ਐਸ ਏ ਐਸ ਨਗਰ, 13 ਮਾਰਚ - ਮੁਹਾਲੀ ਪੁਲੀਸ ਨੇ 12 ਅਤੇ 13 ਮਾਰਚ ਦੀ ਦਰਮਿਆਨੀ ਰਾਤ ਨੂੰ ਥਾਣਾ ਮਾਜਰੀ ਦੇ ਖੇਤਰ ਵਿੱਚ ਪੈਂਦੇ ਖਿਜਰਾਬਾਦ ਦੇ ਪੈਟਰੋਲ ਪੰਪ ਨੇੜਿਉਂ ਇੱਕ ਟਰੱਕ ਵਿੱਚ ਸਵਾਰ ਦੋ ਵਿਅਕਤੀਆਂ ਨੂੰ 3 ਕਿਲੋ ਅਫੀਮ ਸਮੇਤ ਕਾਬੂ ਕੀਤਾ ਹੈ। ਇਸ ਸੰਬੰਧੀ ਜਾਣਕਾਰੀ ਦਿੰਦਿਆਂ ਪੁਲੀਸ ਦੇ ਬੁਲਾਰੇ ਨੇ ਦੱਸਿਆ ਕਿ ਪੁਲੀਸ ਵਲੋਂ ਇਹਨਾਂ ਵਿਅਕਤੀਆਂ ਨੂੰ ਐਸ ਐਸ ਪੀ ਡਾ. ਸੰਦੀਪ ਕੁਮਾਰ ਗਰਗ ਦੇ ਦਿਸ਼ਾ ਨਿਰਦੇਸ਼ਾਂ ਅਨੁਸਾਰ ਐਸ ਪੀ ਸ੍ਰੀਮਤੀ ਜੋਤੀ ਯਾਦਵ ਅਤੇ ਡੀ ਐਸ ਪੀ ਸz ਹਰਸਿਮਰਨ ਸਿੰਘ ਦੀ ਨਿਗਰਾਨੀ ਹੇਠ ਮਾੜੇ ਅਨਸਰਾਂ ਵਿਰੁੱਧ ਚਲਾਈ ਜਾ ਰਹੀ ਮੁਹਿੰਮ ਦੌਰਾਨ ਇੰਸਪੈਕਟਰ ਹਰਮਿੰਦਰ ਸਿੰਘ ਇੰਚਾਰਜ ਸੀ ਆਈ ਏ ਸਟਾਫ ਮੁਹਾਲੀ (ਕੈਂਪ ਐਟ ਖਰੜ) ਦੀ ਟੀਮ ਵੱਲੋ ਕਾਬੂ ਕੀਤਾ ਗਿਆ ਹੈ।
ਉਹਨਾਂ ਦੱਸਿਆ ਕਿ ਪੁਲੀਸ ਪਾਰਟੀ ਵਲੋਂ ਗਸ਼ਤ ਦੌਰਾਨ ਪੰਪ ਤੋਂ ਥੋੜਾ ਅੱਗੇ ਸੱਜੇ ਹੱਥ ਗ੍ਰਾੳੇਡ ਵਿੱਚ ਖੜ੍ਹੇ ਟਰੱਕ ਨੰਬਰ ਪੀ ਬੀ 65 ਐਕਸ-5607 (ਜਿਸ ਵਿੱਚ ਇਹ ਦੋਵੇਂ ਵਿਅਕਤੀ ਸਵਾਰ ਸਨ) ਦੇ ਕੈਬਿਨ ਵਿੱਚੋਂ 2 ਕਿਲੋਗ੍ਰਾਮ ਅਫੀਮ ਬ੍ਰਾਮਦ ਕੀਤੀ ਹੈ। ਇਸ ਸਬੰਧੀ ਥਾਣਾ ਬਲਾਕ ਮਾਜਰੀ ਵਿਖੇ ਐਨ ਡੀ ਪੀ ਐਸ ਐਕਟ ਦੀ ਧਾਰਾ 18-61-85 ਅਧੀਨ ਮਾਮਲਾ ਦਰਜ ਕੀਤਾ ਗਿਆ ਹੈ। ਉਹਨਾਂ ਦੱਸਿਆ ਕਿ ਫੜੇ ਗਏ ਵਿਅਕਤੀਆਂ ਦੀ ਪਹਿਚਾਣ ਗੁਰਪ੍ਰੀਤ ਸਿੰਘ ਉਰਫ ਸੋਨੀ ਵਾਸੀ ਪਿੰਡ ਫਾਟਵਾਂ ਥਾਣਾ ਬਲਾਕ ਮਾਜਰੀ ਅਤੇ ਕੁਲਵਿੰਦਰ ਸਿੰਘ ਉਰਫ ਗੋਲੂ ਵਾਸੀ ਪਿੰਡ ਖੇੜਾ ਥਾਣਾ ਬਲਾਕ ਮਾਜਰੀ ਵਜੋਂ ਹੋਈ ਹੈ।
