ਹੁਸ਼ਿਆਰਪੁਰ, 03 ਅਕਤੂਬਰ (ਦਲਜੀਤ ਅਜਨੋਹਾ):- 30 ਸਤੰਬਰ ਨੂੰ ਫਲਾਈਦੁਬਈ ਏਅਰਲਾਈਨ ਦੀ ਦੁਬਈ ਤੋਂ ਤੇਲ ਅਵੀਵ ਜਾ ਰਹੀ ਉਡਾਣ, ਜਿਸ ਨੂੰ ਭਾਰਤੀ ਮੂਲ ਦੇ ਕੈਪਟਨ ਸਮਿਤ ਮੱਛਾਰ ਚਲਾ ਰਹੇ ਸਨ, ਕੈਪਟਨ ਸਮਿਤ ਦੀ ਸੁਚੇਤਤਾ ਅਤੇ ਬਹਾਦਰੀ ਕਾਰਨ ਭਿਆਨਕ ਹਾਦਸੇ ਤੋਂ ਬਚ ਗਈ, ਨਹੀਂ ਤਾਂ ਜਹਾਜ਼ ਵਿੱਚ ਸਵਾਰ 174 ਬੇਕਸੂਰਾਂ ਦੀਆਂ ਕੀਮਤੀ ਜਾਨਾਂ ਬੇਵਜ੍ਹਾ ਚਲੀਆਂ ਜਾਂਦੀਆਂ। ਸਾਬਕਾ ਕੈਬਨਿਟ ਮੰਤਰੀ ਅਤੇ ਸੀਨੀਅਰ ਭਾਜਪਾ ਆਗੂ ਤੀਕਸ਼ਣ ਸੂਦ ਨੇ ਕਿਹਾ ਹੈ ਕਿ ਪਾਇਲਟ ਕੈਪਟਨ ਸਮਿਤ ਮੱਛਾਰ ਦੀ ਬਹਾਦਰੀ ਦੀ ਪੂਰੀ ਦੁਨੀਆ ਵਿੱਚ ਪ੍ਰਸ਼ੰਸਾ ਹੋ ਰਹੀ ਹੈ। ਜੇਕਰ ਇਹ ਜਹਾਜ਼ ਸਹਿ-ਪਾਇਲਟ ਦੀ ਯੋਜਨਾ ਅਨੁਸਾਰ ਕਿਸੇ ਇਮਾਰਤ ਨਾਲ ਟਕਰਾ ਦਿੱਤਾ ਜਾਂਦਾ ਤਾਂ ਵਧੇਰੇ ਮਨੁੱਖੀ ਜਾਨਾਂ ਦਾ ਨੁਕਸਾਨ ਹੋ ਸਕਦਾ ਸੀ, ਜਿਵੇਂ ਕਿ 9-11 ਦੀ ਘਟਨਾ ਵਿੱਚ ਹੋਇਆ ਸੀ।
ਉਨ੍ਹਾਂ ਕਿਹਾ ਕਿ ਇਸ ਸਾਰੇ ਮਾਮਲੇ ਵਿੱਚ ਕੈਪਟਨ ਸਮਿਤ ਮੱਛਾਰ ਦੀ ਪ੍ਰਧਾਨ ਮੰਤਰੀ ਸ੍ਰੀ ਨਰਿੰਦਰ ਮੋਦੀ ਨਾਲ ਵੀਡੀਓ ਕਾਲ ਰਾਹੀਂ ਹੋਈ ਗੱਲਬਾਤ ਬਹੁਤ ਮਹੱਤਵਪੂਰਨ ਹੈ, ਜਿਸ ਵਿੱਚ ਪਾਇਲਟ ਸਮਿਤ ਨੇ ਕਿਹਾ ਕਿ ਇਸ ਭਿਆਨਕ ਸੰਕਟ ਦੀ ਘੜੀ ਵਿੱਚ ਉਨ੍ਹਾਂ ਦੇ ਸਾਹਮਣੇ ਸਿਰਫ਼ 174 ਕੀਮਤੀ ਜਾਨਾਂ ਬਚਾਉਣ ਦਾ ਟੀਚਾ ਸੀ ਅਤੇ ਨੈਤਿਕ ਸਹਾਰੇ ਲਈ ਉਨ੍ਹਾਂ ਨੇ ਆਸਥਾ ਦਾ ਪੱਲਾ ਫੜਦਿਆਂ ਲਗਾਤਾਰ ਹਨੂੰਮਾਨ ਚਾਲੀਸਾ ਦਾ ਪਾਠ ਕੀਤਾ। ਸ੍ਰੀ ਸੂਦ ਨੇ ਕਿਹਾ ਕਿ ਪਾਇਲਟ ਮੱਛਾਰ ਦੀ ਬਹਾਦਰੀ ਨੇ ਸਾਬਤ ਕਰ ਦਿੱਤਾ ਹੈ ਕਿ ਆਸਥਾ ਅਤੇ ਸੰਸਕਾਰ ਵਿਅਕਤੀ ਨੂੰ ਔਖੀ ਤੋਂ ਔਖੀ ਮੁਸ਼ਕਲ ਵਿੱਚੋਂ ਵੀ ਬਾਹਰ ਕੱਢ ਸਕਦੇ ਹਨ। ਇਹ ਭਾਰਤੀ ਸੰਸਕਾਰ ਹੀ ਸਨ, ਜਿਨ੍ਹਾਂ ਕਾਰਨ ਕੈਪਟਨ ਸਮਿਤ ਮੱਛਾਰ ਨੇ ਆਪਣੀ ਜਾਨ ਦੀ ਪਰਵਾਹ ਨਾ ਕਰਦਿਆਂ ਸਹਿ-ਪਾਇਲਟ ਵੱਲੋਂ ਚਾਕੂਆਂ ਨਾਲ ਬੁਰੀ ਤਰ੍ਹਾਂ ਜ਼ਖਮੀ ਕੀਤੇ ਜਾਣ ਦੇ ਬਾਵਜੂਦ ਬਹਾਦਰੀ ਦਿਖਾਈ ਅਤੇ ਜਹਾਜ਼ ਨੂੰ ਹਾਦਸਾਗ੍ਰਸਤ ਹੋਣ ਤੋਂ ਬਚਾ ਲਿਆ। ਅਜਿਹਾ ਕਰਕੇ ਪਾਇਲਟ ਕੈਪਟਨ ਸਮਿਤ ਮੱਛਾਰ ਨੇ ਪੂਰੀ ਦੁਨੀਆ ਵਿੱਚ ਭਾਰਤ ਦਾ ਸਿਰ ਉੱਚਾ ਕੀਤਾ ਅਤੇ ਬਹਾਦਰੀ ਦੀ ਮਿਸਾਲ ਕਾਇਮ ਕੀਤੀ।
