ਹੁਸ਼ਿਆਰਪੁਰ- ਗੜਸ਼ੰਕਰ ਖੇਤਰ ਵਿੱਚ ਹੋਏ ਇੱਕ ਅੰਨ੍ਹੇ ਕਤਲ ਦੀ ਗੁੱਥੀ ਨੂੰ ਹੋਸ਼ਿਆਰਪੁਰ ਪੁਲਿਸ ਨੇ ਕੇਵਲ 24 ਘੰਟਿਆਂ ਵਿਚ ਸੁਲਝਾ ਲਿਆ ਹੈ। ਪੁਲਿਸ ਲਾਈਨ ਹੋਸ਼ਿਆਰਪੁਰ 'ਚ ਹੋਈ ਪ੍ਰੈਸ ਕਾਨਫਰੰਸ ਦੌਰਾਨ ਐਸ.ਐੱਸ.ਪੀ. ਸੰਦੀਪ ਕੁਮਾਰ ਮਲਿਕ ਨੇ ਦੱਸਿਆ ਕਿ ਇਹ ਕਤਲ ਗੜਸ਼ੰਕਰ ਥਾਣਾ ਖੇਤਰ ਵਿਚ ਹੋਇਆ ਸੀ, ਜਿਸ ਦੀ ਜਾਣਕਾਰੀ ਮਿਲਦੇ ਹੀ ਉਨ੍ਹਾਂ ਵੱਲੋਂ ਕਈ ਵੱਖ-ਵੱਖ ਟੀਮਾਂ ਬਣਾਈਆਂ ਗਈਆਂ।
ਇਹ ਟੀਮ ਐਸ.ਪੀ. ਡਾ. ਮੁਕੇਸ਼ ਕੁਮਾਰ, ਡੀ.ਐਸ.ਪੀ. ਗੜਸ਼ੰਕਰ ਜਸਪ੍ਰੀਤ ਸਿੰਘ, ਇੰਸਪੈਕਟਰ ਗੁਰਪ੍ਰੀਤ ਸਿੰਘ (ਸੀ.ਆਈ.ਏ. ਇੰਚਾਰਜ), ਅਤੇ ਇੰਸਪੈਕਟਰ ਗਗਨਦੀਪ ਸਿੰਘ (ਥਾਣਾ ਪ੍ਰਭਾਰੀ ਮਾਹਿਲਪੁਰ) ਦੇ ਅਗਵਾਈ ਵਿਚ ਕਾਰਜਸ਼ੀਲ ਰਹੀ। ਟੀਮ ਨੇ ਵੱਖ-ਵੱਖ ਪੱਖਾਂ ਤੋਂ ਜਾਂਚ ਕਰਦਿਆਂ ਇਸ ਅੰਨ੍ਹੇ ਕਤਲ ਦੀ ਗੁੱਥੀ 24 ਘੰਟਿਆਂ ਵਿਚ ਹੀ ਸੁਲਝਾ ਲਈ।
ਐਸ.ਐੱਸ.ਪੀ. ਨੇ ਦੱਸਿਆ ਕਿ ਮ੍ਰਿਤਕ ਦੀ ਪਛਾਣ ਆਰ੍ਯਨ ਵਜੋਂ ਹੋਈ ਹੈ ਜੋ ਕਿ ਥਾਣਾ ਗੜਸ਼ੰਕਰ ਦੇ ਪਾਸਲੇ ਪਿੰਡ ਸ਼ਾਹਕੋਟ ਖੜਾ ਦਾ ਰਹਿਣ ਵਾਲਾ ਸੀ। ਮੁਲਜ਼ਮ ਨਵੀਨ ਕੁਮਾਰ, ਜੋ ਕਿ ਆਰ੍ਯਨ ਦਾ ਰਿਸ਼ਤੇਦਾਰ ਵੀ ਹੈ, ਨੇ ਪੁਲਿਸ ਪੁੱਛਗਿੱਛ ਦੌਰਾਨ ਕਬੂਲਿਆ ਕਿ ਉਹ ਆਰ੍ਯਨ ਨੂੰ ਲੁਧਿਆਣਾ ਗਾਰਮੈਂਟਸ ਦੀ ਦੁਕਾਨ ਲਈ ਸ਼ਾਪਿੰਗ ਕਰਵਾਉਣ ਦੇ ਬਹਾਨੇ ਲੈ ਗਿਆ ਸੀ। ਵਾਪਸੀ ਦੌਰਾਨ, ਇਕ ਸੁਨਸਾਨ ਥਾਂ ਤੇ ਉਸ ਨੇ ਗੈਰਕਾਨੂੰਨੀ ਹਥਿਆਰ ਨਾਲ ਦੋ ਗੋਲੀਆਂ ਚਲਾਕੇ ਆਰ੍ਯਨ ਦੀ ਹੱਤਿਆ ਕਰ ਦਿੱਤੀ।
ਪੁਲਿਸ ਵੱਲੋਂ ਨਵੀਨ ਕੁਮਾਰ ਨੂੰ ਗ੍ਰਿਫਤਾਰ ਕਰ ਲਿਆ ਗਿਆ ਹੈ ਅਤੇ ਅਗਲੀ ਕਾਰਵਾਈ ਜਾਰੀ ਹੈ।
"ਮ੍ਰਿਤਕ ਆਰ੍ਯਨ ਦਾ ਕਤਲ ਉਸਦੇ ਹੀ ਰਿਸ਼ਤੇਦਾਰ ਨਵੀਨ ਨੇ ਕੀਤਾ। ਪੁਲਿਸ ਨੇ ਕੇਵਲ 24 ਘੰਟਿਆਂ ਵਿਚ ਇਸ ਕੇਸ ਨੂੰ ਟਰੇਸ ਕਰ ਲਿਆ ਅਤੇ ਮੁਲਜ਼ਮ ਨੂੰ ਕਾਬੂ ਕਰ ਲਿਆ ਗਿਆ।"