ਚੰਡੀਗੜ੍ਹ, 27 ਅਕਤੂਬਰ, 2026:- ਪੋਸਟਗ੍ਰੈਜੂਏਟ ਇੰਸਟੀਚਿਊਟ ਆਫ਼ ਮੈਡੀਕਲ ਐਜੂਕੇਸ਼ਨ ਐਂਡ ਰਿਸਰਚ (ਪੀਜੀਆਈਐਮਈਆਰ), ਚੰਡੀਗੜ੍ਹ ਨੇ ਹਾਲ ਹੀ ਵਿੱਚ ਲਖਨਊ ਵਿਖੇ ਹੋਈ ਅਕੈਡਮੀ ਆਫ਼ ਪੀਡੀਆਟ੍ਰਿਕ ਨਿਊਰੋਲੋਜੀ, ਇੰਡੀਆ ਦੀ 25ਵੀਂ ਕੌਮੀ ਕਾਨਫਰੰਸ NEUROPEDICON 2026 ਵਿੱਚ ਵਿਸ਼ੇਸ਼ ਪ੍ਰਾਪਤੀ ਦਰਜ ਕੀਤੀ।
ਪੀਜੀਆਈਐਮਈਆਰ, ਚੰਡੀਗੜ੍ਹ ਦੇ ਬਾਲ ਰੋਗ ਵਿਭਾਗ ਦੀ ਪੀਡੀਆਟ੍ਰਿਕ ਨਿਊਰੋਲੋਜੀ ਯੂਨਿਟ ਦੇ ਪ੍ਰੋ. ਜਿਤੇਂਦਰ ਕੁਮਾਰ ਸਾਹੂ, ਜੋ ਅਕੈਡਮੀ ਆਫ਼ ਪੀਡੀਆਟ੍ਰਿਕ ਨਿਊਰੋਲੋਜੀ, ਇੰਡੀਆ ਦੇ ਕੌਮੀ ਪ੍ਰਧਾਨ ਵੀ ਹਨ, ਨੇ ਕਾਨਫਰੰਸ ਵਿੱਚ ਪ੍ਰਧਾਨਗੀ ਭਾਸ਼ਣ ਦਿੱਤਾ। ਇਹ ਭਾਸ਼ਣ ਸੰਸਥਾ ਦੇ ਸਭ ਤੋਂ ਵੱਕਾਰੀ ਅਕਾਦਮਿਕ ਸੰਬੋਧਨਾਂ ਵਿੱਚੋਂ ਇੱਕ ਹੈ। ਇਹ ਭਾਰਤ ਵਿੱਚ ਬਾਲ ਤੰਤੂ-ਵਿਗਿਆਨ, ਖ਼ਾਸ ਕਰਕੇ ਬਚਪਨ ਦੀ ਮਿਰਗੀ ਦੇ ਖੇਤਰ ਵਿੱਚ ਪ੍ਰੋ. ਸਾਹੂ ਦੀ ਅਗਵਾਈ ਅਤੇ ਉਨ੍ਹਾਂ ਦੇ ਨਿਰੰਤਰ ਯੋਗਦਾਨ ਨੂੰ ਦਰਸਾਉਂਦਾ ਹੈ।
ਸੰਸਥਾ ਦੀਆਂ ਪ੍ਰਾਪਤੀਆਂ ਵਿੱਚ ਇੱਕ ਹੋਰ ਵਾਧਾ ਕਰਦਿਆਂ, ਪੀਜੀਆਈਐਮਈਆਰ, ਚੰਡੀਗੜ੍ਹ ਦੀ ਪੀਡੀਆਟ੍ਰਿਕ ਨਿਊਰੋਲੋਜੀ ਯੂਨਿਟ ਦੀ ਸੀਨੀਅਰ ਰੈਜ਼ੀਡੈਂਟ ਡਾ. ਸੌਰਾਜਾ ਦੱਤਾ ਨੂੰ ਇਨਫੈਂਟਾਈਲ ਐਪੀਲੇਪਟਿਕ ਸਪਾਜ਼ਮਜ਼ ਸਿੰਡਰੋਮ ਦੇ ਮਹਾਂਮਾਰੀ-ਵਿਗਿਆਨ ਵਿੱਚ ਸਮੇਂ ਦੇ ਨਾਲ ਆਏ ਰੁਝਾਨਾਂ ਬਾਰੇ ਉਨ੍ਹਾਂ ਦੇ ਖੋਜ-ਕਾਰਜ ਲਈ ਸਰਵੋਤਮ ਮੌਖਿਕ ਪੇਸ਼ਕਾਰੀ ਪੁਰਸਕਾਰ ਮਿਲਿਆ।
NEUROPEDICON ਦੇ 25ਵੇਂ ਸੰਸਕਰਣ ਵਿੱਚ ਦੇਸ਼ ਭਰ ਤੋਂ ਬਾਲ ਤੰਤੂ-ਰੋਗ ਮਾਹਿਰਾਂ, ਬਾਲ ਰੋਗ ਮਾਹਿਰਾਂ, ਖੋਜਕਰਤਾਵਾਂ ਅਤੇ ਸਿਖਿਆਰਥੀਆਂ ਨੇ ਹਿੱਸਾ ਲਿਆ। ਕਾਨਫਰੰਸ ਦੌਰਾਨ ਤੰਤੂ-ਸੰਬੰਧੀ ਰੋਗਾਂ ਤੋਂ ਪੀੜਤ ਬੱਚਿਆਂ ਦੀ ਜਾਂਚ, ਇਲਾਜ ਅਤੇ ਦੇਖਭਾਲ ਵਿੱਚ ਹੋਈਆਂ ਨਵੀਆਂ ਤਰੱਕੀਆਂ ਬਾਰੇ ਵਿਚਾਰ-ਵਟਾਂਦਰਾ ਕੀਤਾ ਗਿਆ।
ਇਸ ਕੌਮੀ ਮੰਚ ’ਤੇ ਪੀਜੀਆਈਐਮਈਆਰ ਦੀ ਟੀਮ ਨੂੰ ਮਿਲੀ ਇਹ ਮਾਨਤਾ ਬਾਲ ਤੰਤੂ-ਵਿਗਿਆਨ ਦੇ ਖੇਤਰ ਵਿੱਚ ਉੱਤਮ ਕਲੀਨਿਕਲ ਦੇਖਭਾਲ, ਖੋਜ ਅਤੇ ਸਿਖਲਾਈ ਪ੍ਰਤੀ ਸੰਸਥਾ ਦੀ ਨਿਰੰਤਰ ਵਚਨਬੱਧਤਾ ਨੂੰ ਉਜਾਗਰ ਕਰਦੀ ਹੈ।
