ਅੰਮ੍ਰਿਤਸਰ:- ਲਿਵਾਸਾ ਹਸਪਤਾਲ, ਅੰਮ੍ਰਿਤਸਰ ਵਿੱਚ ਦਿਮਾਗੀ ਟਿਊਮਰ ਦੀ ਗੁੰਝਲਦਾਰ ਸਕੱਲ-ਬੇਸ ਸਰਜਰੀ ਤੋਂ ਬਾਅਦ 72 ਸਾਲਾ ਮਹਿਲਾ ਨੂੰ ਨਵਾਂ ਜੀਵਨ ਮਿਲਿਆ। ਮਹਿਲਾ ਦੇ ਦਿਮਾਗ ਵਿੱਚ ਵੱਡਾ ਟਿਊਮਰ ਸੀ, ਜਿਸ ਦਾ ਸਫਲਤਾਪੂਰਵਕ ਆਪਰੇਸ਼ਨ ਕੀਤਾ ਗਿਆ।
ਇਹ ਗੁੰਝਲਦਾਰ ਨਿਊਰੋਸਰਜੀਕਲ ਪ੍ਰਕਿਰਿਆ ਮਾਈਕ੍ਰੋਸਕੋਪ ਦੀ ਸਹਾਇਤਾ ਨਾਲ ਕੀਤੀ ਗਈ। ਇਸ ਦੌਰਾਨ 6 ਸੈਂਟੀਮੀਟਰ ਤੋਂ ਵੱਧ ਆਕਾਰ ਵਾਲਾ ਵਿਸ਼ਾਲ ਓਲਫੈਕਟਰੀ ਗਰੂਵ ਮੈਨਿੰਜਿਓਮਾ ਸਫਲਤਾਪੂਰਵਕ ਕੱਢਿਆ ਗਿਆ।
ਮਰੀਜ਼ਾ ਨੂੰ ਮਾਨਸਿਕ ਸਥਿਤੀ ਵਿੱਚ ਬਦਲਾਅ, ਵਾਰ-ਵਾਰ ਦੌਰੇ ਪੈਣ, ਸੁੰਘਣ ਦੀ ਸਮਰੱਥਾ ਖ਼ਤਮ ਹੋਣ ਅਤੇ ਨਜ਼ਰ ਕਮਜ਼ੋਰ ਹੋਣ ਦੀਆਂ ਸ਼ਿਕਾਇਤਾਂ ਕਾਰਨ ਲਿਵਾਸਾ ਹਸਪਤਾਲ ਵਿੱਚ ਦਾਖ਼ਲ ਕਰਵਾਇਆ ਗਿਆ ਸੀ। ਜਾਂਚ ਦੌਰਾਨ ਉਸ ਦੇ ਦਿਮਾਗ ਵਿੱਚ ਵਿਸ਼ਾਲ ਓਲਫੈਕਟਰੀ ਗਰੂਵ ਮੈਨਿੰਜਿਓਮਾ ਹੋਣ ਦਾ ਪਤਾ ਲੱਗਾ। ਇਹ ਇੱਕ ਕਿਸਮ ਦਾ ਟਿਊਮਰ ਹੈ, ਜੋ ਖੋਪੜੀ ਦੇ ਅਧਾਰ ’ਤੇ ਦਿਮਾਗ ਦੇ ਫਰੰਟਲ ਲੋਬ ਦੇ ਨੇੜੇ ਸਥਿਤ ਹੁੰਦਾ ਹੈ। ਇਹ ਉਨ੍ਹਾਂ ਬਣਤਰਾਂ ਦੇ ਕੋਲ ਹੁੰਦਾ ਹੈ, ਜੋ ਸੁੰਘਣ ਅਤੇ ਦੇਖਣ ਦੀ ਸਮਰੱਥਾ ਨੂੰ ਨਿਯੰਤਰਿਤ ਕਰਦੀਆਂ ਹਨ।
ਕੰਸਲਟੈਂਟ ਨਿਊਰੋਸਰਜਨ ਡਾ. ਅਮਨਜੋਤ ਸਿੰਘ ਬੋਪਾਰਾਏ ਨੇ ਦੱਸਿਆ ਕਿ ਓਲਫੈਕਟਰੀ ਗਰੂਵ ਮੈਨਿੰਜਿਓਮਾ ਦਿਮਾਗ ਦੇ ਸੁਰੱਖਿਆਤਮਕ ਪਰਦੇ ਤੋਂ ਪੈਦਾ ਹੁੰਦਾ ਹੈ ਅਤੇ ਆਮ ਤੌਰ ’ਤੇ ਫਰੰਟਲ ਅਤੇ ਸਕੱਲ-ਬੇਸ ਵਾਲੇ ਖੇਤਰਾਂ ਵਿੱਚ ਵਿਕਸਤ ਹੁੰਦਾ ਹੈ।
ਉਨ੍ਹਾਂ ਦੱਸਿਆ ਕਿ ਟਿਊਮਰ ਦੇ ਆਕਾਰ ਅਤੇ ਸਥਿਤੀ ਦੇ ਆਧਾਰ ’ਤੇ ਮਰੀਜ਼ ਨੂੰ ਸੁੰਘਣ ਦੀ ਸਮਰੱਥਾ ਵਿੱਚ ਬਦਲਾਅ, ਨਜ਼ਰ ਸਬੰਧੀ ਸਮੱਸਿਆਵਾਂ, ਦੌਰੇ ਪੈਣ, ਸਿਰਦਰਦ ਅਤੇ ਚੇਤਨਾ ਵਿੱਚ ਤਬਦੀਲੀ ਵਰਗੇ ਲੱਛਣ ਹੋ ਸਕਦੇ ਹਨ। ਵਿਸ਼ਾਲ ਟਿਊਮਰ ਦੀ ਸਰਜਰੀ ਚੁਣੌਤੀਪੂਰਨ ਹੁੰਦੀ ਹੈ, ਕਿਉਂਕਿ ਅਜਿਹੇ ਟਿਊਮਰ ਦਿਮਾਗ ਦੀਆਂ ਅਹਿਮ ਨਸਾਂ ਦੀਆਂ ਬਣਤਰਾਂ ਅਤੇ ਖੂਨ ਦੀਆਂ ਨਾੜੀਆਂ ਦੇ ਬਹੁਤ ਨੇੜੇ ਹੁੰਦੇ ਹਨ।
