ਐਸ.ਏ.ਐਸ. ਨਗਰ, 31 ਮਈ- ਈ.ਐਸ.ਆਈ.ਸੀ. ਬੀਮਾਯੁਕਤ ਵਿਅਕਤੀ ਸਤਨਾਮ ਸਿੰਘ ਲਾਈਨਮੈਨ ਨੂੰ ਅਪੰਗਤਾ ਲਾਭ ਨਹੀਂ ਦੇ ਰਿਹਾ ਹੈ, ਜਿਸ ਨੇ ਬੀਤੇ ਸਾਲ ਡਿਊਟੀ ਦੌਰਾਨ ਐਚ.ਟੀ. ਲਾਈਨ, ਉਦਯੋਗਿਕ ਖੇਤਰ, ਫੇਜ਼-7, ਮੁਹਾਲੀ ਤੇ ਕੰਮ ਕਰਦੇ ਸਮੇਂ ਬਿਜਲੀ ਦੇ ਝਟਕੇ ਕਾਰਨ ਆਪਣੇ ਦੋਵੇਂ ਹੱਥ ਗੁਆ ਦਿੱਤੇ।
ਇਸ ਸੰਬੰਧੀ ਜਾਣਕਾਰੀ ਦਿੰਦਿਆਂ ਐਡਵੋਕੇਟ ਜਸਬੀਰ ਸਿੰਘ ਨੇ ਦੱਸਿਆ ਕਿ ਸਤਨਾਮ ਸਿੰਘ 28 ਅਗਸਤ 2024 ਨੂੰ ਈ.ਐਸ.ਆਈ.ਸੀ. ਦਫਤਰ ਦੇ ਨੇੜੇ, ਉਦਯੋਗਿਕ ਖੇਤਰ, ਫੇਜ਼-7 ਵਿਖੇ ਐਚ.ਟੀ. ਲਾਈਨ ਤੇ ਕੰਮ ਕਰਦੇ ਸਮੇਂ ਬਿਜਲੀ ਦੇ ਕਰੰਟ ਕਾਰਨ ਖੰਭੇ ਤੋਂ ਡਿੱਗ ਗਿਆ ਸੀ। ਉਸ ਨੇ ਆਪਣੀਆਂ ਦੋਵੇਂ ਬਾਹਾਂ ਗੁਆ ਦਿੱਤੀਆਂ ਅਤੇ ਉਸ ਦੇ ਮਾਲਕ ਵੱਲੋਂ ਆਨਲਾਈਨ ਦੁਰਘਟਨਾ ਰਿਪੋਰਟ 6 ਸਤੰਬਰ 2024 ਨੂੰ ਜਮ੍ਹਾ ਕਰਵਾਈ ਗਈ ਸੀ।
ਉਹਨਾਂ ਦੱਸਿਆ ਕਿ ਹਾਦਸੇ ਤੋਂ ਬਾਅਦ ਸਤਨਾਮ ਸਿੰਘ ਨੂੰ ਸਥਾਨਕ ਆਈ.ਵੀ.ਵਾਈ. ਹਸਪਤਾਲ ਲਿਜਾਇਆ ਗਿਆ ਜਿੱਥੇ ਉਸ ਦਾ 28 ਅਗਸਤ 2024 ਤੋਂ 1 ਅਕਤੂਬਰ 2024 ਤੱਕ ਇਨਡੋਰ ਇਲਾਜ ਚੱਲਿਆ। ਉਸ ਸਮੇਂ ਉਸ ਨੂੰ ਹੋਰ ਇਲਾਜ ਦੀ ਲੋੜ ਸੀ ਕਿਉਂਕਿ ਉਸ ਦੀ ਖੱਬੀ ਬਾਂਹ ਕੱਟ ਦਿੱਤੀ ਗਈ ਸੀ, ਹਾਲਾਂਕਿ ਈ.