਸ ਮੌਕੇ ਹਾਜ਼ਰ ਮੈਂਬਰਾਂ ਵਿੱਚ ਸੰਸਥਾ ਦੇ ਸਕੱਤਰ ਰਾਜਿੰਦਰ ਜੱਸਲ, ਸਾਬਕਾ ਪ੍ਰਧਾਨ ਗੁਰਨੇਕ ਸ਼ੇਰ, ਦੇਸ ਰਾਜ ਬਾਲੀ, ਸਮਾਜ ਸੇਵੀ ਅਮਿ੍ਤਾ ਸੈਣੀ, ਦਵਿੰਦਰ ਸਕੋਹਪੁਰੀ ਸ਼ਾਮਲ ਸਨ। ਇਹਨਾਂ ਵਲੋਂ ਰਜਨੀ ਸ਼ਰਮਾ ਨੂੰ ਉੱਥੋ ਦੇ ਵੱਖ ਵੱਖ ਪੱਖਾਂ ਬਾਰੇ ਸਵਾਲ ਵੀ ਸਾਂਝੇ ਕੀਤੇ ਗਏ ਜਿਹਨਾਂ ਦੇ ਜਵਾਬ ਵਿੱਚ ਉਹਨਾਂ ਉੱਥੋਂ ਦੇ ਰਹਿਣ ਸਹਿਣ, ਆਵਾਯਾਈ ਪਬੰਧ ਅਤੇ ਵਾਤਾਵਰਣ ਦੀ ਸ਼ੁੱਧਤਾ ਸਬੰਧੀ ਵਿਚਾਰਾਂ ਦੀ ਸਾਂਝ ਪਾਈ।
          ਰਜਨੀ ਸ਼ਰਮਾ ਦੇ ਇਸ ਵਿਦੇਸ਼ ਫੇਰੀ ਦੌਰਾਨ ਉਹਨਾ ਦੇ ਜੀਵਨ ਸਾਥੀ ਵਿਨੈ ਸ਼ਰਮਾ ਵੀ ਨਾਲ ਸਨ ਉਹਨਾਂ ਨੇ ਵੀ ਆਪਣੀ ਇਸ ਕੈਨੇਡਾ ਫੇਰੀ ਨੂੰ ਅਭੁੱਲ ਦੱਸਿਆ ਅਤੇ ਉੱਥੇ ਦੇਖੀਆਂ ਵੱਖ ਵੱਖ ਥਾਵਾਂ ਬਾਰੇ ਜਾਣਕਾਰੀ ਵੀ ਸਾਂਝੀ ਕੀਤੀ। ਇਸ ਮੌਕੇ ਹਾਜ਼ਰੀਨ ਵਲੋਂ ਸਾਹਿਤ ਦੀਆਂ ਵੱਖ ਵੱਖ ਕਾਵਿ ਵੰਨਗੀਆਂ ਵੀ ਸਾਂਝੀਆਂ ਕੀਤੀਆਂ ਗਈਆਂ।