ਅੱਜ ਵਿਸ਼ਵ ਪੰਜਾਬੀ ਪ੍ਰਚਾਰ ਸਭਾ ਦੇ ਅਹੁਦੇਦਾਰਾਂ ਦੇ ਇਕ ਵਫ਼ਦ ਨੇ ਨਵ-ਨਿਯੁਕਤ ਡੀ.ਈ.ਓ. ਯੂ.ਟੀ. ਚੰਡੀਗੜ੍ਹ ਸ੍ਰੀ ਰਾਜਨ ਜੈਨ ਨਾਲ ਉਨ੍ਹਾਂ ਦੇ ਦਫਤਰ ਸੈਕਟਰ-19, ਚੰਡੀਗੜ੍ਹ ਵਿਖੇ ਭੇਟ ਕੀਤੀ। ਵਫ਼ਦ ਦੇ ਅਹੁਦੇਦਾਰਾਂ ਵਿੱਚ ਪ੍ਰਧਾਨ ਪ੍ਰਿੰਸ ਬਹਾਦਰ ਸਿੰਘ ਗੱਸਲ, ਸੀਨੀਅਰ ਮੀਤ ਪ੍ਰਧਾਨ ਜਗਤਾਰ ਸਿੰਘ ਜੱਸਗ, ਸਟੇਟ ਕਨਵੀਨਰ ਪੰਜਾਬ ਜਸਪਾਲ ਸਿੰਘ ਕੰਵਲ, ਸਲਾਹਕਾਰ ਸੁਰਜਨ ਸਿੰਘ ਜੱਸਲ ਅਤੇ ਬਲਵਿੰਦਰ ਸਿੰਘ ਧਾਰੀਵਾਲ ਨੇ ਸ੍ਰੀ ਰਾਜਨ ਨੂੰ ਨਵੇਂ ਡੀ.ਈ.ਓ. ਬਣਨ ਤੇ ਹਾਰ ਪਾ ਕੇ ਸਵਾਗਤ ਕੀਤਾ ਅਤੇ ਵਧਾਈ ਦਿੱਤੀ।
ਪ੍ਰਿੰਸ ਬਹਾਦਰ ਸਿੰਘ ਗੱਸਲ, ਜੋ ਕਿ 15 ਸਾਲ ਯੂ.ਟੀ. ਭਲਾਈ ਐਸੋਸੀਏਸ਼ਨ ਦੇ ਪ੍ਰਧਾਨ ਰਹੇ ਹਨ, ਨੇ ਦੱਸਿਆ ਕਿ ਉਨ੍ਹਾਂ ਦੀ ਸੰਸਥਾ ਦੇ ਸਮੂਹ ਮੈਂਬਰਾਂ ਨੂੰ ਰਾਜਨ ਜੈਨ ਦੇ ਡੀ.ਈ.ਓ. ਬਣਨ ਤੇ ਬਹੁਤ ਖੁਸ਼ੀ ਹੈ ਕਿਉਂਕਿ ਸ੍ਰੀ ਜੈਨ ਭੌਤਿਕ ਵਿਗਿਆਨ ਦੇ ਇੱਕ ਉੱਚ ਕਸਟ ਦੇ ਅਧਿਆਪਕ ਹਨ ਅਤੇ ਉਨ੍ਹਾਂ ਦੇ ਸਾਥੀ ਅਧਿਆਪਕ ਅਤੇ ਅਧਿਆਪਕਾਂ ਦੇ ਭਲਾਈ ਕੰਮਾਂ ਲਈ ਸਰਗਰਮ ਰਹੇ ਹਨ।
ਇਸ ਮੌਕੇ 'ਤੇ ਡੀ.ਈ.ਓ. ਸਾਹਿਬ ਨਾਲ ਸਿੱਖਿਆ ਬਾਰੇ ਵਿਚਾਰ ਵਟਾਂਦਰੇ ਸਮੇਂ ਪ੍ਰਿੰਸ ਗੱਸਲ ਨੇ ਯੂ.ਟੀ. ਵਿਚ ਸਿੱਖਿਆ ਸੁਧਾਰਾਂ ਦੀ ਗੱਲ ਕਰਦੇ ਹੋਏ ਆਪਣੀ ਸੰਸਥਾ ਦੇ ਸਾਰੇ ਅਹੁਦੇਦਾਰਾਂ ਨਾਲ ਜਾਣ ਪਹਿਚਾਣ ਕਰਵਾਈ ਅਤੇ ਸਿੱਖਿਆ ਸੁਧਾਰਾਂ ਲਈ ਹਰ ਸੰਭਵ ਮਦਦ ਦਾ ਭਰੋਸਾ ਦਿੱਤਾ।
ਇਸ ਪਹਿਲੀ ਮੁਲਾਕਾਤ ਵਿਚ ਵਿਸ਼ਵ ਪੰਜਾਬੀ ਪ੍ਰਚਾਰ ਸਭਾ ਦੇ ਵਫ਼ਦ ਨੇ ਮੰਗ ਕੀਤੀ ਕਿ ਯੂ.