ਬੁਲਾਰੇ ਨੇ ਦੱਸਿਆ ਕਿ ਪੁੱਛਗਿੱਛ ਦੌਰਾਨ ਗੁਰਪ੍ਰੀਤ ਸਿੰਘ (ਜਿਸਦੀ ਉਮਰ ਕਰੀਬ 31 ਸਾਲ ਹੈ ਤੇ ਸਾਦੀ ਸੁਦਾ ਹੈ) ਨੇ ਦੱਸਿਆ ਕਿ ਉਹ 7ਵੀਂ ਤਕ ਪੜ੍ਹਿਆ ਹੈ ਅਤੇ ਕਰੀਬ 5 ਸਾਲ ਤੋਂ ਟਰੱਕ ਡਰਾਇਵਰੀ ਕਰਦਾ ਹੈ। ਉਸ ਤੋਂ ਪਹਿਲਾ ਟੈਕਸੀ ਚਲਾਉਂਦਾ ਸੀ। ਗੁਰਪ੍ਰੀਤ ਸਿੰਘ ਨੇ ਦੱਸਿਆ ਕਿ ਉਹ ਕਰੀਬ ਦੋ ਮਹੀਨੇ ਤੋਂ ਕੁਲਵਿੰਦਰ ਸਿੰਘ ਦਾ ਟਰੱਕ ਚਲਾਉਂਦਾ ਹੈ ਅਤੇ ਬੀਤੀ 23 ਫਰਵਰੀ ਨੂੰ ਚੰਡੀਗੜ ਤੋਂ ਕਲਕਤਾ ਪੇਂਟ ਲੈ ਕੇ ਗਿਆ ਸੀ ਅਤੇ ਵਾਪਸੀ ਵਿੱਚ ਕਲਕੱਤਾ ਤੋਂ ਲੁਧਿਆਣਾ ਦੀਆਂ ਲੋਹੇ ਦੀਆਂ ਪਾਈਪਾਂ ਲੋਡ ਕੀਤੀਆ ਸੀ। ਰਸਤੇ ਵਿੱਚ ਉਸਨੇ ਬਾਰਾਚੱਟੀ ਝਾੜਖੰਡ ਤੋਂ ਅਫੀਮ ਦੀ ਖੇਪ ਲਈ ਸੀ, ਜੋ ਉਸ ਨੇ ਟਰੱਕ ਮਾਲਕ ਕੁਲਵਿੰਦਰ ਸਿੰਘ ਨਾਲ ਮਿਲ ਕੇ ਅੱਗੇ ਸਪਲਾਈ ਕਰਨੀ ਸੀ। ਬੁਲਾਰੇ ਨੇ ਦੱਸਿਆ ਕਿ ਗੁਰਪ੍ਰੀਤ ਵਿਰੁਧ ਪਹਿਲਾਂ ਥਾਣਾ ਮੁੱਲਾਪੁਰ ਵਿਖੇ ਖੈਰ ਦੀ ਲੱਕੜ ਚੋਰੀ ਕਰਨ ਦਾ ਮੁੱਕਦਮਾ ਵੀ ਦਰਜ ਹੈ।
ਦੂਜੇ ਵਿਅਕਤੀ ਕੁਲਵਿੰਦਰ ਸਿੰਘ (ਜਿਸਦੀ ਉਮਰ ਕਰੀਬ 41 ਸਾਲ ਹੈ ਤੇ ਸ਼ਾਦੀ ਸ਼ੁਦਾ ਹੈ) ਨੇ ਪੁੱਛਗਿੱਛ ਦੌਰਾਨ ਪੁਲੀਸ ਨੂੰ ਦੱੋਿਸਆ ਕਿ ਉਹ 4 ਕਲਾਸਾਂ ਪਾਸ ਹੈ ਅਤੇ ਕਰੀਬ 4 ਸਾਲ ਤੋਂ ਟਰੱਕ ਡਰਾਇਵਰੀ ਕਰਦਾ ਹੈ। 2 ਸਾਲ ਪਹਿਲਾਂ ਉਸ ਨੇ ਆਪਣਾ ਟਰੱਕ ਖਰੀਦਿਆ ਸੀ ਅਤੇ ਉਸਨੇ ਆਪਣੇ ਡਰਾਇਵਰ ਗੁਰਪ੍ਰੀਤ ਸਿੰਘ ਨਾਲ ਮਿਲ ਕੇ ਇਹ ਅਫੀਮ ਮੰਗਵਾਈ ਸੀ ਜੋ ਉਸ ਨੇ ਅੱਗੇ ਆਪਣੇ ਗ੍ਰਾਹਕਾ ਨੂੰ ਵੇਚਣੀ ਸੀ। ਕੁਲਵਿੰਦਰ ਸਿੰਘ ਵਿਰੁਧ ਪਹਿਲਾਂ ਵੀ ਥਾਣਾ ਚੂਰੁ ਰਾਜਸਥਾਨ ਵਿਖੇ 44 ਕਿਲੋਗ੍ਰਾਮ ਚੂਰਾ ਪੋਸਤ ਦਾ ਮੁੱਕਦਮਾ ਦਰਜ ਹੈ, ਜਿਸ ਵਿੱਚ ਉਹ ਜਮਾਨਤ ਤੇ ਚੱਲ ਰਿਹਾ ਹੈ।
ਬੁਲਾਰੇ ਨੇ ਦੱਸਿਆ ਕਿ ਇਹਨਾਂ ਦੋਵਾਂ ਨੂੰ ਅੱਜ ਮਾਨਯੋਗ ਅਦਾਲਤ ਵਿੱਚ ਪੇਸ਼ ਕਰਕੇ 4 ਦਿਨ ਦਾ ਪੁਲੀਸ ਰਿਮਾਂਡ ਹਾਸਲ ਕੀਤਾ ਗਿਆ ਹੈ ਅਤੇ ਉਹਨਾਂ ਤੋਂ ਹੋਰ ਪੁੱਛਗਿੱਛ ਕੀਤੀ ਜਾ ਰਹੀ ਹੈ।