ਐਸ.ਆਈ.ਸੀ. ਨੇ ਹਸਪਤਾਲ ਦੀ ਹੋਰ ਪ੍ਰਵਾਨਗੀ ਦੀ ਸਲਾਹ ਨੂੰ ਨਜ਼ਰਅੰਦਾਜ਼ ਕਰ ਦਿੱਤਾ ਅਤੇ ਈ.ਐਸ.ਆਈ.ਸੀ. ਤੋਂ ਉਸ ਦੇ ਅਗਲੇ ਇਲਾਜ ਲਈ ਪ੍ਰਵਾਨਗੀ ਨਾ ਮਿਲਣ ਕਾਰਨ ਉਸ ਨੂੰ ਛੁੱਟੀ ਦੇ ਦਿੱਤੀ।
ਉਹਨਾਂ ਦੱਸਿਆ ਕਿ ਸਤਨਾਮ ਸਿੰਘ ਦੇ ਖੱਬੇ ਹੱਥ ਤੋਂ ਉਪਰਲੇ ਹਿੱਸੇ ਵਿੱਚੋਂ ਖੂਨ ਵਹਿਣ ਲੱਗ ਪਿਆ ਅਤੇ ਫਿਰ ਉਸ ਦੇ ਪਰਿਵਾਰ ਉਸ ਨੂੰ ਈ.ਐਸ.ਆਈ. ਹਸਪਤਾਲ, ਮੁਹਾਲੀ ਲੈ ਗਏ ਜਿੱਥੋਂ ਉਸ ਨੂੰ ਇੰਡਸ ਹਸਪਤਾਲ ਮੁਹਾਲੀ ਰੈਫਰ ਕਰ ਦਿੱਤਾ ਗਿਆ ਅਤੇ ਈ.ਐਸ.ਆਈ.ਸੀ. ਵੱਲੋਂ ਸਹੀ ਇਲਾਜ ਨਾ ਹੋਣ ਕਾਰਨ ਉਸ ਨੂੰ ਪੀ.ਜੀ.ਆਈ. ਚੰਡੀਗੜ੍ਹ ਤੋਂ ਇਲਾਜ ਕਰਵਾਉਣ ਲਈ ਮਜਬੂਰ ਕੀਤਾ ਗਿਆ ਜਿੱਥੇ ਉਸ ਨੂੰ 20 ਨਵੰਬਰ ਤੋਂ 19 ਦਸੰਬਰ ਤੱਕ ਦਾਖਲ ਰੱਖਿਆ ਗਿਆ। ਇਨਫੈਕਸ਼ਨ ਕਾਰਨ ਉਸ ਦੀ ਪੂਰੀ ਖੱਬੀ ਬਾਂਹ ਕੱਟ ਦਿੱਤੀ ਗਈ। ਸਤਨਾਮ ਸਿੰਘ ਸਰਕਾਰੀ ਪੌਲੀਟੈਕਨਿਕ ਕਾਲਜ, ਮੁਹਾਲੀ (ਖੂਨੀ ਮਾਜਰਾ) ਤੋਂ ਇਲੈਕਟ੍ਰਿਕ ਡਿਪਲੋਮਾ ਹੋਲਡਰ ਹੈ ਅਤੇ 2 ਦਸੰਬਰ 2020 ਤੋਂ ਪੰਜਾਬ ਸਟੇਟ ਪਾਵਰ ਕਾਰਪੋਰੇਸ਼ਨ ਲਿਮਟਿਡ ਵਿੱਚ ਕੰਟਰੈਕਟੂਅਲ ਲਾਈਨਮੈਨ ਵਜੋਂ ਕੰਮ ਕਰ ਰਿਹਾ ਹੈ।