ਟੀ. ਚੰਡੀਗੜ੍ਹ ਵਿੱਚ ਪੰਜਾਬੀ ਦੀ ਮਹੱਤਤਾ ਤੇ ਜ਼ੋਰ ਦਿੱਤਾ ਜਾਵੇ ਅਤੇ ਚੋਣਵੇਂ ਸਕੂਲਾਂ ਵਿੱਚ ਤ੍ਰੈ-ਭਾਸ਼ਾਈ ਕਵੀ ਦਰਬਾਰ ਕਰਵਾਏ ਜਾਣ ਤਾਂ ਕਿ ਬੱਚਿਆਂ ਨੂੰ ਪੰਜਾਬੀ ਵਿੱਚ ਖੁਲ ਕੇ ਬੋਲਣ ਦਾ ਮੌਕਾ ਮਿਲੇ। ਦੂਜੀ ਮੰਗ ਵਿੱਖੇ ਵਫ਼ਦ ਨੇ ਅਪੀਲ ਕੀਤੀ ਕਿ ਜਿਨ੍ਹਾਂ ਸਕੂਲਾਂ ਵਿੱਚ 10 ਜਾਂ 10 ਤੋਂ ਵਧ ਪੰਜਾਬੀ ਪੜ੍ਹਨ ਵਾਲੇ ਬੱਚੇ ਹਨ, ਉਨ੍ਹਾਂ ਲਈ ਵੱਖਰੇ ਸੈਕਸ਼ਨ ਬਣਾਏ ਜਾਣ। ਇਸ ਲਈ ਪ੍ਰਿੰਸ ਗੱਸਲ ਨੇ ਵਿਭਾਗ ਵਲੋਂ ਜਾਰੀ ਪੁਰਾਣੀਆਂ ਹਦਾਇਤਾਂ ਦੀ ਯਾਦ ਕਰਵਾਈ।
ਵਫ਼ਦ ਨੇ ਇਹ ਵੀ ਮੰਗ ਕੀਤੀ ਕਿ ਪਹਿਲੀ ਜਮਾਤ ਦੇ ਸਾਰੇ ਵਿਦਿਆਰਥੀਆਂ ਨੂੰ ਪੰਜਾਬੀ ਕਾਇਦੇ ਮੁਤਾਬਕ ਦਿੱਤੇ ਜਾਣ ਤਾਂ ਕਿ ਉਨ੍ਹਾਂ ਬੱਚਿਆਂ ਦੀ ਸ਼ੁਰੂ ਤੋਂ ਹੀ ਪੰਜਾਬੀ ਵਿੱਚ ਰੁਚੀ ਬਣੀ ਰਹੇ। ਵਫ਼ਦ ਨੇ ਸਕੂਲਾਂ ਦੀਆਂ ਲਾਇਬ੍ਰੇਰੀਆਂ ਵਿੱਚ ਵਧ ਤੋਂ ਵਧ ਪੰਜਾਬੀ ਪੁਸਤਕਾਂ ਦੇ ਰੱਖ-ਰਖਾਅ ਦਾ ਉੱਚਿਤ ਪ੍ਰਬੰਧ ਕਰਨ ਦੀ ਅਪੀਲ ਕੀਤੀ। ਇਸ ਸਬੰਧ ਵਿਚ ਵਫ਼ਦ ਨੇ ਆਪਣੀ ਸੰਸਥਾ ਵਲੋਂ ਹਰ ਤਰ੍ਹਾਂ ਦੀ ਮਦਦ ਦਾ ਭਰੋਸਾ ਦਿੱਤਾ ਅਤੇ ਪੰਜਾਬੀ ਵਿੱਚ ਮੁਫ਼ਤ ਕਿਤਾਬਾਂ ਦੇਣ ਦੀ ਪੇਸਕਸ਼ ਵੀ ਕੀਤੀ।
ਇਸੇ ਤਰ੍ਹਾਂ, ਸੰਸਥਾ ਦੇ ਮੈਂਬਰਾਂ ਨੇ ਯੂ.ਟੀ. ਦੇ ਸਕੂਲਾਂ ਵਿੱਚ ਬਾਲੜੀਆਂ ਦੀ ਸਿੱਖਿਆ ਨੂੰ ਹੌਸਲਾ ਦੇਣ ਦੀ ਮੰਗ ਕੀਤੀ ਅਤੇ ਵਿਭਾਗ ਵਲੋਂ ਸੰਸਥਾ ਦੇ ਚਲਾਏ ਜਾ ਰਹੇ ਪ੍ਰਾਜੈਕਟ ‘‘ਲਾਡੀ ਮੇਰੀ ਲਾਡਲੀ’’ ਲਈ ਸਹਿਯੋਗ ਦੀ ਮੰਗ ਕੀਤੀ।
ਡੀ.ਈ.ਓ. ਯੂ.ਟੀ. ਸ੍ਰੀ ਰਾਜਨ ਜੈਨ ਨੇ ਸੰਸਥਾ ਦੇ ਪ੍ਰਧਾਨ ਬਹਾਦਰ ਸਿੰਘ ਗੱਸਲ ਦੀਆਂ ਸਿੱਖਿਆ ਸਬੰਧੀ ਕਲਿਆਣਕਾਰੀ ਯੋਜਨਾਵਾਂ ਨੂੰ ਯਾਦ ਕਰਦੇ ਹੋਏ, ਸੰਸਥਾ ਵਲੋਂ ਕੀਤੇ ਸਵਾਗਤ ਅਤੇ ਸਿੱਖਿਆ ਸੁਧਾਰਾਂ ਲਈ ਦਿੱਤੇ ਸੁਝਾਵਾਂ ਲਈ ਧੰਨਵਾਦ ਕੀਤਾ ਅਤੇ ਪੂਰਣ ਭਰੋਸਾ ਦਿੱਤਾ ਕਿ ਉਨ੍ਹਾਂ ਦੀਆਂ ਮੰਗਾਂ 'ਤੇ ਵੀ ਵਿਚਾਰ ਕੀਤਾ ਜਾਵੇਗਾ।