ਪਟਿਆਲਾ, 2 ਅਕਤੂਬਰ - ਪੰਜਾਬੀ ਯੂਨੀਵਰਸਿਟੀ ਵਿਖੇ ਰੰਗਮੰਚ ਅਤੇ ਫ਼ਿਲਮ ਪ੍ਰੋਡਕਸ਼ਨ ਵਿਭਾਗ ਵੱਲੋਂ ਸ਼ਹੀਦ ਭਗਤ ਸਿੰਘ ਦੇ ਜਨਮ ਦਿਹਾੜੇ ਨੂੰ ਸਮਰਪਿਤ ਨਾਟਕ 'ਛਿਪਣ ਤੋਂ ਪਹਿਲਾਂ' ਦਾ ਮੰਚਨ ਕੀਤਾ ਗਿਆ। ਦਵਿੰਦਰ ਦਮਨ ਵੱਲੋਂ ਲਿਖਿਤ ਇਸ ਨਾਟਕ ਨੂੰ ਬਲਕਰਨ ਬਰਾੜ ਨੇ ਨਿਰਦੇਸ਼ਿਤ ਕੀਤਾ। 
ਵਿਭਾਗ ਮੁਖੀ ਡਾ. ਹਰਜੀਤ ਨੇ ਇਸ ਸਬੰਧੀ ਜਾਣਕਾਰੀ ਦਿੰਦਿਆਂ ਦੱਸਿਆ ਕਿ ਕੋਆਰਡੀਨੇਟਰ ਡਾ. ਜਸਪਾਲ ਦਿਓਲ ਦੀ ਅਗਵਾਈ ਵਿੱਚ ਵਿਭਾਗ ਵਿੱਚ ਐੱਮ.ਏ. ਥੀਏਟਰ ਅਤੇ ਫਿਲਮ ਪ੍ਰੋਡਕਸ਼ਨ ਕਰ ਰਹੇ ਵਿਦਿਆਰਥੀਆਂ ਵੱਲੋਂ ਇਸ ਪੇਸ਼ਕਾਰੀ ਵਿੱਚ ਸ਼ਿਰਕਤ ਕੀਤੀ ਗਈ। ਨਾਟਕ ਦੀ ਕਹਾਣੀ ਸ਼ਹੀਦ ਭਗਤ ਸਿੰਘ ਵੱਲੋਂ ਜੇਲ੍ਹ ਵਿੱਚ ਬਿਤਾਏ ਗਏ ਸਮੇਂ ਨਾਲ਼ ਸਬੰਧਤ ਹੈ। ਨਾਟਕ ਵਿੱਚ ਵਿਖਾਇਆ ਗਿਆ ਹੈ ਕਿ ਭਗਤ ਸਿੰਘ ਕਿੰਨਾ ਮਹਾਨ ਮਨੁੱਖ ਸੀ। 
ਨਾਟਕ ਵਿੱਚ ਵਿਖਾਇਆ ਗਿਆ  ਕਿ ਉਹ ਜੇਲ੍ਹ ਵਿੱਚ ਮੈਲਾ ਚੁੱਕਣ ਵਾਲੇ ਕਰਮਚਾਰੀ ਨੂੰ ਕਿਸ ਤਰ੍ਹਾਂ ਆਪਣੀ ਮਾਂ ਦੇ ਬਰਾਬਰ ਦਰਜਾ ਦਿੰਦਾ ਹੈ। ਨਾਟਕ ਵਿੱਚ ਸ਼ਹੀਦ ਭਗਤ ਦੀ ਭੂਮਿਕਾ ਗੁਰਸੇਵਕ ਸਿੰਘ ਨੇ ਨਿਭਾਈ। ਬੋਘੇ ਦੀ ਭੂਮਿਕਾ ਵਿਚ ਗਗਨਦੀਪ ਸਿੰਘ ਸੰਧੂ, ਮਾਂ ਦੀ ਭੂਮਿਕਾ ਵਿੱਚ ਜੋਤ ਬੈਨੀਵਾਲ ਤੇ ਵਕੀਲ ਦੀ ਭੂਮਿਕਾ ਵਿੱਚ ਮਨਪ੍ਰੀਤ ਸਿੰਘ ਨੇ ਆਪਣੀ ਅਦਾਕਾਰੀ ਨਾਲ ਪੂਰਾ ਪ੍ਰਭਾਵ ਛੱਡਿਆ।