ਸਤਨਾਮ ਸਿੰਘ ਅਨੁਸਾਰ ਈ.ਐਸ.ਆਈ.ਸੀ. ਨੇ 1 ਅਕਤੂਬਰ 2024 ਨੂੰ ਆਈ.ਵੀ.ਆਈ. ਹਸਪਤਾਲ ਵਿੱਚ ਹੋਰ ਇਲਾਜ ਲਈ ਵਾਧਾ ਦੇ ਦਿੱਤਾ ਗਿਆ ਹੁੰਦਾ ਤਾਂ ਉਸ ਦੀ ਅੱਧੀ ਖੱਬੀ ਬਾਂਹ ਨੂੰ ਬਚਾਇਆ ਜਾ ਸਕਦਾ ਸੀ। ਉਸ ਨੇ ਦੱਸਿਆ ਕਿ ਉਹ ਆਈ.ਪੀ. ਨੰਬਰ 1215299638 ਦੇ ਨਾਲ ਈ.ਐਸ.ਆਈ. ਸਕੀਮ ਦਾ ਮੈਂਬਰ ਸੀ ਅਤੇ ਪੂਰੀ ਜ਼ਿੰਦਗੀ ਲਈ ਪੈਨਸ਼ਨ ਵਜੋਂ ਆਪਣੀ ਆਖਰੀ ਕੱਢੀ ਗਈ ਤਨਖਾਹ ਦਾ 100 ਫੀਸਦੀ ਅਤੇ ਈ.ਐਸ.ਆਈ.ਸੀ. ਤੋਂ ਇਲਾਜ ਅਧੀਨ ਸਮੇਂ ਲਈ ਈ.ਐਸ.ਆਈ. ਛੁੱਟੀ ਦੀ ਤਨਖਾਹ ਲਈ ਯੋਗ ਸੀ। ਹਾਲਾਂਕਿ, ਪਿਛਲੇ 9 ਮਹੀਨਿਆਂ ਤੋਂ ਉਹ ਅਤੇ ਉਸ ਦੇ ਪਰਿਵਾਰਕ ਮੈਂਬਰ ਆਪਣੇ ਲਾਭ ਹਾਸਿਲ ਕਰਨ ਲਈ ਈ.ਐਸ.ਆਈ.ਸੀ. ਦੇ ਫੇਜ਼-7 ਵਿਚਲੇ ਸਥਾਨਕ ਦਫਤਰ ਵਿੱਚ ਕਈ ਵਾਰ ਗਏ ਪਰ ਅਜੇ ਤੱਕ ਉਸ ਨੂੰ ਇੱਕ ਪੈਸਾ ਵੀ ਨਹੀਂ ਮਿਲਿਆ। ਬੀਤੇ ਕੱਲ੍ਹ ਵੀ ਉਹ ਆਪਣੇ ਭਰਾ ਨਾਲ ਈ.ਐਸ.ਆਈ.ਸੀ. ਦੇ ਸਥਾਨਕ ਦਫਤਰ ਗਿਆ ਤਾਂ ਜੋ ਉਸ ਦੀ ਪੈਨਸ਼ਨ ਅਤੇ ਛੁੱਟੀ ਦੀ ਤਨਖਾਹ ਦੀ ਅਦਾਇਗੀ ਬਾਰੇ ਜਾਣਕਾਰੀ ਮਿਲ ਸਕੇ ਪਰ ਈ.ਐਸ.ਆਈ.ਸੀ. ਦਫਤਰ ਦੇ ਸਟਾਫ ਨੇ ਉਹਨਾਂ ਨੂੰ ਖਾਲੀ ਹੱਥ ਵਾਪਸ ਕਰ ਦਿੱਤਾ।
ਉਹਨਾਂ ਦੱਸਿਆ ਕਿ ਸਤਨਾਮ ਸਿੰਘ ਈ.ਐਸ.ਆਈ. ਜਨਰਲ ਰੈਗੂਲੇਸ਼ਨ 1950 ਪੈਰਾ 52 (1) (ਐਫ) ਦੇ ਅਨੁਸਾਰ ਇੱਕ ਮਹੀਨੇ ਤੋਂ ਵੱਧ ਸਮੇਂ ਵਿੱਚ ਸਥਾਈ ਅਪੰਗਤਾ ਲਾਭਾਂ ਦੀ ਪਹਿਲੀ ਅਦਾਇਗੀ ਲਈ ਯੋਗ ਹੈ। ਈ.ਐਸ.ਆਈ.ਸੀ. ਅਧਿਕਾਰੀ ਦਾ ਇਹ ਵੀ ਫਰਜ਼ ਹੈ ਕਿ ਉਹ ਪੂਰੀ ਤਰ੍ਹਾਂ ਅਪੰਗ ਬੀਮਾਯੁਕਤ ਵਿਅਕਤੀ ਦੇ ਘਰ ਜਾਵੇ ਅਤੇ ਸਾਰੀਆਂ ਰਸਮੀ ਕਾਰਵਾਈਆਂ ਪੂਰੀਆਂ ਕਰੇ ਪਰ ਇਸ ਮਾਮਲੇ ਵਿੱਚ ਕੋਈ ਵੀ ਉਸ ਦੇ ਘਰ ਨਹੀਂ ਗਿਆ ਅਤੇ ਨਾ ਹੀ ਕੋਈ ਈ.ਐਸ.ਆਈ. ਲਾਭ ਜਾਰੀ ਕੀਤਾ ਹੈ। ਈ.ਐਸ.ਆਈ. ਐਕਟ ਇੱਕ ਸਮਾਜਿਕ ਸੁਰੱਖਿਆ ਕਾਨੂੰਨ ਹੈ ਅਤੇ ਇਸ ਦਾ ਉਦੇਸ਼ ਬਿਮਾਰੀ, ਜਣੇਪਾ ਅਤੇ ਰੁਜ਼ਗਾਰ ਦੀ ਸੱਟ ਦੇ ਮਾਮਲੇ ਵਿੱਚ ਕਰਮਚਾਰੀਆਂ ਨੂੰ ਕੁਝ ਲਾਭ ਪ੍ਰਦਾਨ ਕਰਨਾ ਹੈ।
ਉਹਨਾਂ ਕਿਹਾ ਕਿ ਇਹ ਗਰੀਬ ਵਿਅਕਤੀ ਪੰਜਾਬ ਅਤੇ ਹਰਿਆਣਾ ਹਾਈ ਕੋਰਟ ਚੰਡੀਗੜ੍ਹ ਦੇ ਮਾਨਯੋਗ ਚੀਫ ਜਸਟਿਸ ਨੂੰ ਨਿਮਰਤਾ ਨਾਲ ਬੇਨਤੀ ਕਰਦਾ ਹੈ ਕਿ ਉਹ ਉਹਨਾਂ ਦੇ ਜਾਇਜ਼ ਈ.ਐਸ.ਆਈ. ਲਾਭਾਂ ਨੂੰ ਸਮੇਂ ਸੀਮਾ ਵਿੱਚ ਜਾਰੀ ਕਰਨ ਲਈ ਖੇਤਰੀ ਡਾਇਰੈਕਟਰ, ਈ.ਐਸ.ਆਈ.ਸੀ., ਮਾਧ ਮਾਰਗ, ਸੈਕਟਰ-19ਏ, ਚੰਡੀਗੜ੍ਹ ਕੋਲ ਉਹਨਾਂ ਦਾ ਮਾਮਲਾ ਉਠਾਉਣ ਕਿਉਂਕਿ ਇਹ ਮਾਮਲਾ ਈ.ਐਸ.ਆਈ.ਸੀ. ਦੁਆਰਾ ਪਹਿਲਾਂ ਹੀ 9 ਮਹੀਨਿਆਂ ਤੋਂ ਵੱਧ ਸਮੇਂ ਤੋਂ ਬੁਰੀ ਤਰ੍ਹਾਂ ਲਟਕਿਆ ਹੋਇਆ ਹੈ।